ຂ່າວຫຼ້າສຸດ

ຜູ້ບໍລິຫານການບິນລາວ ຊີ້ແຈງເຫດຖ້ຽວບິນ QV 865 ລົງຈອດສຸກເສີນ

402 12 ມ.ນ. 2019 ຂ່າວໜ້າ​ໜຶ່ງ

    ໃນ​ວັນ​ທີ 11 ມີ­ນາ 2019 ທ່ານ ບຸນ​ມາ ຈັນ­ທະ​ວົງ­ສາ ຜູ້­ອຳ­ນວຍ­ການ​ໃຫຍ່ ລັດ​ວິ​ສາ​ຫະ​ກິດ​ການ­ບິນ​ລາວ ໄດ້​ຊີ້​ແຈງ​ຕໍ່​ເຫດ​ຖ້ຽວ​ບິນ QV 865 ເຮືອ­ບິນ​ລຸ້ນ Airbus 320-214 ລະ­ຫັດ​ທະ­ບຽນ RDPL-34188 ໄດ້​ລົງ​ຈອດ​ສຸກ​ເສີນ ໃນ​ຕອນ​ຄ່ຳ​ຂອງ​ວັນ​ທີ 10 ມີ­ນາ 2019 ວ່າ: ເມື່ອ​ເຮືອ­ບິນ​ຄັນ​ດັ່ງ­ກ່າວ ຖ້ຽວ​ບິນ QV 865 ມີ​ຜູ້­ໂດຍ­ສານ​ທັງ​ໝົດ 129 ຄົນ ໄດ້​ບິນ​ຈາກ​ສະ­ໜາມ​ບິນ​ວັດ​ໄຕ ນະ­ຄອນ­ຫຼວງ​ວຽງ​ຈັນ ສູ່​ນະ­ຄອນ​ຊຽງ​ໄຮ້ ສປ ຈີນ ເມື່ອ​ບິນ​ຂຶ້ນ​ໄປ​ປະ­ມານ 15 ນາ­ທີ ນັກ​ບິນ​ສັງ­ເກດ​ເຫັນ​ລະ­ບົບ​ໄຟ​ແຈ້ງ​ເຕືອນ​ຂອງ​ຕີນ​ໜ້າ​ເຮືອ­ບິນ​ອາດ​ມີ​ບັນ­ຫາ ບັນ­ຊາ​ລ໋ອກ​ບໍ່​ໄດ້ ເພື່ອ​ຄວາມ​ປອດ​ໄພ ນັກ​ບິນ​ຈຶ່ງ​ຕັດ­ສິນ​ໃຈ​ນຳ​ເຮືອ­ບິນ​ກັບ​ຄືນ​ລົງ​ມາ​ເພື່ອ​ກວດ​ສອບ ແຕ່​ເນື່ອງ​ຈາກ​ນ້ຳ­ໜັກ​ຂອງ​ເຮືອ­ບິນ​ເກີນ​ກວ່າ​ມາດ­ຕະ­ຖານ​ທີ່​ຈະ​ພາ​ເຮືອ­ບິນ​ລົງ​ຈອດ​ໄດ້ ນັກ​ບິນ​ຈຶ່ງ​ຈຳ­ເປັນ​ຕ້ອງ​ໄດ້​ບິນ​ເວີ່ນ​ຢູ່​ເຂດ​ອ່າງ​ນ້ຳ​ງື່ມ​ປະ­ມານ​ຊົ່ວ­ໂມງ​ເຄິ່ງ ເພື່ອ​ຈູດ​ນ້ຳ­ມັນ​ໃຫ້​ນ້ຳ­ໜັກ​ຫຼຸດ​ລົງ ແລ້ວ​ຈຶ່ງ​ລົງ​ຈອດ​ດ້ວຍ​ຄວາມ​ປອດ​ໄພ.

    ທ່ານ ບຸນ​ມາ ຈັນ­ທະ​ວົງ­ສາ ຍັງ​ໃຫ້​ຮູ້​ຕື່ມ​ວ່າ: ຕໍ່​ເຫດ­ການ​ດັ່ງ­ກ່າວ ນັກ​ບິນ​ບໍ່​ໄດ້​ຂໍ​ສັນ­ຍານ​ລົງ​ຈອດ​ສຸກ​ເສີນ ເນື່ອງ​ຈາກ​ເຮືອ­ບິນ​ຍັງ​ສາ­ມາດ​ບິນ​ໄດ້​ຕາມ​ປົກ­ກະ­ຕິ ແຕ່​ພະ­ນັກ­ງານ​ພາຍ​ໃນ​ສະ­ໜາມ​ບິນ​ມີ​ຄວາມ​ສະ­ດຸ້ງ​ໄວ ຈຶ່ງ​ໄດ້​ແຈ້ງ​ລົດ​ດັບ​ເພີງ ແລະ ທິມ​ງານ​ກູ້​ໄກ ເພື່ອ​ກຽມ​ຄວາມ​ພ້ອມ​ໄວ້​ໃນ​ເວ­ລາ​ສຸກ​ເສີນ ຈຶ່ງ​ເຮັດ​ໃຫ້​ສັງ­ຄົມ​ເກີດ​ມີ​ຄວາມ​ເຂົ້າ­ໃຈ​ຜິດ​ເກີນ​ເຫດ ຜ່ານ​ສື່​ສັງ­ຄົມ​ອອນ​ໄລ.

    ສຳ­ລັບ​ຜູ້­ໂດຍ­ສານ​ຂອງ​ຖ້ຽວ​ບິນ QV 865 ແມ່ນ​ໄດ້​ປ່ຽນ​ຖ່າຍ​ຜູ້­ໂດຍ­ສານ​ໄປ​ໃສ່​ຖ້ຽວ​ບິນ​ອື່ນ ແລະ ປັດ­ຈຸ­ບັນ​ເຮືອ­ບິນ​ລຸ້ນ Airbus 320-214 ລະ­ຫັດ​ທະ­ບຽນ RDPL-34188 ໄດ້​ຜ່ານ​ການ​ກວດ​ສອບ​ລະ­ບົບ​ຢ່າງ​ລະ­ອຽດ​ແລ້ວ ແລະ ສາ­ມາດ​ນຳ​ໃຊ້​ບິນ​ໄດ້​ຢ່າງ​ເປັນ​ປົກ­ກະ­ຕິ.

ຂ່າວທີ່ກ່ຽວຂ້ອງ