ໄວໜຸ່ມອາຊຽນ ພົບປະກັນກ່ຽວການທ່ອງທ່ຽວແບບອະນຸຮັກ

160 12 ມີ.ນ. 2019 ຂ່າວໜ້າ​ໜຶ່ງ
ໄວໜຸ່ມອາຊຽນ ພົບປະກັນກ່ຽວການທ່ອງທ່ຽວແບບອະນຸຮັກ

    ໂດຍ​ໄດ້​ຮັບ​ທຶນ​ຈາກ​ລັດ­ຖະ­ບານ ສ ອາ​ເມ​ຣິ​ກາ ສະ­ນັ້ນ The Asia Foundation ໄດ້​ຈັດ​ເຝິກ­ອົບ­ຮົມ​ການ­ທ່ອງ­ທ່ຽວ​ແບບ​ອະ­ນຸ​ຮັກ​ຂຶ້ນ ໃນ​ວັນ​ທີ 4-8 ມີ­ນາ 2019 ທີ່​ແຂວງ​ຫຼວງ​ພະ​ບາງ ເພື່ອ​ໃຫ້​ບັນ­ດາ​ຜູ້​ປະ­ກອບ​ການ​ໜຸ່ມ 50 ທ່ານ ຈາກ​ບັນ­ດາ​ປະ­ເທດ​ອາ​ຊຽນ ແລະ ຕີ​ມໍ​ແລັດ​ສະ​ເຕ ໄດ້​ພົບ​ປະ­ກັນ ເປັນ​ການ​ກະ​ຕຸ້ນ​ສົ່ງ­ເສີມ​ຄວາມ​ຕໍ່​ເນື່ອງ​ຂອງ​ປີ​ທ່ອງ​ທ່ຽວ 2018 ຂອງ​ລັດ­ຖະ­ບານ ສປປ ລາວ.

    ການ​ອົບ­ຮົມ​ໃນ​ຄັ້ງ​ນີ້ ແມ່ນ​ເພື່ອ​ນຳ​ເອົາ​ບັນ­ດາ​ຜູ້​ປະ­ກອບ​ການ​ໄວ​ໜຸ່ມ ຈາກ​ອາ­ຊີ​ຕາ­ເວັນ​ອອກ­ສຽງ​ໃຕ້​ມາ ສປປ ລາວ ເພື່ອ​ຮຽນ​ຮູ້​ຈາກ​ບັນ­ດາ​ຫົວ­ໜ່ວຍ​ທຸ­ລະ​ກິດ ວິ​ສາ​ຫະ​ກິດ ການ­ທ່ອງ­ທ່ຽວ​ຂະ­ໜາດ​ນ້ອຍ ທີ່​ໄດ້​ມີ​ການ​ປະ­ກອບ­ສ່ວນ​ສົ່ງ­ເສີມ​ການ­ທ່ອງ­ທ່ຽວ​ທີ່​ເປັນ​ມິດ​ກັບ​ສິ່ງ­ແວ­ດລ້ອມ ແລະ ຮູບ​ແບບ​ຂອງ​ຊຸມ​ຊົນ ສຳ­ລັບ​ການ­ທ່ອງ­ທ່ຽວ​ໃນ​ໄລ­ຍະ 15 ປີ​ທີ່​ຜ່ານ​ມາ ອຸດ­ສາ­ຫະ­ກຳ​ທ່ອງ​ທ່ຽວ​ແບບ​ອະ­ນຸ​ຮັກ​ຢູ່​ທີ່​ເມືອງ​ມໍ­ລະ­ດົກ​ໂລກ ໄດ້​ແຕກ​ດອກ​ອອກ​ຜົນ ເຊິ່ງ​ເຮັດ​ໃຫ້​ບັນ­ດາ​ຫົວ­ໜ່ວຍ​ທຸ­ລະ​ກິດ ວິ​ສາ​ຫະ​ກິດ​ການ­ທ່ອງ­ທ່ຽວ​ຂະ­ໜາດ​ນ້ອຍ​ເກີດ​ຂຶ້ນ ແລະ ໄດ້​ມີ​ບົດ­ບາດ​ສຳ­ຄັນ ໃນ​ການ​ພັດ­ທະ­ນາ​ເສດ­ຖະ­ກິດ​ໃນ​ຂົງ­ເຂດ​ນີ້ ກໍ​ຄື ພາຍ​ໃນ​ປະ­ເທດ.

