ງານສັບປະດາແມ່ນ້ຳຂອງ-ແມ່ນ້ຳລ້ານຊ້າງ ຈັດໃຫ້ມີຫຼາຍກິດຈະກຳ

194 15 ມ.ນ. 2019 ຂ່າວໜ້າ​ໜຶ່ງ
ງານສັບປະດາແມ່ນ້ຳຂອງ-ແມ່ນ້ຳລ້ານຊ້າງ ຈັດໃຫ້ມີຫຼາຍກິດຈະກຳ

    ວັນ​ທີ 14 ມີ­ນາ 2019 ກົມ​ເສດ­ຖະ­ກິດ ກະ­ຊວງ​ການ​ຕ່າງ­ປະ­ເທດ ໃນ​ນາມ​ກອງ​ເລ­ຂາ​ແຫ່ງ​ຊາດ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ຮ່ວມ​ກັບ​ສະ­ຖານ­ທູດ​ຈີນ ປະ­ຈຳ​ລາວ ຈັດ​ສັບ­ປະ­ດາ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ​ຂຶ້ນ​ທີ່​ໂຮງ­ແຮມ​ດອນ​ຈັນ​ພາ​ເລດ ນະ­ຄອນ­ຫຼວງ​ວຽງ​ຈັນ ເປັນ​ປະ­ທານ​ຂອງ​ທ່ານ ທອງ​ຜ່ານ ສະ​ຫວັດ​ເພັດ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ທ່ານ ຈຽງ ຈາຍ​ຕົງ ເອກ​ອັກ​ຄະ​ລັດ​ຖະ​ທູດ​ຈີນ ປະ­ຈຳ​ລາວ ຜູ້­ຕາງ­ໜ້າ​ຈາກ​ສະ­ຖານ­ທູດ​ຂອງ​ສະ­ມາ­ຊິກ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ (ປະ­ເທດ​ກຳ­ປູ­ເຈຍ ຈີນ ລາວ ມຽນ​ມາ ໄທ ແລະ ຫວຽດ­ນາມ) ຕາງ­ໜ້າ​ຈາກ​ກະ­ຊວງ ນັກ­ຮຽນ-ນັກ​ສຶກ​ສາ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ເພື່ອ​ເປັນ​ການ​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ຜົນ​ຂອງ​ກອງ​ປະ­ຊຸມ​ຜູ້­ນຳ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ຄັ້ງ​ທີ 2 ເປັນ​ການ​ສະ­ເຫຼີມ­ສະ­ຫຼອງ ວັນ​ສ້າງ­ຕັ້ງ​ຂອບ​ການ​ຮ່ວມ​ມື​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ຄົບ­ຮອບ 3 ປີ ແລະ ເປັນ​ການ​ເຜີຍ­ແຜ່​ຄວາມ​ຮູ້​ກ່ຽວ​ກັບ​ຂອບ​ການ​ຮ່ວມ​ມື​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ​ໃຫ້​ບັນ­ດາ​ກະ­ຊວງ ຂະ­ແໜງ­ການ ສະ​ຖາ​ບັນ​ຄົ້ນ­ຄວ້າ ນັກ​ສຶກ​ສາ ສື່​ມວນ​ຊົນ ແລະ ແຂກ​ທີ່​ເຂົ້າ​ຮ່ວມ​ໄດ້​ຮັບ​ຮູ້​ເຂົ້າ­ໃຈ ກ່ຽວ​ກັບ​ຂອບ​ການ​ຮ່ວມ​ມື​ດັ່ງ­ກ່າວ​ໃຫ້​ກວ້າງ­ຂວາງ ແລະ ເລິກ­ເຊິ່ງ​ກວ່າ​ເກົ່າ ນອກ​ນີ້​ຍັງ​ເປັນ​ການ​ເພີ່ມ​ທະ­ວີ​ຮັດ​ແໜ້ນ​ການ​ພົວ­ພັນ​ຮ່ວມ​ມື​ແລກ­ປ່ຽນ​ວັດ­ທະ­ນະ­ທຳ ແລະ ຊຸກ­ຍູ້​ການ­ທ່ອງ­ທ່ຽວ​ລະ­ຫວ່າງ​ບັນ­ດາ​ປະ­ເທດ​ສະ­ມາ­ຊິກ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ​ຕື່ມ​ອີກ.

    ໃນ​ງານ​ສັບ­ປະ­ດາ​ຄັ້ງ​ນີ້ ປະ­ກອບ​ມີ​ຫຼາຍ​ກິດ­ຈະ­ກຳ ຄື: ພິ­ທີ​ປາ­ຖະ­ກະ­ຖາ​ກ່ຽວ​ກັບ​ໂອ­ກາດ ແລະ ສິ່ງ​ທ້າ​ທາຍ​ຂອງ​ຂອບ​ການ​ຮ່ວມ​ມື​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ການ​ແຂ່ງ­ຂັນ​ຮູບ​ພາບ​ຖ່າຍ​ກ່ຽວ​ກັບ​ວັດ­ທະ­ນະ­ທຳ ແລະ ເອ­ກະ­ລັກ​ຂອງ​ປະ­ເທດ​ສະ­ມາ­ຊິກ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ການ​ສາຍ­ຮູບ­ເງົາ​ສາ­ລະ​ຄະ­ດີ​ເລື່ອງ­ສັ້ນ​ກ່ຽວ​ກັບ​ວັດ­ທະ­ນະ­ທຳ ແລະ ການ­ທ່ອງ­ທ່ຽວ​ຂອງ​ປະ­ເທດ​ສະ­ມາ­ຊິກ ແຂ່ງ­ຂັນ​ກີ­ລາ​ບານ­ເຕະ​ມິດ​ຕະ​ພາ​ລະ­ຫວ່າງ​ກະ­ຊວງ​ການ​ຕ່າງ­ປະ­ເທດ ແລະ ບັນ­ດາ​ສະ­ຖານ­ທູດ​ປະ­ເທດ​ສະ­ມາ­ຊິກ.

ຂ່າວທີ່ກ່ຽວຂ້ອງ