ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 14/03/2019

124 14 ມີ.ນ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ຈະ​ພາ​ທ່ານ​ໄປ​ຮູ້­ຈັກ​ກ່ຽວ​ກັບ​ນະ­ໂຍ­ບາຍ​ເງິນ­ເດືອນ​ເທົ່າ​ທຽມ​ກັນ ລະ­ຫວ່າງ​ເພດ​ຢູ່​ປະ­ເທດ ໄອ​ແລນ ແລະ ເປົ້າ​ໝາຍ​ຫຼຸດ​ຈຳ­ນວນ​ການ​ຂ້າ​ຕົວ​ຕາຍ​ທີ່​ຍີ່­ປຸ່ນ.

    ທີ່ ໄອ​ແລນ: ຂ່າວ​ນີ້​ອ່າວ​ເກົ່າ ແຕ່​ເຂົ້າ­ກັນ​ດີ​ກັບ​ບັນ­ຍາ­ກາດ​ວັນ​ແມ່­ຍິງ​ສາ­ກົນ 8 ມີ­ນາ ເລື່ອງ​ມີ​ຢູ່​ວ່າ ລັດ​ຖະ​ສະ­ພາ​ປະ­ເທດ ໄອ​ແລນ ຢູ່​ເຂດ​ເອີ​ຣົບ​ເໜືອ ໄດ້​ຮັບ­ຮອງ​ເອົາ​ກົດ­ໝາຍ​ສະ­ບັບ​ໃໝ່ ທີ່​ກຳ­ນົດ​ໃຫ້​ປະ­ຕິ­ບັດ​ການ​ຈ່າຍ​ເງິນ­ເດືອນ​ເທົ່າ​ທຽມ​ກັນ ລະ­ຫວ່າງ​ຍິງ ແລະ ຊາຍ ກົດ­ໝາຍ​ທີ່​ວ່າ​ນີ້ ເລີ່ມ​ມີ​ຜົນ​ບັງ­ຄັບ​ໃຊ້​ນັບ​ແຕ່​ວັນ​ທີ 1 ມັງ­ກອນ ປີ 2018 ເປັນ­ຕົ້ນ​ໄປ ພາຍ​ໃຕ້​ກົດ­ໝາຍ​ດັ່ງ­ກ່າວ ບໍ­ລິ­ສັດ​ຫ້າງ​ຮ້ານ ຫຼື ໜ່ວຍ​ງານ​ຂອງ​ລັດ ຕ້ອງ​ຈ່າຍ​ເງິນ­ເດືອນ​ໃຫ້​ພະ­ນັກ­ງານ​ລູກ­ຈ້າງ​ຊາຍ-ຍິງ​ເທົ່າ​ທຽມ​ກັນ (ໃນ​ໜ້າ​ວຽກ​ອັນ​ດຽວ​ກັນ) ຫ້າມ​ຈ່າຍ​ໃຫ້​ຜູ້​ຊາຍ​ຫຼາຍ​ກວ່າ​ເດັດ­ຂາດ ກົດ­ໝາຍ​ໄດ້​ກຳ­ນົດ​ລະ­ອຽດ​ຕື່ມ​ວ່າ ບໍ­ລິ­ສັດ ຫຼື ໜ່ວຍ​ງານ​ຂອງ​ລັດ​ທີ່​ມີ​ພະ­ນັກ­ງານ​ແຕ່ 25 ຄົນ​ຂຶ້ນ​ໄປ ຕ້ອງ​ມີ​ໃບ​ຮັບ­ຮອງ​ຈາກ​ລັດ­ຖະ­ບານ ທີ່​ຢັ້ງ­ຢືນ​ການ​ຈ່າຍ​ຄ່າ​ແຮງ​ງານ​ແທນ​ຢ່າງ​ສະ­ເໝີ­ພາບ ລະ­ຫວ່າງ ຍິງ-ຊາຍ ບໍ່​ດັ່ງ­ນັ້ນ ຈະ​ໄດ້​ຮັບ​ໂທດ​ປັບ­ໄໝ ທາງ​ການ​ປະ­ເທດ​ໄອ​ແລນ ມີ​ເປົ້າ​ໝາຍ​ກຳ­ຈັດ​ຊ່ອງ​ຫວ່າງ​ການ​ຈ່າຍ​ເງິນ­ເດືອນ​ລະ­ຫວ່າງ​ເພດ ໃຫ້​ສຳ­ເລັດ​ຢ່າງ​ຂາດ​ຕົວ​ພາຍ​ໃນ​ປີ 2020 ປະ­ເທດ​ນີ້​ມີ​ປະ­ຊາ­ກອນ​ບໍ່​ຮອດ 4 ແສນ​ຄົນ ແຕ່​ແມ່­ຍິງ​ທີ່​ເປັນ​ສະ­ມາ­ຊິກ​ລັດ​ຖະ​ສະ­ພາ​ນັ້ນ ບັນ­ລຸ​ຕົວ​ເລກ 38% (ອົງ­ການ ສປຊ ກຳ­ນົດ​ໃຫ້​ແຕ່​ລະ​ປະ­ເທດ​ໃຊ້​ຄວາມ​ພະ­ຍາ­ຍາມ​ໃຫ້​ຈຳ­ນວນ ສສຊ ເພດ​ຍິງ ກວມ​ເອົາ​ຢ່າງ​ໜ້ອຍ 30% ຂອງ​ຈຳ­ນວນ ສສຊ ທັງ​ໝົດ).

    ທີ່ ຍີ່­ປຸ່ນ: ບັນ­ຫາ​ທ້າ​ທາຍ​ໜຶ່ງ​ທີ່​ທາງ​ການ​ຍີ່­ປຸ່ນ​ບໍ່​ລົດ​ລະ​ໃນ​ການ​ຊອກ​ຫາ​ທາງ​ແກ້​ໄຂ ກໍ​ຄື ເຮັດ​ໃຫ້​ອັດ­ຕາ​ການ​ຂ້າ​ຕົວ​ຕາຍ​ຂອງ​ຄົນ​ໃນ​ປະ­ເທດ​ຫຼຸດ​ລົງ​ຕາມ​ລຳ­ດັບ ຂ່າວ​ໜັງ­ສື­ພິມ​ລາວ​ພັດ­ທະ­ນາ ສະ­ບັບ​ວັນ​ທີ 26 ເດືອນ​ກໍ­ລະ­ກົດ 2017 ໃຫ້​ຮູ້​ວ່າ ພາຍ​ໃນ 10 ປີ ຍີ່­ປຸ່ນ​ຈະ​ເຮັດ​ໃຫ້​ອັດ­ຕາ​ການ​ຂ້າ​ຕົວ​ຕາຍ​ຫຼຸດ​ລົງ 30% ໂດຍ​ຈະ​ປັບ​ຫຼຸດ​ຊົ່ວ­ໂມງ​ເຮັດ​ວຽກ​ໜັກ​ລົງ ເຊິ່ງ​ເປັນ​ສາ­ເຫດ​ຕົ້ນ­ຕໍ​ຂອງ​ການ​ຂ້າ​ຕົວ​ຕາຍ ຕາມ​ສະ­ຖິ­ຕິ​ຍີ່­ປຸ່ນ​ມີ​ອັດ­ຕາ​ການ​ຂ້າ​ຕົວ​ຕາຍ​ສູງ​ທີ່​ສຸດ​ໃນ​ກຸ່ມ 7 ປະ­ເທດ (ຈີ​ເຈັດ-G7) ຂະ­ຫຍາຍ­ຕົວ​ດ້ານ​ອຸດ­ສາ­ຫະ­ກຳ​ຂອງ​ໂລກ ຄື ໃນ​ແຕ່​ລະ​ປີ​ມີ​ການ​ຂ້າ​ຕົວ​ຕາຍ​ຫຼາຍ​ກວ່າ 