ຂ່າວຫຼ້າສຸດ

ຈີນ ພັດທະນາແອັບຕິດຕາມຄົນເປັນໜີ້

90 12 ມີ.ນ. 2019 ຫົວຂໍ້ຂ່າວອື່ນໆ

 

    ຫຼັງ​ຈາກ​ທີ່​ຈີນ​ໄດ້​ມີ​ມາດ​ຕະ­ການ​ໃຊ້​ນະ­ໂຍ­ບາຍ “ການ​ຈັດ​ລະ­ດັບ​ຄວາມ​ໜ້າ​ເຊື່ອ​ຖື​ໃນ​ສັງ­ຄົມ” ຈີນ ກໍ​ໄດ້​ກຽມ​ເປີດ​ຕົວ​ແອັບ​ທີ່​ມີ​ຊື່­ວ່າ ‘deadbeat debtors’ ເພື່ອ​ໃຊ້​ຕິດ­ຕາມ​ລູກ​ໜີ້ ໃນ​ລັດ­ສະ­ໝີ 500 ແມັດ ຈາກ​ຜູ້​ໃຊ້​ງານ​ແອັບ ເພື່ອ​ເປັນ​ໜຶ່ງ​ໃນ​ການ​ຈັດ​ລະ­ດັບ​ຄວາມ​ໜ້າ​ເຊື່ອ​ຖື ທີ່​ຄາດ​ວ່າ​ຈະ​ມີ​ການ​ນຳ​ມາດ​ຕະ­ການ​ນີ້​ມາ​ໃຊ້​ຢ່າງ​ເຕັມ​ຮູບ​ແບບ​ໃນ​ປີ 2020.

    “deadbeat debtors” ເປັນ​ແອັບ​ທີ່​ສາ­ມາດ​ລະ­ບຸ​ຕຳ­ແໜ່ງ​ຂອງ​ຄົນ​ທີ່​ເປັນ​ໜີ້ ພາຍ​ໃນ​ລັດ­ສະ­ໝີ 500 ແມັດ ຈາກ​ຜູ້​ໃຊ້​ແອັບ ຜ່ານ​ການ​ເຂົ້າ​ເຖິງ​ຂອງ​ໂປຣ​ແກຣມ Wechat (ໂປຣ​ແກຣມ​ທີ່​ເປັນ​ທີ່​ນິ­ຍົມ​ຫຼາຍ​ໃນ​ຈີນ) ເຮັດ​ໃຫ້​ສາ­ມາດ​ລະ­ບຸ​ຕຳ­ແໜ່ງ ແລະ ລາຍ​ຊື່​ຂອງ​ຜູ້​ເປັນ​ໜີ້​ໄດ້ ແຕ່​ກໍ​ຍັງ​ບໍ່​ມີ​ລາຍ​ງານ​ວ່າ ແອັບ​ນີ້​ຈະ​ສະ­ແດງ​ຂໍ້​ມູນ​ອື່ນໆ ຢ່າງ​ເຊັ່ນ​ຮູບ​ພາບ​ເພື່ອ​ລະ­ບຸ​ຕົວ​ຂອງ​ລູກ​ໜີ້​ເພີ່ມ​ເຕີມ.

