ເບິ່ງບ້ານເຂົາເອົາບົດຮຽນ 12/03/2019

210 12 ມ.ນ. 2019 ຫົວຂໍ້ຂ່າວອື່ນໆ

    ມື້­ນີ້​ມີ​ຂ່າວ​ເກົ່າ​ເລົ່າ​ໃໝ່ ກ່ຽວ​ກັບ​ການ​ປະ­ຕິ­ວັດ​ຫ້ອງ​ນ້ຳ​ທີ່ ສປ ຈີນ ແລະ ເລື່ອງ​ຕັດ​ສິດ​ຜົວ ຫຼື ເມຍ ທີ່​ນອກ­ໃຈ​ຮ້ອງ​ຟ້ອງ​ຂໍ​ຢ່າ​ຮ້າງ​ກ່ອນ ທີ່ ສ ເກົາ­ຫຼີ.

    ທີ່ ສປ ຈີນ: ໃນ​ຊຸມ​ປີ​ຫຼັງໆ​ມາ​ນີ້ ຈີນ​ເອົາ­ໃຈ­ໃສ່​ປັບ­ປຸງ​ຄຸນ​ນະ​ພາບ​ຂອງ​ລະ­ບົບ​ຫ້ອງ​ນ້ຳ​ຕາມ​ຕົວ​ເມືອງ ກໍ​ຄື ໃນ​ຊົນ­ນະ­ບົດ ໂດຍ​ຖື​ວຽກ​ງານ​ດັ່ງ­ກ່າວ ເປັນ​ສ່ວນ​ໜຶ່ງ​ຂອງ​ນະ­ໂຍ­ບາຍ​ດຶງ​ດູດ​ນັກ​ທ່ອງ​ທ່ຽວ ກ່ຽວ​ກັບ​ບັນ­ຫາ​ນີ້ ທ່ານ​ຜູ້­ນຳ​ສູງ​ສຸດ ສີ ຈິ້ນ​ຜິງ ກໍ​ໄດ້​ຮຽກ­ຮ້ອງ​ໃຫ້​ເຮັດ​ການ “ປະ­ຕິ­ວັດ​ຫ້ອງ​ນ້ຳ” ເພື່ອ​ສົ່ງ­ເສີມ​ການ­ທ່ອງ­ທ່ຽວ​ພາຍ​ໃນ ແລະ ປັບ­ປຸງ​ຄຸນ​ນະ​ພາບ​ຂອງ​ຊີ­ວິດ​ພົນ­ລະ­ເມືອງ (ວຽງ​ຈັນ​ທາມ 28 ພະ­ຈິກ 2017) ໄປ​ຄຽງ​ຄູ່​ກັບ​ການ​ປະ­ຕິ­ວັດ​ຫ້ອງ​ນ້ຳ​ນັ້ນ ຍັງ​ຕ້ອງ​ໄດ້​ກໍ່­ສ້າງ​ສະ­ຖານ­ທີ່​ສາ­ທາ­ລະ­ນະ ເພື່ອ​ເອື້ອ​ອຳ­ນວຍ​ຄວາມ​ສະ­ດວກ​ໃຫ້​ແກ່​ສັງ­ຄົມ ແລະ ເພື່ອ​ສົ່ງ­ເສີມ​ອຸດ­ສາ­ຫະ­ກຳ​ທ່ອງ​ທ່ຽວ ຂ່າວ​ບອກ​ວ່າ ການ​ປະ­ຕິ­ວັດ​ຫ້ອງ​ນ້ຳ​ຢ່າງ​ເອົາ​ຈິງ​ເອົາ​ຈັງ​ໃນ​ຈີນ​ນັ້ນ ໄດ້​ເລີ່ມ​ມາ​ແຕ່​ປີ 2015 ໂດຍ​ເນັ້ນ​ຄວາມ​ສະ­ອາດ ແລະ ລະ­ບົບ​ການ​ຄຸ້ມ​ຄອງ​ຄັກ­ແນ່ ໃນ​ໄລ­ຍະ​ຜ່ານ​ມາ ສະ­ພາບ​ຫ້ອງ​ນ້ຳ​ໃນ​ເຂດ​ຊົນ­ນະ­ບົດ ແລະ ຕາມ​ສະ­ຖານ­ທີ່​ທ່ອງ​ທ່ຽວ​ຕ່າງໆ ຍັງ​ບໍ່​ໄດ້​ຮັບ​ການ​ເອົາ­ໃຈ­ໃສ່​ເທົ່າ​ທີ່​ຄວນ ຫ້ອງ​ນ້ຳ​ບາງ​ແຫ່ງ​ຍັງ​ປຸກ​ພໍ­ແລ້ວ​ຮີດ ຮົກ­ເຮື້ອ ບໍ່​ມີ​ແນວ​ກັ້ງ​ບັງ ນັກ​ທ່ອງ​ທ່ຽວ​ຫຼາຍ​ຄົນ​ສະ­ແດງ​ຄວາມ​ບໍ່​ພໍ­ໃຈ​ຕໍ່​ສະ­ພາບ​ຂາດ­ແຄນ​ຫ້ອງ​ນ້ຳ​ທີ່​ສະ­ອາດ ກໍ​ຄື ພະ­ນັກ­ງານ​ທີ່​ຮັບ­ຜິດ­ຊອບ​ເລື່ອງ​ສຸ​ຂະ​ອະ­ນາ­ໄມ​ທົ່ວ​ໄປ ແນວ­ໃດ​ກໍ​ດີ ການ​ປະ­ຕິ­ວັດ​ຫ້ອງ​ນ້ຳ​ຢູ່​ຈີນ​ນັ້ນ ເຫັນ​ຜົນ​ທັນ­ຕາ ຄື ຮອດ​ທ້າຍ​ເດືອນ​ຕຸ­ລາ 2017 ຈີນ ໄດ້​ສ້າງ ຫຼື ປັບ­ປຸງ​ຫ້ອງ​ນ້ຳ​ສຳ­ເລັດ 68.000 ຫົວ­ໜ່ວຍ ຕາມ​ຈຸດ​ທ່ອງ​ທ່ຽວ​ຕ່າງໆ​ລື່ນ​ຕົວ​ເລກ​ຄາດ­ໝາຍ​ທີ່​ໄດ້​ກຳ­ນົດ​ໄວ້ ເຖິງ 19,3% ຈາກ​ສະ­ຖານ­ທີ່​ທ່ອງ​ທ່ຽວ ການ​ປະ­ຕິ­ວັດ​ຫ້ອງ​ນ້ຳ ໄດ້​ຄ່ອຍໆ​ກວມ​ເອົາ​ທົ່ວ​ສັງ­ຄົມ ໃນ​ຂອບ​ເຂດ​ຂອງ​ປະ­ເທດ ຂ່າວ​ໃຫ້​ຮູ້​ຕື່ມ​ວ່າ ແຕ່​ປີ 2018 ຫາ ປີ 2020 ທາງ​ການ​ຈີນ​ມີ​ແຜນ​ສ້າງ ຫຼື ປັບ­ປຸງ​ຫ້ອງ​ນ້ຳ​ໃຫ້​ໄດ້​ຕື່ມ​ອີກ 64.000 ຫົວ­ໜ່ວຍ ຕາມ​ເຂດ​ທ່ອງ​ທ່ຽວ​ຕ່າງໆ.

