ຂ່າວຫຼ້າສຸດ

ອອກດຳລັດປັບໃໝຕໍ່ຜູ້ລະເມີດລະບຽບການ-ກົດໝາຍຄວບຄຸມຢາສູບ

76 14 ມີ.ນ. 2019 ຂ່າວໜ້າ​ໜຶ່ງ
ອອກດຳລັດປັບໃໝຕໍ່ຜູ້ລະເມີດລະບຽບການ-ກົດໝາຍຄວບຄຸມຢາສູບ

    ລັດ­ຖະ­ບານ​ໄດ້​ອອກ­ດຳ­ລັດ​ວ່າ​ດ້ວຍ​ການ​ປັບ​ໃໝ ແລະ ນຳ​ໃຊ້​ມາດ​ຕະ­ການ​ອື່ນ​ຕໍ່​ການ​ລະ­ເມີດ​ກົດ­ໝາຍ ແລະ ລະ­ບຽບ​ການ​ກ່ຽວ​ກັບ​ການ​ຄວບ​ຄຸມ​ຢາ­ສູບ ເພື່ອ​ກຳ­ນົດ​ອັດ­ຕາ​ການ​ປັບ​ໃໝ ແລະ ນຳ​ໃຊ້​ມາດ​ຕະ­ການ​ອື່ນ​ຕໍ່​ການ​ລະ­ເມີດ​ກົດ­ໝາຍ ແລະ ລະ­ບຽບ​ການ​ກ່ຽວ​ກັບ​ການ​ຄວບ​ຄຸມ​ຢາ­ສູບ ເພື່ອ​ເປັນ​ບ່ອນ​ອີງ​ໃຫ້​ເຈົ້າ​ໜ້າ­ທີ່​ຈັດ​ຕັ້ງ​ປະ­ຕິ­ບັດ​ການ​ປັບ​ໃໝ ແລະ ນຳ​ໃຊ້​ມາດ​ຕະ­ການ​ອື່ນ​ຕໍ່​ຜູ້​ລະ­ເມີດ​ຢ່າງ​ຖືກ­ຕ້ອງ ເປັນ​ເອກ​ກະ​ພາບ​ທົ່ວ​ປະ­ເທດ ແນ­ໃສ່​ເຮັດ​ໃຫ້­ການ​ດຳ­ເນີນ​ທຸ­ລະ​ກິດ​ຜະ­ລິດ​ຕະ​ພັນ​ຢາ­ສູບ​ຢ່າງ​ຖືກ­ຕ້ອງ​ຕາມ​ກົດ­ໝາຍ ແລະ ລະ­ບຽບ​ການ​ໃຫ້​ພົນ­ລະ­ເມືອງ​ມີ​ສຸ­ຂະ­ພາບ​ເຂັ້ມ­ແຂງ ຫຼຸດ­ຜ່ອນ​ການ​ໃຊ້​ຢາ­ສູບ ແລະ ປະ­ກອບ​ເຂົ້າ​ໃນ​ການ​ປົກ​ປັກ​ຮັກ­ສາ ແລະ ພັດ­ທະ­ນາ​ປະ­ເທດ​ຊາດ ເຊິ່ງ​ດຳ­ລັດ​ສະ­ບັບ​ນີ້​ປະ­ກອບ​ມີ 5 ໝວດ 22 ມາດ­ຕາ ມີ​ຜົນ​ບັງ­ຄັບ​ໃຊ້​ນັບ​ແຕ່​ວັນ​ທີ 15 ມີ­ນາ 2019 ເປັນ­ຕົ້ນ​ໄປ.

