ສຸກັນຍາຟາມ ເຂົ້າຮ່ວມໂຄງການ ເຮັດໃຫ້ການລ້ຽງງົວປະຢັດຕົ້ນທຶນ

183 14 ມ.ນ. 2019 ຂ່າວໜ້າ​ໜຶ່ງ
ສຸກັນຍາຟາມ ເຂົ້າຮ່ວມໂຄງການ ເຮັດໃຫ້ການລ້ຽງງົວປະຢັດຕົ້ນທຶນ

    ທ່ານ​ນາງ ສຸ​ກັນ­ຍາ ລາດ​ສົມ­ບັດ ເຈົ້າ​ຂອງ​ສຸ​ກັນ­ຍາ​ຟາມ ໄດ້​ຂຶ້ນ​ລາຍ​ງານ​ການ​ລ້ຽງ​ງົວ​ເປັນ​ສິນ­ຄ້າ ຕໍ່​ກອງ​ປະ­ຊຸມ​ສະ­ຫຼຸບ​ຕີ​ລາ­ຄາ​ວຽກ​ງານ​ກະ­ສິ­ກຳ-ປ່າ­ໄມ້ ແລະ ພັດ­ທະ­ນາ​ຊົນ­ນະ­ບົດ ປະ­ຈຳ​ປີ 2018 ແລະ ທິດ​ທາງ​ແຜນ­ການ​ປີ 2019 ວ່າ: ການ​ລ້ຽງ​ງົວ​ເປັນ​ກິດ­ຈະ­ກຳ​ໜຶ່ງ​ທີ່​ສາ­ມາດ​ສ້າງ​ລາຍ​ຮັບ​ໄດ້ ແລະ ຕົນ​ກໍ​ເປັນ​ບຸກ­ຄົນ​ທີ່​ໃຈ​ມັກ​ໃນ​ການ​ລ້ຽງ​ງົວ ພ້ອມ​ທັງ​ຄອບ­ຄົວ​ກໍ​ເປັນ​ນັກ​ລ້ຽງ­ສັດ ຈຶ່ງ​ຕັດ­ສິນ​ໃຈ​ສ້າງ​ຟາມ​ຂຶ້ນ​ທີ່​ເມືອງ​ສັງ​ທອງ ນະ­ຄອນ­ຫຼວງ​ວຽງ​ຈັນ ນັບ​ແຕ່​ປີ 2013 ເປັນ­ຕົ້ນ​ມາ ໃນ​ເນື້ອ­ທີ່​ດິນ 16 ເຮັກ­ຕາ ມີ​ງົວ 85 ໂຕ ເຊິ່ງ​ໄດ້​ລ້ຽງ​ພໍ່​ແມ່​ພັນ​ຜະ­ລິດ​ລູກ ແລະ ເກັບ​ຊື້​ງົວ​ຈ່ອຍ​ມາ​ທອມ​ຂາຍ.

