ຂ່າວຫຼ້າສຸດ

ລາວ ແລະ ເຢຍລະມັນ ສືບຕໍ່ເພີ່ມທະວີຮ່ວມມືຫຼາຍດ້ານ

258 15 ມີ.ນ. 2019 ຂ່າວໜ້າ​ໜຶ່ງ
ລາວ ແລະ ເຢຍລະມັນ ສືບຕໍ່ເພີ່ມທະວີຮ່ວມມືຫຼາຍດ້ານ

    ໂດຍ​ຕອບ​ສະ­ໜອງ​ຕາມ​ຄຳ​ເຊື້ອ​ເຊີນ​ຂອງ​ທ່ານ​ນາງ ອັງ​ເກ​ລາ ແມກ​ເກລ ນາ­ຍົກ­ລັດ­ຖະ­ມົນ­ຕີ ແຫ່ງ ສາ­ທາ­ລະ­ນະ​ລັດ ສະ­ຫະ­ພັນ​ເຢຍ​ລະ​ມັນ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ຄະ­ນະ ໄດ້​ເດີນ­ທາງ​ຢ້ຽມ­ຢາມ​ເຢຍ​ລະ​ມັນ​ຢ່າງ​ເປັນ​ທາງ​ການ ໃນ​ວັນ​ທີ 12-13 ມີ­ນາ 2019 ເຊິ່ງ​ເປັນ​ການ​ຢ້ຽມ­ຢາມ​ຄັ້ງ​ປະ­ຖົມ​ມະ­ລຶກ​ຂອງ​ການ​ນຳ​ຂັ້ນ​ສູງ​ຂອງ​ລາວ ທີ່​ເຢຍ​ລະ​ມັນ ແລະ ເປັນ​ນິ­ມິດ​ໝາຍ​ອັນ​ສຳ­ຄັນ ໃນ​ການ​ເສີມ​ຂະ­ຫຍາຍ​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ອັນ​ດີ­ງາມ ລະ­ຫວ່າງ ລາວ ແລະ ເຢຍ​ລະ​ມັນ ໃຫ້​ເຂັ້ມ­ແຂງ ແລະ ແຕກ​ດອກ​ອອກ​ຜົນ​ຍິ່ງ​ຂຶ້ນ.