20 ພັນ​ຄົນ (ເທົ່າ​ກັບ 18,5 ຕໍ່​ປະ­ຊາ­ກອນ​ແຕ່​ລະ 1 ແສນ​ຄົນ) ພາຍ​ໃນ​ປີ 2025 ທາງ​ການ​ຍີ່­ປຸ່ນ ຕ້ອງ­ການ​ໃຫ້​ຕົວ​ເລກ​ນີ້​ຫຼຸດ​ລົງ​ຕ່ຳ​ກວ່າ 13,0 (ຈາກ 18,5) ໃນ​ປີ 2003 ຕົວ​ເລກ​ການ​ຂ້າ​ຕົວ​ຕາຍ ໄດ້​ພຸ່ງ​ຂຶ້ນ​ສູງ​ເປັນ​ປະ­ຫວັດ​ການ​ໃນ​ຍີ່­ປຸ່ນ ຄື​ມີ​ເຖິງ 34.427 ຄົນ ແຕ່​ກໍ​ຫຼຸດ​ລົງ​ເປັນ​ລຳ­ດັບ ໃນ​ປີ 2016 ຈຳ­ນວນ​ການ​ຂ້າ​ຕົວ​ຕາຍ​ແມ່ນ 21.897 ຄົນ ລັດ­ຖະ­ບານ​ຍີ່­ປຸ່ນ ໄດ້​ດຳ­ເນີນ​ມາດ​ຕະ­ການ​ຫຼຸດ​ຈຳ­ນວນ​ການ​ຂ້າ​ຕົວ​ຕາຍ ນັບ​ແຕ່​ປີ 2007 ເປັນ­ຕົ້ນ​ມາ ແລະ ມາດ​ຕະ­ການ​ດັ່ງ­ກ່າວ ໄດ້​ຮັບ​ການ​ທົບ​ທວນ​ທຸກໆ 5 ປີ ສາ​ເຫດ­ການ​ຂ້າ​ຕົວ​ຕາຍ​ຢູ່​ຍີ່­ປຸ່ນ ຕົ້ນ­ຕໍ​ແມ່ນ​ມາ​ຈາກ​ການ​ເຮັດ​ວຽກ​ໜັກ ແລະ ການ​ຄຸກ​ຄາມ​ໃຊ້​ງານ​ຈາກ​ນາຍ​ຈ້າງ​ນີ້​ຄື 2 ຂອດ​ບັນ­ຫາ​ທີ່​ທາງ​ການ​ຍີ່­ປຸ່ນ​ເລັ່ງ​ແກ້​ໄຂ ລັດ­ຖະ­ບານ​ໄດ້​ຈຳ­ກັດ​ບໍ່​ໃຫ້​ມີ​ການ​ໃຊ້​ງານ​ລ່ວງ​ເວ­ລາ​ເກີນ​ເດືອນ​ລະ 100 ຊົ່ວ­ໂມງ ແຕ່​ຫາງ​ສຽງ​ກໍ​ຍັງ​ບອກ​ວ່າ​ນັ້ນ​ຍັງ​ເປັນ​ຕົວ​ເລກ​ສູງ​ຫຼາຍ ໃນ​ເດືອນ​ພຶດ­ສະ­ພາ ປີ 2017 ກະ­ຊວງ​ແຮງ​ງານ​ຍີ່­ປຸ່ນ ໄດ້​ເປີດ­ເຜີຍ​ລາຍ​ຊື່​ບໍ­ລິ­ສັດ​ຫຼາຍ​ກວ່າ 300 ແຫ່ງ ທີ່​ໃຫ້​ພະ­ນັກ­ງານ​ເຮັດ​ວຽກ​ລ່ວງ​ເວ­ລາ​ຢ່າງ​ຜິດ​ກົດ­ໝາຍ ກໍ​ຄື ການ​ລະ­ເມີດ​ລະ­ບຽບ​ການ​ເຮັດ​ວຽກ​ອື່ນໆ.

ຂ່າວທີ່ກ່ຽວຂ້ອງ