ຍ້ອງຍໍຫົວໜ່ວຍທຸລະກິດ ທີ່ມອບອາກອນກຳໄລ 1% ໃຫ້ລັດ

201 15 ມ.ນ. 2019 ຂ່າວໜ້າ​ໜຶ່ງ
ຍ້ອງຍໍຫົວໜ່ວຍທຸລະກິດ ທີ່ມອບອາກອນກຳໄລ 1% ໃຫ້ລັດ

    ກະ­ຊວງ​ການ​ເງິນ ຈັດ​ພິ­ທີ​ຍ້ອງ­ຍໍ​ບໍ­ລິ­ສັດ​ຮັບ​ເໝົາ ທີ່​ມີ​ຜົນ­ງານ​ປະ­ກອບ­ສ່ວນ​ມອບ​ອາ­ກອນ​ກຳ­ໄລ 1% ຈາກ​ການ​ກໍ່­ສ້າງ​ໂຄງ­ການ​ສາຍ​ສົ່ງ-ສະ­ຖາ­ນີ ແລະ ເຂື່ອນ​ໄຟ­ຟ້າ​ຂອງ​ລັດ​ວິ​ສາ​ຫະ​ກິດ​ໄຟ­ຟ້າ​ລາວ (ຟຟລ) ປີ 2017 ແລະ 2018 ຂຶ້ນ​ວັນ​ທີ 13 ມີ­ນາ 2019 ຢູ່​ກະ­ຊວງ​ດັ່ງ­ກ່າວ ມອບ​ໂດຍ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ມີ​ບັນ­ດາ​ກົມ ຕາງ­ໜ້າ ຟຟລ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ບໍ­ລິ­ສັດ​ທີ່​ໄດ້​ຮັບ​ການ​ຍ້ອງ­ຍໍ​ຄັ້ງ​ນີ້ ມີ​ບໍ­ລິ­ສັດ Sinohydro Bureau 10 Co. Ltd ກໍ່­ສ້າງ​ເຂື່ອນ​ໄຟ­ຟ້າ​ນ້ຳ​ອູ 2 ແລະ ນ້ຳ​ອູ 5 (ມອບ​ປີ 2017) ບໍ­ລິ­ສັດ Sinohydro Corporation Co. Ltd ກໍ່­ສ້າງ​ເຂື່ອນ​ໄຟ­ຟ້າ​ນ້ຳ​ງື່ມ 3 ນ້ຳ​ຄານ 2 ນ້ຳ​ຄານ 3 ສາຍ​ສົ່ງ 230 ກິ​ໂລ​ໂວນ ນ້ຳ​ອູ 5 ແລະ ນ້ຳ​ອູ 6 (ມອບ​ປີ 2017) ບໍ­ລິ­ສັດ China National Heavy Machinery Corporation (CHMC) ກໍ່­ສ້າງ​ໂຄງ­ການ​ສາຍ​ສົ່ງ 230 ກິ​ໂລ​ໂວນ ນາ​ບົງ-ນ້ຳ​ງື່ມ 1-ຫີນ​ເຫີບ ໂຄງ­ການ​ສາຍ​ສົ່ງ 500 ກິ​ໂລ​ໂວນ ສາ­ລະ​ວັນ-ເຊ​ກອງ 2 ແລະ ໂຄງ­ການ​ເຂື່ອນ​ໄຟ­ຟ້າ​ນ້ຳ​ງື່ມ 4 (ມອບ​ປີ 2017 ແລະ 2018) ບໍ­ລິ­ສັດ China International Water & Electric Corp (CWE) ກໍ່­ສ້າງ​ໂຄງ­ການ​ສາຍ​ສົ່ງ 500 ກິ​ໂລ​ໂວນ ຊຽງ​ຂວາງ-ນາ​ຊາຍ​ທອງ (ມອບ​ປີ 2017) ແລະ ບໍ­ລິ­ສັດ Pinggao Group International Engineering Co. Ltd ກໍ່­ສ້າງ​ໂຄງ­ການ​ສາຍ​ສົ່ງ 230 ກິ​ໂລ​ໂວນ ເຊ​ຂະ​ໝານ 2-ເຊ​ກອງ 2 ແລະ ໂຄງ­ການ​ສາຍ​ສົ່ງ 115 ກິ​ໂລ​ໂວນ ຫ້ວຍ​ຊາຍ-ຜົ້ງ​ສາ­ລີ (ມອບ​ປີ 2018).