    ໃນ​ວັນ​ທີ 13 ມີ­ນາ​ນີ້ ພາຍ­ຫຼັງ​ພິ­ທີ​ຕ້ອນ­ຮັບ​ຢ່າງ​ເປັນ​ທາງ​ການ​ຢ່າງ​ສົມ​ກຽດ ທີ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ເຢຍ​ລະ​ມັນ ທ່ານ ທອງ​ລຸນ ສີ​ສຸ​ລິດ ໄດ້​ພົບ​ປະ​ສອງ​ຝ່າຍ​ກັບ​ທ່ານ​ນາງ ອັງ​ເກ​ລາ ແມກ​ເກລ ການ​ພົບ​ປະ​ໄດ້​ດຳ­ເນີນ​ໄປ​ພາຍ​ໃຕ້​ບັນ­ຍາ­ກາດ​ອັນ​ສະ­ໜິດ­ສະ­ໜົມ ແລະ ສ້າງ­ສັນ ສອງ​ຝ່າຍ​ໄດ້​ຕີ​ລາ­ຄາ​ສູງ​ຕໍ່​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ທີ່​ດີ​ທີ່​ມີ​ມາ​ຍາວ​ນານ​ລະ­ຫວ່າງ​ສອງ​ປະ­ເທດ ນັບ​ແຕ່​ສອງ​ປະ­ເທດ​ໄດ້​ສ້າງ­ຕັ້ງ​ສາຍ​ພົວ­ພັນ​ການ​ທູດ​ນຳ​ກັນ ໃນ​ວັນ​ທີ 31 ມັງ­ກອນ 1958 ເປັນ­ຕົ້ນ​ມາ ການ​ຊ່ວຍ­ເຫຼືອ​ຂອງ​ເຢຍ​ລະ​ມັນ​ແກ່​ລາວ ແມ່ນ​ສຸມ​ໃສ່​ສອງ​ຂະ­ແໜງ­ການ​ບຸ­ລິ­ມະ­ສິດ ຄື: ການ​ຮ່ວມ​ມື​ທາງ​ດ້ານ​ເຕັກ­ນິກ ຜ່ານ​ອົງ­ການ​ຮ່ວມ​ມື​ສາ­ກົນ ເພື່ອ​ການ​ພັດ­ທະ­ນາ​ເຢຍ​ລະ​ມັນ (GIZ) ແລະ ການ​ຮ່ວມ​ມື​ທາງ​ດ້ານ​ການ​ເງິນ ຜ່ານ​ທະ­ນາ­ຄານ​ສິນ​ເຊື່ອ ເພື່ອ​ການ​ພັດ­ທະ­ນາ​ເຢຍ​ລະ​ມັນ (KfW) ໂດຍ​ສອດ­ຄ່ອງ​ກັບ​ເປົ້າ​ໝາຍ​ລວມ​ຂອງ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ລັດ­ຖະ­ບານ​ລາວ ເປັນ­ຕົ້ນ ເນັ້ນ​ໃສ່​ການ​ພັດ­ທະ­ນາ​ຊົນ­ນະ­ບົດ ວຽກ​ງານ​ອາ­ຊີ­ວະ​ສຶກ​ສາ ການ​ພັດ­ທະ­ນາ​ຍຸດ​ທະ​ສາດ ການ​ເຕີບ​ໂຕ​ສີ­ຂຽວ (Green growth) ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ການ​ອະ­ນຸ​ຮັກ​ສິ່ງ­ແວ­ດລ້ອມ ກໍ່­ສ້າງ ແລະ ປັບ­ປຸງ​ເສັ້ນ­ທາງ​ຄົມ­ມະ­ນາ­ຄົມ ແລະ ສົ່ງ­ເສີມ​ທຸ­ລະ​ກິດ​ພາກ​ເອ­ກະ​ຊົນ ລວມ​ທັງ​ທຸ­ລະ​ກິດ​ຂະ­ໜາດ​ກາງ (SME) ແລະ ຈຸ​ລະ­ວິ​ສາ​ຫະ​ກິດ (MSME).

