ຂ່າວຫຼ້າສຸດ

ຈັດ​ກິດຈະກຳ​ແຂ່ງຂັນ​ກີລາ​ເປ​ຕັງ​ຊີງ​ຂັນ​ຮອງ​ເຈົ້າ​ຄອງ

56 15 ມີ.ນ. 2019 ວົງຈອນກີລາ
ຈັດ​ກິດຈະກຳ​ແຂ່ງຂັນ​ກີລາ​ເປ​ຕັງ​ຊີງ​ຂັນ​ຮອງ​ເຈົ້າ​ຄອງ

    ທ່ານ ເຂັມ​ເພັດ ແພງ​ດວງ​ຈັນ ຫົວໜ້າ​ຄະນະ​ໂຄສະນາ ນະຄອນຫຼວງ​ວຽງ​ຈັນ (ນວ) ໄດ້​ກ່າວ​ວ່າ: ເນື່ອງ​ໃນ​ໂອກາດ​ສະເຫຼີມສະຫຼອງ​ວັນ​ສ້າງຕັ້ງ​ພັກ​ປະຊາຊົນ​ປະຕິວັດ​ລາວ ຄົບຮອບ 64 ປີ (22/3/1955-22/3/2019) ໃນ​ທ່າມກາງ​ບັນຍາກາດ​ທົ່ວ​ພັກ​ທົ່ວ​ປວງ​ຊົນ​ລາວ​ບັນດາເຜົ່າ​ພວມ​ເບີກບານ​ມ່ວນຊື່ນ ສ້າງ​ຄຳນັບ​ຮັບ​ຕ້ອນ​ວັນ​ດັ່ງກ່າວ​ຄະນະ​ໂຄສະນາ​ອົບຮົມ ນວ ຮ່ວມ​ກັບ​ອະດີດ​ພະນັກງານ​ການ​ນຳ​ຂອງ ນວ ຈັດ​ກິດຈະກຳ​ແຂ່ງຂັນ​ກີລາ​ເປ​ຕັງ ຊີງ​ຂັນ​ຮອງ​ເຈົ້າ​ຄອງ ນວ ເພື່ອ​ເປັນ​ການ​ປະກອບສ່ວນ​ເຮັດ​ໃຫ້​ວັນ​ສ້າງຕັ້ງ​ພັກ​ມີ​ຂະ​ບວນ​ການ ແລະ ເບີກບານ​ມ່ວນຊື່ນ ພ້ອມ​ກັນ​ນັ້ນ​ເພື່ອ​ແນໃສ່​ຄວາມ​ສາມັກຄີ​ລະຫວ່າງ​ຄະນະ​ນຳ ນວ ຜູ້​ທີ່​ຍັງ​ປະຈຳການ ແລະ ຜູ້​ທີ່​ເຂົ້າ​ບຳນານ​ແລ້ວ​ໃຫ້​ຮັດ​ແໜ້ນ​ຜູກ​ພັນ​ຫຼາຍ​ຂຶ້ນ​ກວ່າ​ເກົ່າ ອີກ​ດ້ານ​ໜຶ່ງ​ເພື່ອ​ສ້າງ​ຜົນງານ​ສ້າງ​ຂະ​ບວນ​ການ​ເພື່ອ​ຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ X ຂອງ​ພັກ ໂດຍ​ສະເພາະ​ມະຕິ​ຄັ້ງ​ທີ VI ຂອງ​ອົງຄະ​ນະ​ພັກ ນວ ເຊິ່ງ​ແມ່ນ​ໄລຍະ​ທ້າຍ​ການຈັດຕັ້ງ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມ ໃນ​ໄລຍະ 5 ປີ ໃນ​ປີ​ນີ້​ແມ່ນ​ຍັງ​ອີກ​ໜຶ່ງ​ປີ ຈະ​ຮອດ​ກອງ​ປະຊຸມ​ໃຫຍ່ ຄັ້ງ​ທີ VII ຂອງ​ອົງຄະ​ນະ​ພັກ ນວ ແລະ ຄັ້ງ​ທີ XI ຂອງ​ພັກ.

    ກິດຈະກຳ​ແຂ່ງຂັນ​ກີລາ​ດັ່ງກ່າວ​ໄດ້​ມີ​ຂຶ້ນ​ວັນ​ທີ 13 ມີນາ 2019 ທີ່​ບ້ານ​ໜອງ​ບົວທອງ​ເໜືອ ເມືອງ​ສີ​ໂຄດ​ຕະບອງ ມີ​ທ່ານ ສີ​ຫຸນ ສິດທິ​ລື​ໄຊ ຮອງ​ເຈົ້າ​ຄອງ ນວ ພ້ອມ​ດ້ວຍ​ຄະນະ​ປະຈຳ​ພັກ ຄະນະ​ພັກ ນວ ບັນດາ​ຮອງ​ເຈົ້າເມືອງ ຫົວໜ້າ​ພະແນກການ ພະນັກງານ​ບຳນານ ແລະ ພະນັກງານ​ວິຊາ​ການ​ກ່ຽວຂ້ອງ​ເຂົ້າ​ຮ່ວມ ເຊິ່ງ​ກິດຈະກຳ​ການ​ແຂ່ງຂັນ​ແບ່ງ​ອອກ​ເປັນ 2 ປະເພດ​ຄື:ປະເພດ​ທີມ​ອາວຸໂສ ແລະ ປະເພດ​ທີມ​ທົ່ວ​ໄປ ສຳລັບ​ລາງວັນ​ສາຍ​ທົ່ວ​ໄປ ທີ 1 ເງິນ​ລາງວັນ  1,3 ລ້ານ​ກີບ ພ້ອມ​ຂັນ ສ່ວນ​ລາງວັນ​ທີ 1 ທີມ​ອາວຸໂສ ເງິນ​ລາງວັນ  8 ແສນ​ກີບ ພ້ອມ​ຂັນ​ລາງວັນ.

ຂ່າວທີ່ກ່ຽວຂ້ອງ