    ໃນ​ໄລ­ຍະ​ທີ່​ຜ່ານ​ມາ ບັນ­ຫາ​ໃນ​ການ​ລ້ຽງ​ງົວ​ຕົ້ນ­ຕໍ​ແມ່ນ​ງົວ​ບໍ່​ມີ​ຫຍ້າ​ກິນ​ພຽງ­ພໍ ໂດຍ​ສະ­ເພາະ​ລະ­ດູ­ແລ້ງ ນັບ​ແຕ່​ເດືອນ​ທັນ­ວາ​ຫາ​ເດືອນ​ພຶດ­ສະ­ພາ ສັງ­ເກດ​ເຫັນ​ວ່າ​ງົວ​ຈະ​ຈ່ອຍ ແລະ ມັກ​ມີ​ພະ­ຍາດ​ເກີດ​ຂຶ້ນ ການ​ລ້ຽງ​ກໍ​ຍັງ​ປະ­ປ່ອຍ​ກະ​ແຈກ​ກະ­ຈາຍ ບໍ່​ມີ​ການ​ຮ່ວມ​ກຸ່ມ ບໍ່​ມີ​ໂອ­ກາດ​ເຂົ້າ​ເຖິງ​ແຫຼ່ງ​ຂໍ້​ມູນ​ຄວາມ​ຮູ້​ເຕັກ​ໂນ​ໂລ​ຊີ​ການ​ລ້ຽງ ແລະ ການ​ຕະ­ຫຼາດ ມາ​ຮອດ​ປີ 2018 ຟາມ​ຂອງ​ຂ້າ­ພະ­ເຈົ້າ ໄດ້​ເຂົ້າ​ຮ່ວມ​ໂຄງ­ການ​ຄຸນ​ນະ​ພາບ​ຊີ້ນ​ງົວ​ລາວ-ນີວ​ຊີ​ແລນ ເຊິ່ງ​ໃນ 1 ປີ­ຜ່ານ­ມາ ພາຍ­ຫຼັງ​ທີ່​ເຂົ້າ​ຮ່ວມ​ໂຄງ­ການ ກໍ​ໄດ້​ມີ​ການ​ຈັດ­ການ​ທົ່ງ​ຫຍ້າ​ລ້ຽງ​ງົວ​ທີ່​ເປັນ​ລະ­ບົບ ເຊັ່ນ: ມີ​ການ​ນຳ​ເອົາ​ດິນ​ໄປ​ກວດ ເລືອກ​ແນວ​ພັນ​ຫຍ້າ ແລະ ຖົ່ວ​ພືດ​ອາ­ຫານ​ສັດ​ທີ່​ເໝາະ​ສົມ​ກັບ​ດິນ ຫວ່ານ​ເມັດ​ພັນ​ຫຍ້າ​ດ້ວຍ​ອັດ­ຕາ​ທີ່​ຖືກ­ຕ້ອງ ເຊັ່ນ: ໃນ 1 ເຮັກ­ຕາ​ຈະ​ນຳ​ໃຊ້​ຫຍ້າ​ມູ​ລາ​ໂຕ້ 10 ກິ​ໂລ ແລະ ຖົ່ວ​ສະ​ໄຕ​ໂລ 3 ກິ​ໂລ ມີ​ການ​ໃຊ້​ປຸຍ​ຄອກ ຫຼື ຝຸ່ນ​ຊີ­ວະ​ພາບ​ຮອງ​ພື້ນ​ໃນ​ອັດ­ຕາ​ສວ່ນ 250 ກິ​ໂລ​ຕໍ່​ເຮັກ­ຕາ ມີ​ການ​ຄິດ­ໄລ່​ຈຳ­ນວນ​ງົວ​ໃຫ້​ເໝາະ​ສົມ​ກັບ​ຈຳ­ນວນ​ທົ່ງ​ຫຍ້າ​ທີ່​ປູກ ເພື່ອ​ຮັບ­ປະ­ກັນ​ການ​ນຳ​ໃຊ້​ທົ່ງ​ຫຍ້າ​ທີ່​ມີ​ປະ​ສິດ­ທິ​ຜົນ ສັກ​ຢາ​ກັນ​ພະ­ຍາດ​ສັດ​ໄປ​ຕາມ​ໂປຣ​ແກຣມ​ຢ່າງ​ເຂັ້ມ​ງວດ ມີ​ການ​ຕັດ​ຫຍ້າ​ຕາມ​ກຳ­ນົດ​ທຸກໆ 45 ວັນ ເພື່ອ​ຮັບ­ປະ­ກັນ​ຄຸນ​ນະ​ພາບ​ຂອງ​ຫຍ້າ ແລະ ຫຍ້າ​ທີ່​ຕັດ​ມາ​ແມ່ນ​ເຮັດ​ຫຍ້າ​ໝັກ​ໃສ່​ຖັງ​ໄວ້​ໃນ​ຍາມ​ຂາດ­ແຄນ.

