ຂ່າວຫຼ້າສຸດ

U-12 ນະຄອນຫຼວງ ເຂົ້າ​ຮ່ວມ​ເຕະບານ ນາໆຊາດ ທີ່​ປະເທດ​ໄທ

335 13 ມ.ນ. 2019 ວົງຈອນກີລາ
U-12 ນະຄອນຫຼວງ ເຂົ້າ​ຮ່ວມ​ເຕະບານ ນາໆຊາດ ທີ່​ປະເທດ​ໄທ

  ທີມ​ນັກ​ເຕະ​ເຍົາວະ​ຊົນ ຮຸ່ນ​ອາຍຸ​ບໍ່​ເກີນ 12 ປີ ຫຼື U-12 ຕົວ​ແທນ​ຂອງ ນະຄອນຫຼວງ​ວຽງ​ຈັນ (ນວ) ຈຳນວນ 30 ຄົນ ໄດ້​ອອກ​ເດີນທາງ​ເພື່ອ​ເຂົ້າ​ຮ່ວມ​ແຂ່ງຂັນ​ເຕະບານ ຢູ-12 ນາໆຊາດ ທີ່​ນະຄອນຫຼວງ​ບາງກອກ ປະເທດ​ໄທ ເປັນ​ທີ່​ຮຽບ​ຮ້ອຍ​ແລ້ວ ໃນ​ວັນ​ທີ 11 ມີນາ 2019 ຜ່ານ​ມາ ທີ່​ສະໜາມ​ບິນ​ສາກົນ​ວັດ​ໄຕ ນວ ນຳພາ​ໂດຍ ທ່ານ ວຽງ​ສະຫວັນ ແສງ​ຈັນ ປະທານ​ສະຫະພັນ​ບານເຕະ ນວ ພ້ອມ​ດ້ວຍ​ຜູ້​ຈັດການ​ທີມ ຄະນະ​ຄູ​ຝຶກ ແລະ ນັກກີລາ ພໍ່​ແມ່​ຜູ້​ປົກຄອງ​ນັກກີລາ.

       ທ່ານ ວຽງ​ສະຫວັນ ແສງ​ຈັນ ກ່າວ​ວ່າ: ນັກກີລາ​ຊຸດ​ນີ້ ໄດ້​ມີ​ການ​ຫ້າງ​ຫາ​ກະກຽມ​ຝຶກ​ຊ້ອມ​ໜຶ່ງ​ເດືອນ​ເຕັມ ທີ່​ສະໜາມ​ກີລາ​ເຈົ້າ​ອາ​ນຸ​ວົງ  ໃນ​ເບື້ອງ​ຕົ້ນ​ມີ​ການ​ຄັດ​ເລືອກ​ນັກກີລາ ຈຳນວນ 30 ກວ່າ​ຄົນ ໃຫ້​ເຫຼືອ 20 ກວ່າ​ຄົນ ປັດຈຸບັນ​ສາມາດ​ເລືອກ​ໄດ້​ໃນ​ຈຳນວນ 21 ຄົນ ໃນ​ນັ້ນ ແມ່ນ​ມາ​ຈາກ 2 ສະໂມສອນ​ໃຫຍ່ ຄື: ສະໂມສອນ ລ້ານ​ຊ້າງ ຢູ​ໄນ​ເຕັດ ແລະ ສະໂມສອນ ວຽງ​ຈັນ ເອັບ​ທີ ໃນ​ໄລຍະ​ການ​ເກັບ​ຕົວ​ຝຶກ​ຊ້ອມ ນັກກີລາ​ກໍ​ໄດ້​ມີ​ການ​ລົງ​ສະໜາມ​ອຸ່ນ​ເຄື່ອງ​ທົດ​ສອບ​ຄວາມ​ສາມາດ​ທີມ​ເຖິງ 4 ນັດ ໃນ​ນັ້ນ ສາມາດ​ເອົາ​ຊະນະ​ໄດ້ 2 ນັດ ຄື ຊະນະ ທີມ​ລ້ານ​ຊ້າງ ຢູ​ໄນ​ເຕັດ 4-1 ປະຕູ ຊະນະ ທີມ​ວຽງ​ຈັນ ເອັບ​ທີ 5-3 ປະຕູ ສະເໝີ ທີມ​ບຸນ​ເກີດ ເອັບ​ຊີ 2-2 ປະຕູ ແລະ ເສຍ​ໃຫ້​ທີມ ເອ​ສຣາ ເອັບ​ຊີ 0-1 ປະຕູ ຜ່ານ​ການ​ທົດ​ສອບ​ນັກກີລາ​ພວກ​ເຮົາ​ໄດ້​ປະສົບ​ການ​ຢ່າງ​ຫຼວງຫຼາຍ ເຊື່ອ​ໝັ້ນ​ວ່າ​ທຸກ​ຄົນ​ຈະ​ສາມາດ​ສ້າງ​ຜົນງານ​ຍາດ​ເອົາ​ໄຊຊະນະ​ມາສູ່​ປະເທດ​ຊາດ ກໍ​ຄື ພໍ່​ແມ່​ປະຊາຊົນ​ຊາວ​ນະຄອນຫຼວງ​ວຽງ​ຈັນ.

        ການ​ແຂ່ງຂັນ​ເຕະບານ U-12 ນາໆຊາດ ທີ່​ນະຄອນຫຼວງ​ບາງກອກ ປະເທດ​ໄທ ຈັດ​ຂຶ້ນ​ລະຫວ່າງ​ວັນ​ທີ 12-14 ມີນາ 2019 ນີ້ ມີ 6 ປະເທດ​ເຂົ້າ​ຮ່ວມ ຈັດ​ແບ່ງ​ອອກ​ເປັນ 2 ກຸ່ມ ແຕ່​ລະ​ກຸ່ມ​ແຂ່ງຂັນ​ພົບ​ກັນ​ໝົດ​ຄັດ​ເອົາ​ທີ 1-2 ຜ່ານ​ເຂົ້າ​ໄປ​ຫຼິ້ນ​ໃນ​ຮອບ​ຕໍ່​ໄປ ສຳລັບ​ກຸ່ມ ເອ ນະຄອນຫຼວງ​ວຽງ​ຈັນ ຕາງໜ້າ ​ສປປ ລາວ ຍີ່ປຸ່ນ ແລະ ​ສສ ຫວຽນ​​າມ ສ່ວນ​ກຸ່ມ ບີ ໄທ ເຈົ້າພາບ ຮົງ​ກົງ ແລະ ອັງກິດ.

ຂ່າວທີ່ກ່ຽວຂ້ອງ