    ເພື່ອ​ໃຫ້​ບັນ­ດາ​ສື່​ມວນ​ຊົນ​ກຳ​ໄດ້​ເນື້ອ​ໃນ​ຂອງ​ດຳ­ລັດ​ດັ່ງ­ກ່າວ ເພື່ອ​ໄປ​ນຳ​ສະ­ເໜີ​ຕໍ່­ໃຫ້​ສັງ­ຄົມ ກໍ​ຄື ຜູ້​ປະ­ກອບ​ການ​ຜະ­ລິດ ແລະ ຈຳ­ໜ່າຍ​ຢາ­ສູບ​ໄດ້​ຮັບ​ຮູ້​ເຖິງ​ມາດ​ຕະ­ການ​ປັບ​ໃໝ ແລະ ນຳ​ໃຊ້​ມາດ​ຕະ­ການ​ຕໍ່​ຜູ້​ລະ­ເມີດ ໂດຍ​ສະ­ເພາະ ຕໍ່​ກັບ 8 ພຶດ­ຕິ​ກຳ​ຕໍ່​ການ​ລະ­ເມີດ ເປັນ­ຕົ້ນ ການ​ບໍ່​ພິມ​ສະ­ຫຼາກ ແລະ ຄຳ­ເຕືອນ​ສຸ­ຂະ­ພາບ​ໃສ່​ວັດ­ຖຸ​ຫຸ້ມ​ຫໍ່ ການ​ໂຄ­ສະ­ນາ​ຜະ­ລິດ​ຕະ​ພັນ​ຢາ­ສູບ ການ​ບໍ່​ຕິດ​ປ້າຍ​ໃນ​ສະ­ຖານ­ທີ່​ຫ້າມ​ສູບ ການ​ສູບ­ຢາ​ໃນ​ສະ­ຖານ­ທີ່​ຫ້າມ​ສູບ­ຢາ ການ​ຂາຍ ຫຼື ຈຳ­ໜ່າຍ​ຜະ­ລິດ​ຕະ​ພັນ​ຢາ­ສູບ​ໃນ​ສະ­ຖານ­ທີ່​ເກືອດ​ຫ້າມ ການ​ຂາຍ​ຢາ­ສູບ​ໃຫ້​ເດັກ ຊື້ ຫຼື ຂາຍ​ຜະ­ລິດ​ຕະ​ພັນ​ຢາ­ສູບ ການ​ຂາຍ​ຜະ­ລິດ​ຕະ​ພັນ​ຢາ­ສູບ​ດ້ວຍ​ເຄື່ອງ​ຈັກ​ອັດ­ຕະ­ໂນ­ມັດ ການ​ຜະ­ລິດ​ນຳ​ເຂົ້າ ຈຳ­ໜ່າຍ ຫຼື ຂາຍ​ຢາ­ສູບ​ທີ່​ບັນ­ຈຸ​ຕ່ຳ​ກວ່າ 20 ກອກ ຢາ​ຊອງ ຫຼື ຢາ​ກະ​ປ໋ອງ​ເປັນ​ກອກ ແລະ ຜະ­ລິດ​ຕະ​ພັນ​ຢາ­ສູບ​ນອກ​ລະ­ບົບ​ທຸກ​ຮູບ​ການ ຕໍ່​ກັບ​ການ​ລະ­ເມີດ​ດັ່ງ­ກ່າວ​ແມ່ນ​ຈະ​ໄດ້​ມີ​ການ​ປັບ​ໃໝ.

    ກົມ​ອະ­ນາ­ໄມ ແລະ ສົ່ງ­ເສີມ​ສຸ­ຂະ­ພາບ ກະ­ຊວງ​ສາ­ທາ­ລະ­ນະ​ສຸກ ຮ່ວມ​ກັບ​ສະ​ມາ​ພັນ​ຄວບ​ຄຸມ​ຢາ­ສູບ​ອາ​ຊຽນ ແລະ ອົງ­ການ​ອະ­ນາ­ໄມ​ໂລກ ໄດ້​ຈັດ​ເຜີຍ­ແຜ່​ດຳ­ລັດ​ວ່າ​ດ້ວຍ​ການ​ປັບ​ໃໝ ແລະ ນຳ​ໃຊ້​ມາດ​ຕະ­ການ​ອື່ນ​ຕໍ່​ການ​ລະ­ເມີດ​ກົດ­ໝາຍ ແລະ ລະ­ບຽບ​ການ​ຄວບ​ຄຸມ​ຢາ­ສູບ ຈັດ​ຂຶ້ນ​ວັນ​ທີ 12 ມີ­ນາ 2019 ທີ່​ແຂວງ​ວຽງ​ຈັນ ໂດຍ​ເປັນ​ປະ­ທານ ແລະ ເຜີຍ­ແຜ່​ໂດຍ​ທ່ານ ບຸນ​ເພັງ ພິ­ລາ​ວົງ ຫົວ­ໜ້າ​ກົມ​ອະ­ນາ­ໄມ ແລະ ສົ່ງ­ເສີມ​ສຸ­ຂະ­ພາບ ທັງ​ເປັນ​ຫົວ­ໜ້າ​ກອງ​ເລ­ຂາ​ຄະ­ນະ​ກຳ­ມະ­ການ​ແຫ່ງ​ຊາດ ເພື່ອ​ຄວບ​ຄຸມ​ຢາ­ສູບ ມີ​ຕາງ­ໜ້າ​ອົງ­ການ​ອະ­ນາ­ໄມ​ໂລກ ສະ​ມາ​ພັນ​ຄວບ​ຄຸມ​ຢາ­ສູບ​ອາ​ຊຽນ ພ້ອມ​ດ້ວຍ​ສື່​ມວນ​ຊົນ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