​ມສ ຈັນ​ສະຫວ່າງ​ຄອງ​ຂັນ​ຊະນະ​ເລີດ​ແລ່ນ 31 ຂາ​ສາມັກຄີ

157 12 ມ.ນ. 2019 ວົງຈອນກີລາ
​ມສ ຈັນ​ສະຫວ່າງ​ຄອງ​ຂັນ​ຊະນະ​ເລີດ​ແລ່ນ 31 ຂາ​ສາມັກຄີ

    ບໍລິສັດ ນິວ​ຈິບ​ເຊັງ ຈຳກັດ ຮ່ວມ​ກັບ​ພະ​ແນກ​ສຶກ​ສາ​ທິ​ການ ແລະ ກີລາ​ນະຄອນຫຼວງ​ວຽງ​ຈັນ (ນວ) ຈັດການ​ແຂ່ງຂັນ​ກີລາ​ແລ່ນ 31 ຂາ​ສາມັກຄີ ຄັ້ງ​ທີ 4 ຂຶ້ນ​ວັນ​ທີ 5 ມີນາ 2019 ທີ່​ເດີ່ນ​ເຕະບານ​ຫຍ້າ​ທຽມ​ສັບພະ​ວິຊາ ມີ​ທ່ານ ບຸນ​ສຸກ ທິ​ລະ​ສັກ ຫົວໜ້າ​ກົມ​ພະລະ ແລະ ສິລະ​ປະ​ສຶກ​ສາ ກະຊວງ​ສຶກ​ສາ​ທິ​ການ ແລະ ກີລາ ທ່ານ ຊົມ​ພູ ແກ້ວ​ປັນຍາ ຫົວໜ້າ​ພະ​ແນກ​ສຶກ​ສາ​ທິ​ການ ແລະ ກີລາ ນວ ແລະ ທ່ານ  ໄຊ​ຍຸດ ຣຸດ​ຈະ​ນາ​ພອນ ຜູ້​ຈັດການ​ທົ່ວ​ໄປ​ບໍລິສັດ ນິວ​ຈິບ​ເຊັງ ຈຳກັດ ຜູ້ຕາງໜ້າ​ຈາກ​ແຂວງ​ຈຳປາ​ສັກ ແຂວງ​ຄຳ​ມ່ວນ ຫົວໜ້າ​ຫ້ອງການ​ສຶກ​ສາ​ທິ​ການ ແລະ ກີລາ​ເມືອງ ຄູ​ອາຈານ ພະນັກງານ ນັກຮຽນ ແລະ ນັກກີລາ​ເຂົ້າ​ຮ່ວມ.

    ໂອກາດ​ນີ້​ທ່ານ ຄຳ​ມອນ ການ​ສີ​ລາ ຜູ້​ຈັດການ​ຝ່າຍ​ຂັບ​ຂີ່​ປອດ​ໄພ ທັງ​ເປັນ​ຝ່າຍ​ກິດຈະກຳ​ຊ່ວຍເຫຼືອ​ສັງຄົມ​ບໍລິສັດ ນິວ​ຈິບ​ເຊັງ ຈຳກັດ ກ່າວ​ວ່າ:ການ​ແຂ່ງຂັນ​ຄັ້ງ​ນີ້​ເພື່ອ​ເປັນ​ການ​ສະເຫຼີມສະຫຼອງ​ວັນ​ແມ່ຍິງ​ສາກົນ 8 ມີນາ ຄົບຮອບ 109 ປີ ນອກ​ນັ້ນ​ຍັງ​ປະຕິບັດ​ໃຫ້​ໄດ້​ຕາມ 5 ຫຼັກ​ມູນ​ການ​ສຶກ​ສາ ທີ່​ທາງ​ກະຊວງ​ສຶກ​ສາ​ທິ​ການ ແລະ  ກີລາ​ວາງ​ອອກ​ໃຫ້​ປາກົດ​ຜົນ​ເປັນ​ຈິງ ສ້າງ​ໃຫ້​ເດັກ​ມີ​ສະມາທິ ມີ​ລະບຽບ​ວິໄນ​ແກ່​ຕົນ​ເອງ ມີ​ຄວາມ​ສາມັກຄີ​ເຊິ່ງ​ກັນ​ແລະ​ກັນ ມີ​ສຸຂະພາບ​ແຂງແຮງ​ຫ່າງ​ໄກ​ຈາກ​ສິ່ງ​ເສບ​ຕິດ ໃຫ້​ນັກຮຽນ​ໄດ້​ເຮັດ​ວຽກ​ຮ່ວມ​ກັນ​ເປັນ​ທີມ ເປັນ​ໝູ່​ຄະນະ ຊ່ວຍເຫຼືອ​ກັນ ເປັນ​ການ​ສ້າງ​ສາຍສຳພັນ​ມິດຕະພາບ​ອັນ​ດີງາມ​ລະຫວ່າງ​ໂຮງຮຽນ​ກັບ​ໂຮງຮຽນ ປູກຝັງ​ຈິດ​ສຳນຶກ​ໃຫ້​ເດັກ​ໄດ້​ກາຍເປັນ​ຜູ້ນຳ​ໃນ​ອະນາຄົດ ແລະ ກີລາ​ປະເພດ​ນີ້ ຈະ​ບໍ່​ກຳນົດ​ເພດ​ຍິງ-ຊາຍ ຮູບ​ຮ່າງ​ລັກສະນະ​ທຸກ​ຄົນ​ສາມາດ​ຫຼິ້ນ​ໄດ້.

    ສຳລັບ​ການ​ແຂ່ງຂັນ​ຄັ້ງ​ນີ້​ມີ 28 ທີມ​ເຂົ້າ​ຮ່ວມ ສະເພາະ​ພາຍ​ໃນ ນວ ມີ 26 ທີມ ຜ່ານ​ການ​ແຂ່ງຂັນ​ອັນ​ດັບ 1 ໂຮງຮຽນ ​ມສ ຈັນ​ສະຫວ່າງ ອັນ​ດັບ 2 ​ມສ ໄຜ່​ລ້ອມ ແລະ ອັນ​ດັບ 3 ​ມສ ດອນ​ສະຫວ່າງ ໄດ້​ຮັບ​ຂັນ 1 ໜ່ວຍ ແລະ ເງິນສົດ 5 ລ້ານ​ກີບ ອັນ​ດັບ 2 ໄດ້​ຮັບ​ເງິນສົດ 4 ລ້ານ​ກີບ ແລະ ອັນ​ດັບ 3 ໄດ້​ຮັບ​ເງິນສົດ 3 ລ້ານ​ກີບ ນອກ​ນີ້​ຍັງ​ມີ​ລາງວັນ​ກອງ​ເຊຍ​ດີເດັ່ນ​ນຳ​ອີກ.

ຂ່າວທີ່ກ່ຽວຂ້ອງ