    ໂຄ­ສົກ​ຂອງ​ສານ​ສູງ​ສຸດ​ຂອງ​ມົນ­ທົນ​ເຫີ​ເປີ່ຍ ກ່າວ​ວ່າ ສິ່ງ​ນີ້​ເປັນ​ສ່ວນ​ໜຶ່ງ​ໃນ​ນະ­ໂຍ­ບາຍ​ການ​ຈັດ​ລະ­ດັບ​ຄວາມ​ໜ້າ​ເຊື່ອ​ຖື​ໃນ​ສັງ­ຄົມ​ເຮົາ ສາ­ມາດ​ເບິ່ງ​ໄດ້​ວ່າ ເຂົາ​ມີ​ເງິນ​ຫຼາຍ​ພໍ​ທີ່​ຈະ​ຊຳ­ລະ​ໜີ້ ແຕ່​ບໍ່​ຍອມ​ຊຳ­ລະ ຫຼື ບໍ່ ຜ່ານ​ການ​ໃຊ້​ຈ່າຍ​ເງິນ​ໃນ​ແຕ່​ລະ​ວັນ​ຂອງ​ເຂົາ ແລະ ຫາກ​ບໍ່​ຈ່າຍ​ໜີ້ ລູກ​ໜີ້​ກໍ​ຈະ​ຖືກ​ຫັກ​ຄະ­ແນນ​ຄວາມ​ໜ້າ​ເຊື່ອ​ຖື ແລະ ເມື່ອ​ຄະ­ແນນ​ຄວາມ​ໜ້າ​ເຊື່ອ​ຖື​ຂອງ​ທ່ານ​ຕ່ຳ​ລົງ ທ່ານ​ຈະ​ໄດ້​ຮັບ​ຜົນ​ກະ­ທົບ​ຈາກ​ມັນ​ຫຼວງ­ຫຼາຍ​ຢ່າງ ເຊັ່ນ: ທ່ານ​ຈະ​ບໍ່​ສາ­ມາດ​ຊື້​ປີ້​ລົດ­ໄຟ ຫຼື ເຮືອ­ບິນ​ໄດ້ ບໍ່​ພຽງ​ແຕ່​ການ​ຊຳ­ລະ​ໜີ້ ແຕ່​ຫາກ​ທ່ານ​ຫຼິ້ນ​ເກມ​ຫຼາຍ​ເກີນ​ໄປ ຫຼື ໂພສ​ຂ່າວ​ປອມ​ລົງ​ເທິງ​ໂລກ​ອອນ​ລາຍ ທ່ານ​ຈະ​ຖືກ​ລົງ­ໂທດ​ດ້ວຍ​ການ​ຫຼຸດ​ຄວາມ​ໄວ​ອິນ​ເຕີ​ເນັດ​ລົງ ແລະ ທ່ານ​ອາດ​ຈະ​ຖືກ​ຈຳ­ກັດ​ການ​ສຶກ​ສາ ພຽງ​ເພາະ​ທ່ານ​ມີ​ຄະ­ແນນ​ຄວາມ​ໜ້າ​ເຊື່ອ​ຖື​ຕ່ຳ​ເກີນ​ໄປ ປະ­ຊາ­ຊົນ​ຈະ​ໄດ້​ຮັບ​ຄະ­ແນນ​ຄວາມ​ໜ້າ​ເຊື່ອ​ຖື​ເພີ່ມ​ຂຶ້ນ ເມື່ອ​ພວກ​ເຂົາ​ເຮັດ​ຈິດ​ອາ­ສາ​ບໍ­ລິ­ຈາກ​ເລືອດ ຫຼື ເຮັດ​ກິດ­ຈະ­ກຳ​ໃດໆ​ທີ່​ເປັນ​ປະ­ໂຫຍດ​ຕໍ່​ສ່ວນ​ລວມ ເຊິ່ງ​ແອັບ​ນີ້ ໄດ້​ມີ​ການ​ເປິດ​ໃຊ້​ຈິງ​ແລ້ວ​ໃນ​ບາງ​ເຂດ​ຂອງ​ປະ­ເທດ​ຈີນ.

    ຟັງ​ເບິ່ງ​ແລ້ວ​ມັນ​ໜ້າ​ອຶດ​ອັດ ຫາກ​ລັດ­ຖະ­ບານ​ຈະ​ຕິດ­ຕາມ​ປະ­ຊາ­ຊົນ​ກວ່າ 1,3 ຕື້​ຄົນ ເພື່ອ​ຈັດ​ອັນ​ດັບ​ພຶດ­ຕິ​ກຳ​ຂອງ​ພວກ​ເຂົາ​ຕະ­ຫຼອດ​ເວ­ລາ ແຕ່​ສຳ­ລັບ​ເຈົ້າ​ໜີ້​ແລ້ວ­ນີ້ ຄົງ​ຈະ​ເປັນ​ເລື່ອງ​ດີ ໃນ​ການ​ກຳ­ຈັດ​ບັນ­ຫາ​ລູກ​ໜີ້ ບໍ່​ມີ ! ບໍ່​ໜີ ! ບໍ່​ຈ່າຍ ! ໄດ້​ດີ​ເລີຍ.

ວ. ດາ­ລາ​ວົງ - ນຳ​ສະ­ເໜີ

ຂ່າວທີ່ກ່ຽວຂ້ອງ