ຂ່າວຫຼ້າສຸດ

ສສຊ-ສສ ນວ ລົງພົບປະປະຊາຊົນເມືອງສັງທອງ

237 12 ມ.ນ. 2019 ຂ່າວໜ້າ​ໜຶ່ງ
ສສຊ-ສສ ນວ ລົງພົບປະປະຊາຊົນເມືອງສັງທອງ

    ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ຊຸດ​ທີ VIII ແລະ ສະ­ມາ­ຊິກ​ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ (ສສ ນວ) ຊຸດ​ທີ I ໄດ້​ລົງ​ພົບ​ປະ​ປະ­ຊາ­ຊົນ​ທີ່​ວັດ​ບ້ານ​ນາ​ຫອຍ ເມືອງ​ສັງ​ທອງ ນວ ໃນ​ວັນ​ທີ 4 ມີ­ນາ 2019 ນຳ​ໂດຍ​ທ່ານ​ນາງ ບົວ​ຄຳ ທິບ​ພະ​ວົງ ປະ­ທານ​ກຳ­ມາ​ທິ​ການ​ຍຸ­ຕິ​ທຳ ສສຊ ຊຸດ​ທີ VIII ທ່ານ ແສງ​ສຸ­ວັນ ຈັນ­ທະ​ລຸນ​ນະ​ວົງ ສສ ນວ ຊຸດ​ທີ I ປະ­ທານ​ສານ​ປະ­ຊາ­ຊົນ ນວ ແລະ ທ່ານ ສີ​ສຸ­ພັນ ບຸນ​ສະ­ເໜີ ຫົວ­ໜ້າ​ຫ້ອງ​ວ່າ​ການ­ເມືອງ​ສັງ​ທອງ ສສຊ ຊຸດ​ທີ I  ມີ​ຕາງ­ໜ້າ​ເມືອງ ພ້ອມ​ດ້ວຍ​ປະ­ຊາ­ຊົນ​ບ້ານ​ອ້ອມ​ຂ້າງ​ເຂົ້າ​ຮ່ວມ.

    ການ​ລົງ​ພົບ​ປະ​ຄັ້ງ​ນີ້ ສສຊ ແລະ ສສ ນວ ໄດ້​ເຜີຍ­ແຜ່​ຜົນ­ສຳ­ເລັດ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ເຊິ່ງ​ໄດ້​ພິ­ຈາ­ລະ­ນາ ແລະ ຮັບ­ຮອງ​ເອົາ​ບົດ​ລາຍ​ງານ​ກ່ຽວ​ກັບ​ການ­ເຄື່ອນ­ໄຫວ​ວຽກ​ງານ​ພົ້ນ​ເດັ່ນ​ຂອງ​ລັດ­ຖະ­ບານ ປະ­ຈຳ​ປີ 2018 ແລະ ແຜນ­ການ​ປະ­ຈຳ​ປີ 2019 ສະ­ພາບ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແຜນ​ງົບ­ປະ­ມານ​ແຫ່ງ​ລັດ ແຜນ​ເງິນ­ຕາ ປະ­ຈຳ​ປີ 2018 ແລະ ແຜນ­ການ​ປະ­ຈຳ​ປີ 2019 ຂອງ​ລັດ­ຖະ­ບານ ແລະ ຮັບ­ຮອງ​ເອົາ​ກົດ­ໝາຍ 8 ສະ­ບັບ ໃນ​ນີ້ ກົດ­ໝາຍ​ສ້າງ​ໃໝ່ 7 ສະ­ບັບ ກົດ­ໝາຍ​ປັບ­ປຸງ 1 ສະ­ບັບ ແລະ ເຜີຍ­ແຜ່​ຜົນ­ສຳ­ເລັດ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ ສສ ນວ ຊຸດ​ທີ I ເຊິ່ງ​ໄດ້​ພິ­ຈາ­ລະ­ນາ ແລະ ຮັບ­ຮອງ​ບົດ​ລາຍ​ງານ​ຂອງ​ອົງ­ການ​ປົກ­ຄອງ ນວ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແຜນ​ງົບ­ປະ­ມານ​ປະ­ຈຳ​ປີ 2018 ແລະ ແຜນ­ການ​ປະ­ຈຳ​ປີ 2019 ບົດ​ລາຍ​ງານ​ຂອງ​ອົງ­ການ​ກວດ​ສອບ​ແຫ່ງ​ລັດ ປະ­ຈຳ​ພາກ​ກາງ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ­ການ­ເຄື່ອນ­ໄຫວ​ວຽກ​ງານ ປະ­ຈຳ​ປີ 2018 ແລະ ແຜນ­ການ​ປີ 2019 ນອກ​ນີ້ ຍັງ​ໄດ້​ຮັບ​ເອົາ​ບົດ​ລາຍ​ງານ​ວຽກ​ງານ​ສຳ­ຄັນ​ອື່ນໆ​ອີກ​ຈຳ­ນວນ​ໜຶ່ງ.

    ໃນ​ຕອນ​ທ້າຍ ສສຊ ແລະ ສສ ນວ ໄດ້​ເປີດ​ໂອ­ກາດ​ໃຫ້​ປະ­ຊາ­ຊົນ​ຂຶ້ນ​ສະ­ເໜີ​ບັນ­ຫາ​ຄົງ​ຄ້າງ​ຕ່າງໆ ເພື່ອ​ຈະ​ນຳ​ເອົາ​ຂໍ້­ຄົງ­ຄ້າງ​ຕ່າງໆ ໄປ​ສະ­ເໜີ​ຕໍ່​ອຳ­ນາດ​ການ​ປົກ­ຄອງ ແລະ ພາກ­ສ່ວນ​ກ່ຽວ­ຂ້ອງ​ແກ້​ໄຂ​ໃນ­ຕໍ່­ໜ້າ.

ຂ່າວທີ່ກ່ຽວຂ້ອງ