    ທີ່ ສ ເກົາ­ຫຼີ: ມາດ​ຕະ­ການ​ເດັດໆ​ຂອງ ສ ເກົາ­ຫຼີ ເພື່ອ​ດັດ​ສັນ­ດານ​ຊາຍ ຫຼື ຍິງ ທີ່​ມີ​ນິ­ໄສ​ນອກ­ໃຈ ຈົນ​ເຮັດ​ໃຫ້​ຊີ­ວິດ​ແຕ່ງ­ດອງ​ຖືກ​ຫັກ​ພັງ​ນີ້ ພວກ​ເຮົາ​ຄວນ​ເບິ່ງ​ໄວ້​ເປັນ​ບົດ­ຮຽນ ຂ່າວ​ນີ້​ເກັບ​ມາ​ຈາກ​ສຳ­ນັກ​ຂ່າວ­ສານ ຢອນ​ຮັບ (Yonhap) ຂອງ ສ ເກົາ­ຫຼີ ເອງ ເລື່ອງ​ມີ​ຢູ່​ວ່າ ໃນ​ວັນ​ທີ 15 ກັນ­ຍາ 2015 (ເມື່ອ​ເດືອນ 4 ປີ­ຜ່ານ­ມາ) ຄະ­ນະ​ຜູ້​ແທນ​ພິ­ພາກ­ສາ​ສານ​ສູງ​ຂອງ ສ ເກົາ­ຫຼີ ໄດ້​ກຳ­ນົດ​ຕັດ​ສິດ “ຂໍ​ຢ່າ​ຮ້າງ​ກ່ອນ” ຂອງ​ຜົວ ຫຼື ເມຍ ທີ່​ເປັນ​ຕົວ​ການ​ທຳ­ລາຍ​ຊີ­ວິດ​ສົມ­ລົດ​ດ້ວຍ​ການ​ນອກ­ໃຈ ຂໍ​ອະ­ທິ­ບາຍ​ໃຫ້​ແຈ້ງ​ຕື່ມ​ວ່າ ຊາຍ​ທີ່​ເປັນ​ຜົວ ຫຼື ຍິງ​ທີ່​ເປັນ​ເມຍ ທີ່​ມີ​ການ​ປະ­ພຶດ​ນອກ­ໃຈ​ນັ້ນ ຈະ​ໝົດ​ສິດ​ຂໍ​ຢ່າ​ຮ້າງ​ກ່ອນ​ກັບ​ຜົວ ຫຼື ເມຍ​ຂອງ​ຕົນ ເຫດ­ຜົນ​ທີ່​ຕ້ອງ​ໄດ້​ກຳ­ນົດ​ມາດ​ຕະ­ການ​ດັ່ງ­ກ່າວ​ໄວ້​ເປັນ​ບັນ­ທັດ­ຖານ ສຳ­ລັບ​ຊີ­ວິດ​ຂອງ​ຄູ່​ສົມ­ລົດ ກໍ​ຍ້ອນ​ວ່າ ຜ່ານ​ມາ​ແມ່­ຍິງ​ມັກ​ຈະ​ເປັນ​ຝ່າຍ​ທີ່​ໄດ້​ຮັບ​ຄວາມ​ອັບ​ປະ­ໂຫຍດ ຈາກ​ການ​ຖືກ​ຟ້ອງ​ຢ່າ​ຮ້າງ​ຈາກ​ສາ­ມີ​ທີ່​ນອກ­ໃຈ ໂດຍ​ບໍ່​ມີ​ເຫດ­ຜົນ​ຕາມ​ກົດ­ໝາຍ​ຂອງ ສ ເກົາ­ຫຼີ ການ​ຢ່າ​ຮ້າງ​ລະ­ຫວ່າງ​ຜົວ​ເມຍ ຈະ​ເກີດ​ຂຶ້ນ​ໄດ້​ກໍ​ຕໍ່​ເມື່ອ​ມີ​ການ​ຍິນ​ຍອມ​ຈາກ​ທັງ​ສອງ​ຝ່າຍ​ເທົ່າ​ນັ້ນ ອີກ​ຂ່າວ​ໜຶ່ງ​ທີ່​ໂດ່ງ​ດັງ​ໃນ ສ ເກົາ­ຫຼີ ກໍ​ຄື ຂ່າວ​ກ່ຽວ​ກັບ​ຄຳ​ວິ­ນິດ​ໄສ​ຂອງ​ສານ​ລັດ​ຖະ​ທຳ​ມະ­ນູນ ສ ເກົາ­ຫຼີ ທີ່​ວ່າ “ການ​ມີ​ຊູ້ ບໍ່​ຖື​ເປັນ​ເລື່ອງ​ຜິດ​ກົດ­ໝາຍ” ຄຳ​ວິ­ນິດ​ໄສ​ນີ້​ໄດ້​ຖືກ​ວິ­ພາກ​ວິ­ຈານ​ຈາກ​ຫຼາຍ​ຝ່າຍ​ວ່າ ຈະ​ເປັນ​ການ​ສົ່ງ­ເສີມ​ຄ່າ​ນິ­ຍົມ​ເລື່ອງ​ນອກ­ໃຈ ຊຶ່ງ​ເປັນ​ໄພ​ຕໍ່​ຄວາມ​ໝັ້ນ­ຄົງ​ຂອງ​ສະ​ຖາ​ບັນ​ຄອບ­ຄົວ.

ຂ່າວທີ່ກ່ຽວຂ້ອງ