ຂ່າວຫຼ້າສຸດ

ຣັກ​ບີ້ ຄັດ​ເລືອກ​ນັກກີລາ ກຽມ​ເຂົ້າ​ຮ່ວມ ຄາວ​ລູນ ເຟັດ 10 ຄົນ ທີ່​ຮົງ​ກົງ

299 14 ມ.ນ. 2019 ວົງຈອນກີລາ
ຣັກ​ບີ້ ຄັດ​ເລືອກ​ນັກກີລາ ກຽມ​ເຂົ້າ​ຮ່ວມ ຄາວ​ລູນ ເຟັດ 10 ຄົນ ທີ່​ຮົງ​ກົງ

     ອີງ​ຕາມ​ການ​ໃຫ້​ສຳພາດ​ຂອງ ທ່ານ ປີ​ຊາ ວົງ​ເດືອນ​ເພັງ ຜູ້​ຈັດການ​ຝ່າຍ​ພັດທະນາ​ກີລາ​ຣັກ​ບີ້ ສະ ຫະ​ພັນ​ກີລາ​ຣັກ​ບີ້​ແຫ່ງ​ຊາດ​ລາວ ທັງ​ເປັນ​ຫົວໜ້າ​ຄູ​ຝຶກ​ທີມ​ຣັກ​ບີ້​ຍິງ ສະໂມສອນ ພະຍາ​ນາກ​ລາວ ໃຫ້​ຊາບ​ວ່າ: ປັດຈຸບັນ​ພວກ​ເຮົາ​ໄດ້​ນຳພາ​ນັກກີລາ​ຣັກ​ບີ້​ຍິງ ສະໂມສອນ ພະຍາ​ນາກ​ລາວ ຝຶກ​ຊ້ອມ​ເປັນ​ປົກກະຕິ ໂດຍ​ມີ​ນັກກີລາ​ມາ​ຮ່ວມ​ຄັດ​ເລືອກ​ຈຳນວນ​ຫຼາຍ ສະນັ້ນ ພວກ​ເຮົາ​ຈຶ່ງ​ໄດ້​ມີ​ການ​ຄັດ​ເລືອກ​ເອົາ​ໄວ້​ກ່ອນ ຈຳນວນ 16 ຄົນ ມາ​ຝຶກ​ຊ້ອມ​ໃຫ້​ເຂົ້າ​ລະບົບ ກ່ອນ​ຈະ​ຄັດ​ເລືອກ​ໃຫ້​ເຫຼືອ​ພຽງ 13 ຄົນ​ສຸດ​ທ້າຍ ໃນ​ທ້າຍ​ເດືອນ​ມີນາ​ນີ້ ເພື່ອ​ກຽມ​ຄວາມ​ພ້ອມ​ສົ່ງ​ເຂົ້າ​ຮ່ວມ​ການ​ແຂ່ງຂັນ​ກີລາ​ຣັກ​ບີ້​ຍິງ ລາຍການ ຄາວ​ລູນ ເຟັດ 10 ຄົນ 2019 ທີ່​ເຂດ​ປົກຄອງ​ພິເສດ​ຮົງ​ກົງ ເປັນ​ເຈົ້າພາບ ໃນ​ວັນ​ທີ 3 ເມສາ​ນີ້ ແລະ ໃນ​ລາຍການ​ນີ້ ພວກ​ເຮົາ​ຫວັງ​ທີ່​ຈະ​ສ້າງ​ຜົນງານ​ໃຫ້​ອອກ​ມາ​ດີ​ທີ່​ສຸດ ໂດຍ​ມີ​ເປົ້າ​ໝາຍ​ຄື​ການ​ຄວ້າ​ແຊັມ​ກັບ​ມາ​ບ້ານ​ເກີດ ເປັນ​ຂອງຂວັນ​ໃຫ້​ກັບ​ກອງ​ເຊຍ​ກີລາ​ຊາວ​ລາວ​ເຮົາ.

    ສຳລັບ​ການ​ໄປ​ແຂ່ງຂັນ​ຣັກ​ບີ້​ລາຍການ​ດັ່ງກ່າວ ທີ່​ເຂດ​ປົກຄອງ​ພິເສດ​ຮົງ​ກົງ ເປັນ​ເຈົ້າພາບ ສະຫະ ພັນ​ກີລາ​ຣັກ​ບີ້​ແຫ່ງ​ຊາດ​ລາວ ແມ່ນ​ຈະ​ສົ່ງ​ເຂົ້າ​ຮ່ວມ​ທັງ​ໝົດ 3 ທີມ ປະກອບ​ມີ: ທີມ​ຣັກ​ບີ້​ຍິງ​ສະໂມສອນ ພະຍາ​ນາກ​ລາວ ທີມ​ລວມ​ດາວ​ຮຸ່ງ​ຊາຍ ຈາກ​ສະໂມສອນ​ທົ່ວ ​ສປປ ລາວ ແຂ່ງຂັນ​ວັນ​ທີ 4 ມີນາ 2019 ແລະ ທີມ​ຊາດ​ຍິງ ຮຸ່ນ​ອາຍຸ​ບໍ່​ເກີນ 16 ປີ ແຂ່ງຂັນ​ໃນ​ວັນ​ທີ 3-6 ມີນາ 2019 ໂດຍ​ໄດ້​ຮັບ​ການ​ສະໜັບສະໜູນ​ຫຼັກ​ຈາກ ບໍລິສັດ DAC ທີ່​ເປັນ​ບໍລິສັດ ທີ່​ໃຫ້ການ​ສະໜັບສະໜູນ​ສະຫະພັນ​ກີລາ​ຣັກ​ບີ້​ແຫ່ງ​ຊາດ​ລາວ ແລະ ບັນດາ​ສະໂມສອນ​ລາວ ທີ່​ອອກ​ເຄື່ອນ​ໄຫວ​ຢູ່​ຕ່າງປະເທດ ແລະ ພາຍ​ໃນ ມາ​ຕະຫຼອດ.

ຂ່າວທີ່ກ່ຽວຂ້ອງ