    ທ່ານ​ນາງ ຣີ​ນາ ບິດ​ເຕີ ເອກ​ອັກ​ຄະ​ລັດ​ຖະ​ທູດ​ອາ​ເມ​ຣິ​ກາ ປະ­ຈຳ ສປປ ລາວ ກ່າວ​ວ່າ: ການ​ສົ່ງ­ເສີມ​ເສດ­ຖະ­ກິດ​ໃນ ສປປ ລາວ ແມ່ນ​ມີ​ຄວາມ​ສຳ­ຄັນ​ຕໍ່​ຍຸດ​ທະ​ສາດ ອິນ​ໂດ​ປາ​ຊີ​ຟິກ ແລະ ການ​ຮ່ວມ​ມື​ແບບ​ກວມ​ລວມ​ກັບ​ລັດ­ຖະ­ບານ ສປປ ລາວ ພວກ​ເຮົາ​ມີ​ຄວາມ​ພາກ­ພູມ​ໃຈ ໃນ​ການ​ນຳ​ສະ­ເໜີ​ຕົວ​ແບບ​ທີ່​ດີ​ຂອງ​ທຸ­ລະ​ກິດ​ການ­ທ່ອງ­ທ່ຽວ​ຢູ່ ສປປ ລາວ ເພື່ອ​ວ່າ​ບັນ­ດາ​ນັກ­ທຸ­ລະ­ກິດ​ໄວ​ໜຸ່ມ​ໃນ​ຂົງ­ເຂດ​ນີ້ ຈະ​ສະ­ມາດ​ຮຽນ​ຮູ້​ເອົາ​ປະ­ສົບ​ການ​ຈາກ ສປປ ລາວ ລວມ​ທັງ​ປະ­ສົບ​ການ​ການ​ຕ້ອນ­ຮັບ​ອັນ​ອົບ​ອຸ່ນ ແລະ ນຳ​ເອົາ​ແບບ­ຢ່າງ​ການ­ທ່ອງ­ທ່ຽວ​ແບບ​ອະ­ນຸ​ຮັກ ເຂົ້າ​ໄປ​ນຳ​ໃຊ້​ໃນ​ປະ­ເທດ​ຂອງ​ເຂົາ­ເຈົ້າ.

    ນອກ­ຈາກ​ນີ້ ບັນ­ດາ​ຜູ້​ເຂົ້າ​ຮ່ວມ​ໄດ້​ໄປ​ຢ້ຽມ­ຢາມ​ເບິ່ງ​ຕົວ​ຈິງ ເພື່ອ​ຮຽນ​ຮູ້​ບັນ­ດາ​ທັກ​ສະ​ຕ່າງໆ ເຊັ່ນ: ການ​ເຮັດ​ການ​ຕະ­ຫຼາດ​ຂອງ​ຜ້າ­ໄໝ​ຊົນ­ເຜົ່າ ການ​ດຳ­ເນີນ​ການ​ຂອງ​ພື້ນ​ທີ່​ຮັກ­ສາ​ສັດ­ປ່າ​ທີ່​ຖືກ­ຕ້ອງ ແລະ ການ​ຈັດ­ການ​ການ​ຄຸ້ມ​ຄອງ​ການ​ທ່ຽວ​ແບບ​ຜະ­ຈົນ​ໄພ ທີ່​ເປັນ​ມິດ​ຕໍ່​ສະ­ພາບ​ແວດ​ລ້ອມ ບັນ­ດາ​ຜູ້​ເຂົ້າ​ຮ່ວມ​ຍັງ​ໄດ້​ໄປ​ຢ້ຽມ​ຊົມ​ສະ­ຖານ­ທີ່​ທ່ອງ​ທ່ອງ​ທີ່​ສຳ­ຄັນ ລວມ​ທັງ​ຕາດ​ກວງ​ຊີ ວັດ​ຊຽງ​ທອງ ລວມ​ໄປ​ເຖິງ​ບັນ­ດາ​ຫົວ­ໜ່ວຍ​ການ​ດຳ­ເນີນ​ການ​ຂະ­ໜາດ​ນ້ອຍ ເຊັ່ນ: ສູນ Traditional Arts and Ethnology Center ແລະ ສະ­ຖານ­ທີ່​ຜະ­ລິດ​ເຄື່ອງ​ປັ້ນ­ດິນ­ເຜົາ Pottery House Lao Food.

ຂ່າວທີ່ກ່ຽວຂ້ອງ