    ທ່ານ ພູ​ທະ­ນູ​ເພັດ ໄຊ​ສົມ­ບັດ ຫົວ­ໜ້າ​ກົມ​ສ່ວຍ​ສາ​ອາ­ກອນ ກ່າວ​ວ່າ: ສ່ວຍ​ສາ​ອາ­ກອນ​ເປັນ​ວຽກ​ງານ​ໜຶ່ງ​ທີ່​ສຳ­ຄັນ ໃນ​ການ​ເກັບ​ລາຍ​ຮັບ​ເຂົ້າ​ງົບ­ປະ­ມານ​ແຫ່ງ​ລັດ 2-3 ປີ­ຜ່ານ­ມາ ສາ­ມາດ​ເກັບ​ລາຍ​ຮັບ​ໄດ້ 10-11 ພັນ​ຕື້​ກວ່າ​ກີບ​ຕໍ່​ປີ ກວມ​ຫຼາຍ​ກວ່າ 60% ຂອງ​ລາຍ​ຮັບ​ແຫ່ງ​ຊາດ ແລະ ປະ­ມານ 8-9% ຂອງ​ລວມ​ຍອດ​ຜະ­ລິດ​ຕະ​ພັນ​ພາຍ​ໃນ ການ​ເກັບ​ອາ­ກອນ​ກຳ­ໄລ 1% ຂອງ​ມູນ​ຄ່າ​ຮັບ​ເໝົາ​ກໍ່­ສ້າງ​ໂຄງ­ການ​ສາຍ​ສົ່ງ-ສະ­ຖາ­ນີ ແລະ ເຂື່ອນ​ໄຟ­ຟ້າ​ຂອງ ຟຟລ ໄດ້​ເລີ່ມ​ແຕ່​ປີ 2017 ເປັນ­ຕົ້ນ​ມາ ຜ່ານ​ການ­ຈັດ­ຕັ້ງ​ປະ­ຕິ­ບັດ​ປີ 2017 ເກັບ​ລາຍ​ຮັບ​ໄດ້ 25,68 ລ້ານ​ໂດ​ລາ​ສະ­ຫະ­ລັດ ຈາກ 4 ບໍ­ລິ­ສັດ ລວມ 9 ໂຄງ­ການ ສ່ວນ​ປີ 2018 ໄດ້​ສືບ­ຕໍ່​ສ່ວນ​ທີ່​ເຫຼືອ 7 ບໍ­ລິ­ສັດ ລວມ 38 ໂຄງ­ການ ໃນ​ນີ້ 8 ໂຄງ­ການ​ເຫັນ​ດີ​ຈ່າຍ ເປັນ​ເງິນ 11.694.188 ໂດ​ລາ​ສະ­ຫະ­ລັດ ແຕ່​ຈ່າຍ​ຕົວ​ຈິງ​ມີ​ບໍ­ລິ­ສັດ CHMC ແລະ ບໍ­ລິ­ສັດ Pinggao ເປັນ​ເງິນ 2.914.000 ໂດ​ລາ ທີ່​ເຫຼືອ​ຈະ​ຈ່າຍ​ໃນ​ປີ 2019 ແລະ ຈຳ­ນວນ​ໜຶ່ງ​ຍັງ​ລໍ­ຖ້າ​ສັນ­ຍາ​ເງິນ​ກູ້​ມີ​ຜົນ​ປະ­ຕິ­ບັດ​ເສຍ​ກ່ອນ ສ່ວນ 30 ໂຄງ­ການ​ທີ່​ຍັງ​ເຫຼືອ 6 ບໍ­ລິ­ສັດ 10 ໂຄງ­ການ ແມ່ນ​ຢູ່​ໃນ​ຂັ້ນ​ຕອນ​ເຈລະ­ຈາ ຖ້າ​ເກັບ​ອາ­ກອນ​ກຳ­ໄລ 1% ຈະ​ໄດ້​ເງິນ 10.213.880,48 ໂດ​ລາ.

    ທ່ານ ສົມ​ດີ ດວງ​ດີ ກ່າວ​ວ່າ: ການ​ອາ­ກອນ​ກຳ­ໄລ 1% ອາດ​ຈະ​ບໍ່​ຈ່າຍ​ໄດ້​ເທື່ອ​ດຽວ ແຕ່​ສາ­ມາດ​ແບ່ງ​ຈ່າຍ​ໄດ້ ສະ­ນັ້ນ ເພື່ອ​ສະ­ໜັບ­ສະ­ໜູນ​ປະ­ກອບ­ສ່ວນ​ຊ່ວຍ​ລັດ­ຖະ­ບານ ຂໍ​ຮຽກ­ຮ້ອງ​ມາ​ຍັງ​ທຸກ​ພາກ­ສ່ວນ ໂດຍ​ສະ­ເພາະ ກົມ​ສ່ວຍ​ສາ​ອາ­ກອນ ຟຟລ ແລະ ບັນ­ດາ​ບໍ­ລິ­ສັດ​ຮັບ​ເໝົາ ຈົ່ງ​ໃຫ້­ການ​ຮ່ວມ​ມື​ໃນ​ການ​ປະ­ຕິ­ບັດ​ອາ­ກອນ​ກຳ­ໄລ 1% ຂອງ​ມູນ​ຄ່າ​ໂຄງ­ການ​ໃຫ້​ຄົບ​ຖ້ວນ​ກັບ​ທຸກ​ໂຄງ­ການ ສ່ວນ​ໂຄງ­ການ​ທີ່​ໄດ້​ລົງ​ນາມ​ສັນ­ຍາ​ແຕ່​ປີ 2018 ເປັນ­ຕົ້ນ​ມາ​ໃຫ້​ປະ­ຕິ­ບັດ​ໃຫ້​ສອດ­ຄ່ອງ​ຕາມ​ລະ­ບຽບ​ກົດ­ໝາຍ.

ຂ່າວທີ່ກ່ຽວຂ້ອງ