Interpol ຈັບ​ກຸມ​ຜູ້​ຄ້າ​ອາວຸດ 560 ຄົນ ຢູ່​ໃນ​ອາ​ເມ​ຣິ​ກາ ລາ​ຕິນ

229 14 ມ.ນ. 2019 ຂ່າວຕ່າງປະເທດ
Interpol ຈັບ​ກຸມ​ຜູ້​ຄ້າ​ອາວຸດ 560 ຄົນ ຢູ່​ໃນ​ອາ​ເມ​ຣິ​ກາ ລາ​ຕິນ

    ອົງການ​ຕຳຫຼວດ​ອາຍາ​ສາກົນ (Interpol)  ແຈ້ງ​ໃຫ້​ຮູ້ເມື່ອ​ວັນ​ທີ 11 ມີນາ​ນີ້​ວ່າ ໄດ້​ຈັບ​ກຸມ​ເປົ້າ​ໝາຍ 560 ຄົນ ໃນ​ລະຫວ່າງ​ດຳເນີນ​ບັ້ນ​ກວາດ​ລ້າງ​ຄັ້ງ​ໃຫຍ່ ແຕ່​ວັນ​ທີ 22-28 ກຸມພາ ​ທີ່​ຜ່ານ​ມາ ໂດຍ​ແນໃສ່​ໄລ່​ລ່າ​ອາ​ສະ​ຍາ​ກອນ​ຄ້າ​ອາວຸດ ຢູ່​ໃນ 8 ປະເທດ ໃນ​ອາ​ເມ​ຣິ​ກາ ລາ​ຕິນ ອັນ​ປະກອບ​ມີ ເບ​ລິ​​ສ ໂກ​ລົມ​ບີ ​ກົສ​ຕາ​ຣີ​ກາ ແອ​​ລ​ຊາ​ລວາ​ດໍ ກົວ​ເຕ​ມາລາ ຮົງ​ດູ​​ຣັສ ເມັກ​ຊິກ ແລະ ປາ​ນາ​ມາ.

    ບັ້ນ​ກວາດ​ລ້າງ​ດັ່ງກ່າວ​ມີ​ຊື່ວ່າ “Trigger V” ດ້ວຍ​ການ​ປະສານ​ສົມທົບ​ຂອງ​ກອງ​ກຳລັງ ຕຳຫຼວດ ດ່ານ​ພາສີ ພາກສ່ວນ​ເຂົ້າ-ອອກ​ເມືອງ ແລະ ​ກອງທັບ​ຂອງ​ປະເທດ​ເຫຼົ່ານັ້ນ ໂດຍ​ໄດ້​ສ້າງ ຈຸດ​ກວດ​ຂຶ້ນ​ມາ 42.000 ຈຸດ ທັງ​ຢູ່​ເທິງ​ໜ້າດິນ ທະເລ ແລະ​ ທ້ອງຟ້າ.

    ໃນ​ບັ້ນ​ກວາດ​ລ້າງ​ດັ່ງກ່າວ Interpol ຢຶດ​ປືນ​ປະເພດ​ຕ່າງໆ​ໄດ້ 857 ກະບອກ ກະ​ສູນ​ປືນ  40.000 ລູກ ລະເບີດ 20 ໜ່ວຍ ດິນ​ລະເບີດ ຊຸດ​ຕຳຫຼວດ ແລະ ​ຊຸດ​ທະຫານ ຈຳນວນ​ໜຶ່ງ.

 

ຂ່າວທີ່ກ່ຽວຂ້ອງ