ຂ່າວຫຼ້າສຸດ

ຈະພັດທະນາແຫຼ່ງທ່ອງທ່ຽວຄົບວົງຈອນ ຢູ່ແຄມອ່າງນ້ຳງື່ມ I

237 14 ມ.ນ. 2019 ຂ່າວໜ້າ​ໜຶ່ງ
ຈະພັດທະນາແຫຼ່ງທ່ອງທ່ຽວຄົບວົງຈອນ ຢູ່ແຄມອ່າງນ້ຳງື່ມ I

    ໂຄງ­ການ​ພັດ­ທະ­ນາ​ແຫຼ່ງ​ທ່ອງ​ທ່ຽວ​ຄົບ​ວົງ​ຈອນ​ຢູ່​ແຄມ​ອ່າງ​ນ້ຳ​ງື່ມ I ເມືອງ​ແກ້ວ​ອຸ­ດົມ ເຊິ່ງ​ເປັນ​ໂຄງ­ການ​ໜຶ່ງ​ທີ່​ນອນ​ຢູ່​ໃນ​ເປົ້າ​ໝາຍ​ການ​ພັດ­ທະ­ນາ​ຂອງ​ແຂວງ​ວຽງ​ຈັນ ເພື່ອ​ສ້າງ​ເປັນ​ເຂດ​ບໍ​ລິ​ການ­ທ່ອງ­ທ່ຽວ ສາ­ມາດ​ຮອງ​ຮັບ​ນັກ​ທ່ອງ​ທ່ຽວ​ພາຍ​ໃນ ແລະ ຕ່າງ­ປະ­ເທດ​ໃນ​ຫຼາຍ​ລະ­ດັບ ທັງ​ເປັນ​ໂຄງ­ການ​ທີ່​ສ້າງ​ແຫຼ່ງ​ລາຍ​ຮັບ​ເຂົ້າ​ງົບ­ປະ­ມານ​ຂອງ​ເມືອງ ແຂວງ ພ້ອມ​ທັງ​ສ້າງ​ວຽກ​ເຮັດ​ງານ​ທຳ ແລະ ສ້າງ​ລາຍ​ໄດ້​ໃຫ້​ແກ່​ປະ­ຊາ­ຊົນ​ໃນ​ເຂດ​ທ້ອງ­ຖິ່ນ.

    ສຳ­ລັບ​ໂຄງ­ການ​ດັ່ງ­ກ່າວ ອົງ­ການ​ປົກ­ຄອງ​ແຂວງ​ວຽງ​ຈັນ​ໄດ້​ອະ­ນຸ­ມັດ​ໃຫ້​ບໍ­ລິ­ສັດ ຈີນ​ຊີງ​ຫາວ​ຢູນ ການ​ຄ້າ​ຂາ​ເຂົ້າ-ຂາ​ອອກ ຈຳ­ກັດ ເປັນ​ຜູ້​ດຳ­ເນີນ​ການ​ສຶກ​ສາ-ສຳ​ຫຼວດ​ອອກ​ແບບ​ຄວາມ​ເປັນ​ໄປ​ໄດ້​ຂອງ​ໂຄງ­ການ​ພັດ­ທະ­ນາ ໃນ​ເນື້ອ­ທີ່ 20 ເຮັກ­ຕາ ການ​ສຶກ​ສາ-ສຳ​ຫຼວດ​ແມ່ນ​ກຳ­ນົດ​ເວ­ລາ 12 ເດືອນ ພາຍ­ຫຼັງ​ທີ່​ມີ​ການ​ລົງ​ນາມ​ຮ່ວມ​ກັນ​ລະ­ຫວ່າງ​ແຂວງ​ກັບ​ບໍ­ລິ­ສັດ.

    ພິ­ທີ​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ ເພື່ອ​ສຶກ​ສາ​ຄວາມ​ເປັນ​ໄປ​ໄດ້ ແລະ ສຳ​ຫຼວດ​ອອກ​ແບບ​ໂຄງ­ການ​ພັດ­ທະ­ນາ​ແຫຼ່ງ​ທ່ອງ​ທ່ຽວ​ຄົບ​ວົງ​ຈອນ ຢູ່​ແຄມ​ອ່າງ​ນ້ຳ​ງື່ມ I ເມືອງ​ແກ້ວ​ອຸ­ດົມ ແຂວງ​ວຽງ​ຈັນ ຈັດ​ຂຶ້ນ ວັນ​ທີ 11 ມີ­ນາ 2019 ຢູ່​ແຂວງ​ວຽງ​ຈັນ ຮ່ວມ​ລົງ​ນາມ​ລະ­ຫວ່າງ​ທ່ານ ຄຳ​ສອນ ສູນ​ສະ​ຫວັດ ຮອງ​ຫົວ­ໜ້າ​ພະ​ແນກ​ແຜນ­ການ ແລະ ການ​ລົງ­ທຶນ​ແຂວງ​ວຽງ​ຈັນ ແລະ ທ່ານ ຈັງ​ໂຢ​ໝິງ ປະ­ທານ​ບໍ­ລິ­ສັດ ຈີນ​ຊີງ​ຫາວ​ຢູນ ການ​ຄ້າ​ຂາ​ເຂົ້າ-ຂາ​ອອກ ຈຳ­ກັດ ມີ​ທ່ານ ວີ​ດົງ ໄຊ​ຍະ​ສອນ ເຈົ້າ­ແຂວງ​ວຽງ​ຈັນ ບັນ­ດາ​ຫົວ­ໜ້າ​ພະ­ແນກ­ການ​ທີ່​ກ່ຽວ­ຂ້ອງ ຮອງ​ເຈົ້າ­ເມືອງ​ແກ້ວ​ອຸ­ດົມ ຮອງ​ປະ­ທານ​ບໍ­ລິ­ສັດ ແລະ ແຂກ​ຖືກ​ເຊີນ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