    ສຳ­ລັບ​ການ​ລ້ຽງ​ງົວ​ພໍ່​ແມ່​ພັນ​ຜະ­ລິດ​ລູກ ໄດ້​ນຳ​ໃຊ້​ການ​ລ້ຽງ​ໃນ​ທົ່ງ​ຫຍ້າ​ທີ່​ມີ​ຮົ້ວ​ໄຟ­ຟ້າ ທີ່​ເຮັດ​ເປັນ​ລັອກ​ໃນ​ເນື້ອ­ທີ່ 1 ໄລ່​ຕໍ່​ລັອກ ລ້ຽງ​ແລ້ວ​ເຫັນ​ວ່າ­ການ​ລ້ຽງ​ແບບ​ນີ້ ແມ່ນ​ໄດ້​ຮັບ​ຜົນ​ສູງ ເພາະ​ສາ­ມາດ​ປະ­ຢັດ​ຕົ້ນ​ທຶນ​ດ້ານ​ອາ­ຫານ ສ່ວນ​ຮູບ​ແບບ​ງົວ​ທອມ​ກໍ​ໄດ້​ມີ​ແບບ­ແຜນ​ທີ່​ດີ​ກວ່າ​ເກົ່າ ເປັນ­ຕົ້ນ ນຳ​ໃຊ້​ງົວ​ພື້ນ­ເມືອງ​ທີ່​ມີ​ອາ­ຍຸ​ໜຶ່ງ​ປີ​ຫົກ​ເດືອນ​ຂຶ້ນ​ໄປ ເພື່ອ​ຮັບ­ປະ­ກັນ​ດ້ານ​ໂຄງ​ສ້າງ ມີ​ການ​ສັກ​ຢາ​ຖ່າຍ​ພະ­ຍາດ​ກ່ອນ​ຈະ​ເຂົ້າ​ຄອກ​ທອມ ມີ​ການ​ຕິດ­ຕາມ​ນ້ຳ­ໜັກ​ງົວ ໂດຍ​ການ​ຊັ່ງ​ນ້ຳ­ໜັກ​ທຸກ 2 ເດືອນ ເພື່ອ​ວາງ​ແຜນ​ໃນ​ການ​ຂາຍ​ອອກ ໃຊ້​ເວ­ລາ 3-4 ເດືອນ ຫຼື ງົວ​ໄດ້​ໂຄງ​ສ້າງ ຫຼື ໄດ້​ນ້ຳ­ໜັກ​ຊີ້ນ​ຕາມ​ຄວາມ​ຕ້ອງ­ການ​ຂອງ​ໂຮງ​ຂ້າ​ສັດ ໃນ​ນີ້ ການ​ທອມ​ໄດ້​ມີ​ການ​ນຳ​ໃຊ້​ອາ­ຫານ​ຄົບ​ສ່ວນ ເຊັ່ນ: ມັນ­ຕົ້ນ​ແຫ້ງ ຫຼື ຂີ້​ມັນ­ຕົ້ນ ຂີ້​ເບຍ ໃບ​ມັນ­ຕົ້ນ​ປະ­ສົມ​ໃຫ້​ກິນ ເຫັນ​ວ່າ​ງົວ​ພື້ນ­ເມືອງ​ລາວ​ຈະ​ມີ​ນ້ຳ­ໜັກ​ເພີ່ມ​ບໍ່​ຫຼຸດ 0,6 ກິ​ໂລ​ຕໍ່​ມື້ ຫຼື ໃຫ້​ຜົນ​ກຳ­ໄລ​ມື້​ລະ​ປະ­ມານ​ເກືອບ 9.000 ກີບ​ຕໍ່​ໂຕ ສະ­ນັ້ນ ຖ້າ​ເຮົາ​ເອົາ​ງົວ​ທອມ 30 ໂຕ​ຕໍ່ 3 ເດືອນ ກໍ​ຈະ​ໄດ້​ກຳ­ໄລ​ສຸດ­ທິ 24.113.000 ກີບ ແລະ 1 ປີ ງົວ​ທອມ 4 ຊຸດ ຈະ​ມີ​ລາຍ​ຮັບ 96 ລ້ານ​ກວ່າ​ກີບ ນອກ​ນີ້ ການ​ຈັດ​ເປັນ​ກຸ່ມ ປັດ­ຈຸ­ບັນ​ກຸ່ມ​ພວກ​ຂ້າ­ພະ­ເຈົ້າ​ມີ 10 ຄອບ­ຄົວ ທີ່​ເຮັດ​ການ​ສຳ­ພັນ​ການ​ຜະ­ລິດ​ຮ່ວມ​ກັນ ເຮັດ​ສັນ­ຍາ​ກັບ​ໂຮງ​ຂ້າ​ສັດ ເພື່ອ​ເກັບ​ຊື້​ງົວ​ທອມ ມີ​ສັນ­ຍາ​ໃນ​ການ​ເກັບ​ຊື້​ຄືນ​ໃນ​ລາ­ຄາ 22.000 ກີບ​ຕໍ່​ກິ​ໂລ.

ຂ່າວທີ່ກ່ຽວຂ້ອງ