ຂ່າວຫຼ້າສຸດ

U-12 ນະຄອນຫຼວງ​ຍາດ​ໄດ້​ທີ 2 ເຕະບານ​ຊີງ​ແຊັມ​ນາໆຊາດ

66 15 ມີ.ນ. 2019 ວົງຈອນກີລາ
U-12 ນະຄອນຫຼວງ​ຍາດ​ໄດ້​ທີ 2 ເຕະບານ​ຊີງ​ແຊັມ​ນາໆຊາດ

    ການ​ແຂ່ງຂັນ​ນັດ​ຊີງ​ຊະນະ​ເລີດ​ລະຫວ່າງ U-12 ນະຄອນຫຼວງ​ວຽງ​ຈັນ ຕາງໜ້າ​ຈາກ ​ສປປ ລາວ ແລະ U-12 ທີມ​ຊາດ​ໄທ ໃນ​ລາຍການ Bangkok International Junior Thailand 2019 ຈັດ​ຂຶ້ນ​ວັນ​ທີ 13 ມີນາ 2019 ທີ່​ສະໜາມ​ກີລາ​ເຕະບານ ກອງ​ບັນຊາ​ການ​ທະຫານ​ໄທ ນະຄອນຫຼວງ​ບາງກອກ ປະເທດ​ໄທ ຜົນ​ການ​ແຂ່ງຂັນ​ປາກົດ​ວ່າ:ຕະຫຼອດ​ໄລຍະ​ການ​ແຂ່ງຂັນ​ທັງ​ສອງ​ທີມ​ສູ້​ກັນ​ໄດ້​ຢ່າງ​ດຸເດືອດ​ສູ​ສີ ແລະ ກ່ອນ​ຈະ​ໝົດ​ເວລາ 50 ນາທີ ເຫຼືອ​ພຽງ 5 ນາທີ ໃນ​ທ້າຍ​ເກມ ນັກ​ເຕະ​ນະຄອນຫຼວງ​ວຽງ​ຈັນ​ເຮັດ​ບານ​ພາດ​ຖືກ​ເຍົາວະ​ຊົນ​ທີມ​ຊາດ​ໄທ​ຍິງ​ແຊງ​ຂຶ້ນ​ນຳ 1-0 ປະຕູ ແລະ ເວລາ​ທີ່​ເຫຼືອ​ນະຄອນຫຼວງ​ວຽງ​ຈັນ​ບໍ່​ສາມາດ​ຕີ​ສະເໝີ​ໄດ້​ຈົບ​ເກມ ສົ່ງ​ຜົນ​ໃຫ້​ທີມ​ຊາດ​ໄທ​ເອົາ​ຊະນະ​ໄປ​ແບບ​ຫວຸດ​ຫວິດ 1-0 ປະຕູ ໄດ້​ຂັນ​ແຊັມ ແລະ ຫຼຽນ​ຄຳ​ໄປ​ຄອງ ສ່ວນ​ນະຄອນຫຼວງ​ວຽງ​ຈັນ ໄດ້​ພຽງ​ຫຼຽນ​ເງິນ ແລະ ຂັນ ອັນ​ດັບ​ທີ 2 ສ່ວນ​ທີ 3 ຕົກ​ປັນ​ຂອງ​ອັງກິດ ທີ 4 ຫວຽດນາມ ທີ 5 ຍີ່ປຸ່ນ ແລະ ທີ 6 ຮົງ​ກົງ.  

    ລາຍການ​ນີ້​ຈັດ​ຂຶ້ນ​ວັນ​ທີ 11-14 ມີນາ 2019 ເພື່ອ​ເປັນ​ການ​ສົ່ງເສີມ​ເຍົາວະ​ຊົນ​ແຕ່​ລະ​ຊາດ ໃຫ້​ມີ​ການ​ພັດທະນາ​ສາມາດ​ກ້າວ​ຂຶ້ນ​ໄປ​ຕິດ​ທີມ​ຊາດ​ຊຸດ​ໃຫຍ່​ໃນ​ອະນາຄົດ ໂດຍ​ມີ 6 ປະເທດ​ເຂົ້າ​ຮ່ວມ ແບ່ງ​ອອກ​ເປັນ 2 ກຸ່ມ ແຕ່​ລະ​ກຸ່ມ​ແຂ່ງຂັນ​ພົບ​ກັນ​ໝົດ​ຄັດ​ເລືອກ​ເອົາ​ທີມ​ທີ 1-2 ຜ່ານ​ເຂົ້າ​ໄປ​ຫຼິ້ນ​ໃນ​ຮອບ​ຕໍ່​ໄປ ບໍ່​ໄລ່​ລູກ​ໄດ້​ລູກ​ເສຍ ຖ້າ​ຫາກ 3 ທີມ​ໃນ​ກຸ່ມ​ໃດ​ໜຶ່ງ​ມີ​ຄະແນນ​ເທົ່າ​ກັນ ຕັດສິນ​ໃຫ້ 3 ທີມ​ນັ້ນ ດ່ວນ​ຈຸດ​ໂທດ​ທັນ​ທີ່ ເພື່ອ​ຄັດ​ເອົາ​ທີ 1-2 ທີມ ເຂົ້າ​ຮອບ​ຕາມ​ລະບຽບ ສ່ວນ​ທີມ​ທີ່​ຕົກ​ຮອບ​ຄັດ​ເລືອກ​ໄດ້​ຊີງ​ພຽງ​ອັນ​ດັບ​ທີ 5 ສຳລັບ​ກຸ່ມ​ເອ ປະກອບ​ມີ​ທີມ​ນະຄອນຫຼວງ​ວຽງ​ຈັນ ທີມ​ຫວຽດນາມ ແລະ ທີມ​ຍີ່ປຸ່ນ ສ່ວນ​ສາຍ​ບີ ເຈົ້າພາບ​ທີມ​ໄທ ທີມ​ຮົງ​ກົງ ແລະ ທີມ​ອັງກິດ ສ່ວນ​ຜົນງານ​ຂອງ​ທີມ​ເຍົາວະ​ຊົນ ນະຄອນຫຼວງ​ວຽງ​ຈັນ​ໃນ​ຮອບ​ຄັດ​ເລືອກ​ສາມາດ​ເອົາ​ຊະນະ​ຫວຽດນາມ 3-0 ປະຕູ ແລະ ຊະນະ​ຍີ່ປຸ່ນ 4-0 ປະຕູ ຜ່ານ​ເຂົ້າ​ຮອບ 4 ທີມ ໄປ​ເອົາ​ຊະນະ​ທີມ​ອັງກິດ 3-0 ປະຕູ ກ່ອນ​ໃນ​ນັດ​ຊີງ​ຊະນະ​ຈະ​ພາດ​ທ່າ​ຖືກ​ທີມ​ຊາດ​ໄທ​ແຊງ​ຊະນະ 1-0 ປະຕູ.

ຂ່າວທີ່ກ່ຽວຂ້ອງ