ຂ່າວຫຼ້າສຸດ

ການ​ແຂ່ງຂັນ​ລົດຈັກ​ທາງ​ລຽບ​ກຽມ​ຈັດ​ຂຶ້ນ 16-17 ມີນານີ້

317 15 ມ.ນ. 2019 ວົງຈອນກີລາ
ການ​ແຂ່ງຂັນ​ລົດຈັກ​ທາງ​ລຽບ​ກຽມ​ຈັດ​ຂຶ້ນ 16-17 ມີນານີ້

    ພິທີ​ຖະແຫຼງ​ຂ່າວ​ການ​ແຂ່ງຂັນ​ລົດຈັກ​ທາງ​ລຽບ ຊີງ​ແຊັມ​ນະຄອນຫຼວງ​ວຽງ​ຈັນ(ນວ) ຈັດ​ຂຶ້ນ​ວັນ​ທີ 13 ມີນາ 2019 ຢູ່​ຮ້ານ​ຂາຍ​ລົດ​ຫົງ​ຟ້າ ຖະໜົນ T2 ມີ​ທ່ານ ສົມ​ພອນ ສອນ​ດາລາ ຮອງ​ຫົວໜ້າ​ພະ ແນກ​ສຶກ​ສາ​ທິ​ການ ແລະ ກີລາ ນວ ທ່ານ ບຸນ​ຍະ​ເດດ ໄຊ​ສົງຄາມ ປະທານ​ສະໂມສອນ​ວຽງ​ຈັນ​ເຣ​​ສ​ຊິງ ເຊີ​ກິດ ທ່ານ​ຫົວໜ້າ​ກອງ​ບັນຊາ​ການ ​ປກສ ເມືອງ​ນາ​ຊາຍ​ທອງ ບັນດາ​ຄະນະ​ຮັບຜິດຊອບ​ຈັດການ​ແຂ່ງຂັນ ຜູ້​ໃຫ້ການ​ສະໜັບສະໜູນ ຄູ​ເຝິກ ນັກກີລາ​ເຂົ້າ​ຮ່ວມ.

     ທ່ານ ບຸນ​ຍະ​ເດດ ໄຊ​ສົງຄາມ ກ່າວ​ວ່າ:ການ​ແຂ່ງຂັນ​ລົດຈັກ​ທາງ​ລຽບ​ຄັ້ງ​ນີ້​ເພື່ອ​ເປັນ​ການ​ສ້າງ​ຂະ​ບວນ​ການ​ສະເຫຼີມສະຫຼອງ​ວັນ​ສຳຄັນ​ຕ່າງໆ​ຂອງ​ຊາດ ໂດຍ​ສະເພາະ​ວັນ​ສ້າງຕັ້ງ​ພັກ​ປະຊາຊົນ ປະຕິວັດ​ລາວ ຄົບຮອບ 64 ປີ ທັງ​ເປັນ​ການ​ເຜີຍແຜ່​ໃຫ້​ຊາວ​ໜຸ່ມ-ເຍົາວະ​ຊົນ ຫັນ​ມາ​ສົນໃຈ​ກີລາ​ຫຼິ້ນ​ກີລາ​ປະເພດ​ດັ່ງກ່າວ​ຫຼາຍ​ຂຶ້ນ ເພື່ອ​ຫຼຸດຜ່ອນ​ບັນຫາ​ການເຄື່ອນໄຫວ​ໃນ​ການ​ແຂ່ງຂັນ​ລົດ​ຕາມ​ທ້ອງ​ຖະໜົນຫຼວງ ເຊິ່ງ​ເປັນ​ການ​ສ້າງ​ຄວາມ​ບໍ່​ເປັນ​ລະບຽບ​ຮຽບ​ຮ້ອຍ​ຕໍ່​ສັງຄົມ ຖ້າ​ຫາກ​ເຍົາວະ​ຊົນ-ຊາວ​ໜຸ່ມ ເຂົ້າ​ມາ​ຮຽນ​ຮູ້​ເລື່ອງ​ການ​ຂັບ​ຂີ່​ແບບ​ມີ​ຄູ​ເຝິກ​ສອນ ຫຼື ໃຫ້​ຄຳ​ແນະນຳ​ທີ່​ຖືກ​ວິທີ​ກໍ່​ຈະ​ເປັນ​ການ​ດີ​ເພື່ອ​ຫຼຸດຜ່ອນ​ກ່ຽວ​ກັບ​ບັນຫາ​ດັ່ງກ່າວ.

    ສຳລັບ​ປະເພດ​ການ​ແຂ່ງຂັນ​ປະກອບ​ມີ 9 ຮຸ່ນ ຄື:NAKED 125-135cc NAKED 150-200cc NAKED 250-400cc  GIXXER D1 GIXXER D2 SPORT 250-400cc  SPORT 150-200cc  GIXXER INTER ແລະ GIXXER ສ່ວນ​ການ​ແຂ່ງຂັນ​ຄັ້ງ​ນີ້​ຈະ​ຈັດ​ຂຶ້ນ​ວັນ​ທີ 16-17 ມີນາ 2019 ທີ່​ບ້ານ​ນາ​ຊອນ ເມືອງ​ນາ​ຊາຍ​ທອງ ວັນ​ທີ 16 ມີນາ 2019 ຈະ​ເປັນ​ການ​ແຂ່ງຂັນ​ໃນ​ຮອບ​ຄັດ​ເລືອກ ໃນ​ການ​ຈັບ​ເວລາ​ວ່າ​ໃຜ​ຈະ​ໄດ້​ຈອດ​ລົດ​ຢູ່​ແຖວ​ໜ້າ ສ່ວນ​ວັນ​ທີ 17 ມີນາ 2019 ຈະ​ເລີ່ມ​ແຂ່ງຂັນ​ເວລາ 9:00 ໂມງ​ເປັນຕົ້ນ​ໄປ ທ່ານ​ສາມາດ​ເຂົ້າ​ໄປ​ຊົມ-ເຂົ້າ​ໄປ​ເຊຍ​ໄດ້ ໂດຍ​ບໍ່​ເສຍ​ຄ່າ​ຜ່ານ​ປະຕູ​ແຕ່​ຢ່າງໃດ. 

ຂ່າວທີ່ກ່ຽວຂ້ອງ