    ສຳ­ລັບ​ການ​ຊ່ວຍ­ເຫຼືອ​ໃນ​ປີ 2018-2020 ມີ​ມູນ​ຄ່າ​ສູງ​ເຖິງ 50 ລ້ານ​ເອີ​ໂຣ ໃນ​ນັ້ນ 10 ລ້ານ​ເອີ​ໂຣ ແມ່ນ​ຊ່ວຍ­ເຫຼືອ​ເພື່ອ​ບັນ­ເທົາ​ທຸກ ໃຫ້​ແກ່​ປະ­ຊາ­ຊົນ​ຜູ້​ປະ­ສົບ​ໄພ​ນ້ຳ​ຖ້ວມ​ຢູ່​ແຂວງ​ອັດ​ຕະ​ປື ແລະ ໃນ​ຂອບ​ເຂດ​ທົ່ວ​ປະ­ເທດ ໃນ​ໂອ­ກາດ​ນີ້ ທ່ານ​ນາ­ຍົກ­ລັດ­ຖະ­ມົນ­ຕີ​ເຮົາ​ໄດ້​ສະ­ແດງ​ຄວາມ​ຂອບ­ໃຈ ແລະ ຮູ້​ບຸນ­ຄຸນ​ຕໍ່​ການ​ຊ່ວຍ­ເຫຼືອ​ອັນ​ລ້ຳ​ຄ່າ​ຂອງ​ລັດ­ຖະ­ບານ ກໍ​ຄື ປະ­ຊາ­ຊົນ​ເຢຍ​ລະ​ມັນ​ໃຫ້​ແກ່​ລາວ​ໃນ​ໄລ­ຍະ​ຜ່ານ​ມາ ເຊິ່ງ​ເປັນ​ການ​ຊ່ວຍ­ເຫຼືອ​ທີ່​ມີ​ຜົນ​ປະ­ໂຫຍດ ແລະ ສອດ­ຄ່ອງ​ກັບ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຢູ່​ລາວ ຄຽງ​ຄູ່​ກັນ​ນັ້ນ ສອງ​ຝ່າຍ​ຍັງ​ໄດ້​ປຶກ­ສາ​ຫາ­ລື​ແຜນ­ການ​ຮ່ວມ​ມື​ໃນ­ຕໍ່­ໜ້າ ເປັນ­ຕົ້ນ​ແມ່ນ​ການ​ຮ່ວມ​ມື​ລະ­ຫວ່າງ​ສອງ​ກະ­ຊວງ​ການ​ຕ່າງ­ປະ­ເທດ ດ້ານ​ເສດ­ຖະ­ກິດ​ການ​ຄ້າ ການ​ລົງ­ທຶນ ການ​ສຶກ​ສາ ແລະ ອື່ນໆ ໃນ​ຄະ­ນະ​ດຽວ​ກັນ​ນັ້ນ ຝ່າຍ​ເຢຍ​ລະ​ມັນ​ຍັງ​ໄດ້​ຢືນ­ຢັນ​ທີ່​ຈະ​ສືບ­ຕໍ່​ເພີ່ມ​ການ​ຊ່ວຍ­ເຫຼືອ ໃນ​ການ​ພັດ­ທະ­ນາ​ກະ­ສິ­ກຳ ແລະ ອຸດ­ສາ­ຫະ­ກຳ​ປຸງ​ແຕ່ງ ເພື່ອ​ປະ­ກອບ­ສ່ວນ​ຊ່ວຍ­ເຫຼືອ​ລາວ​ໃຫ້​ຫຼຸດ​ພົ້ນ​ອອກ​ຈາກ​ສະ­ຖາ­ນະ​ພາບ​ດ້ອຍ​ພັດ­ທະ­ນາ ແລະ ບັນ­ລຸ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ​ເທື່ອ​ລະ​ກ້າວ ນອກ­ຈາກ​ນັ້ນ ສອງ​ຝ່າຍ​ຍັງ​ໄດ້​ແລກ­ປ່ຽນ​ທັດ­ສະ­ນະ​ກ່ຽວ​ກັບ​ບັນ­ຫາ​ພາກ​ພື້ນ ແລະ ສາ­ກົນ ເຊິ່ງ​ຕ່າງ​ຝ່າຍ​ຕ່າງ​ມີ​ຄວາມ​ສົນ­ໃຈ ແລະ ມີ​ຜົນ​ປະ­ໂຫຍດ​ຮ່ວມ​ກັນ ໃນ​ໂອ­ກາດ​ດຽວ​ກັນ​ນີ້ ທ່ານ ທອງ​ລຸນ ສີ​ສຸ​ລິດ ໄດ້​ເຊື້ອ​ເຊີນ​ທ່ານ​ນາງ ອັງ​ເກ​ລາ ແມກ​ເກລ ມາ​ຢ້ຽມ­ຢາມ​ລາວ​ໃນ​ເວ­ລາ​ທີ່​ເພິ່ນ​ເຫັນ​ວ່າ​ສະ­ດວກ ເຊິ່ງ​ຄູ່​ຮ່ວມ​ຕຳ­ແໜ່ງ​ເຢຍ​ລະ​ມັນ ໄດ້​ຕອບ​ຮັບ​ດ້ວຍ​ຄວາມ​ຍິນ​ດີ ສ່ວນ​ວັນ​ເວ­ລາ​ຈະ​ໄດ້​ຮັບ​ການ​ຕົກ­ລົງ​ໂດຍ​ຜ່ານ​ຊ່ອງ​ທາງ​ການ​ທູດ.

ຂ່າວທີ່ກ່ຽວຂ້ອງ