ສ ເກົາຫຼີ - ມາ​ເລ​ເຊຍ ເຫັນ​ດີ​ໃຫ້​ສຳເລັດ​ການ​ເຈລະຈາ FTA ພາຍ​ໃນ​ປີ​ນີ້

181 15 ມ.ນ. 2019 ຂ່າວຕ່າງປະເທດ
ສ ເກົາຫຼີ - ມາ​ເລ​ເຊຍ ເຫັນ​ດີ​ໃຫ້​ສຳເລັດ​ການ​ເຈລະຈາ FTA ພາຍ​ໃນ​ປີ​ນີ້

    ຂ່າວສານ​ຢອນ​ຮັບ ຂອງ ສ ເກົາຫຼີ ລາຍ​ງານ​ວ່າ ໃນ​ມື້​ທີ​ສອງ​ຂອງ​ການເຄື່ອນໄຫວ ຢ້ຽມຢາມ​ມາ​ເລ​ເຊຍ ເມື່ອ​ວັນ​ທີ 13 ມີນາ​ນັ້ນ ປະທານາທິບໍດີ ສ ເກົາຫຼີ ມູນ​ເຈ​ອິນ ໄດ້​ພົບ​ປະ​ເຈລະຈາ​ກັບ​ນາຍົກລັດຖະມົນຕີ​ມາ​ເລ​ເຊຍ ມາ​ຮາ​ເທຍ ມໍ​ຮາ​ມັດ ເພື່ອ​ປຶກສາ​ຫາລື​ກ່ຽວ​ກັບ ມາດ​ຕະການ​ເປີດ​ກວ້າງ​ການ​ຮ່ວມ​ມື ແລະ​ການ​ແລກປ່ຽນ​ລະຫວ່າງ​ສອງ​ປະເທດ.

    ໃນ​ການ​ພົບ​ປະ​ເຈລະຈາ​ດັ່ງກ່າວ ຜູ້ນຳ​ທັງ​ສອງ​ໄດ້​ເຫັນ​ດີ​ເປັນ​ເອກະສັນ​ກັນ ໃນ​ການ​ເລີ່ມ​ການ​ເຈລະຈາ ກ່ຽວ​ກັບ​ຂໍ້​ຕົກລົງ​ການ​ຄ້າ​ເສລີ (FTA) ແລະ ພະຍາຍາມ​ໃຫ້ການ​ເຈລະຈາ ນັ້ນ ສຳເລັດ​ລົງ​ພາຍ​ໃນ​ປີ 2019.

   ທຳ​ນຽບ​ປະທານາທິບໍດີ ສ ເກົາຫຼີ ຊີ້​ແຈງ​ວ່າ ຜູ້ນຳ​ທັງ​ສອງ​ໄດ້​ເຫັນ​ດີ​ເປັນ​ເອກະສັນ​ກັນ ໃນ​ການ​ຊຸກຍູ້ FTA ລະຫວ່າງ ສ ເກົາຫຼີ ກັບ​ມາ​ເລ​ເຊຍ ເພື່ອ​ເປີດ​ກວ້າງ​ການ​ລົງທຶນ ແລະ ການ​ຄ້າ​ລະຫວ່າງ​ສອງ​ປະເທດ​ໃຫ້​ຫຼາຍ​ກວ່າ​ເກົ່າ. ສອງ​ຝ່າຍ​ຍັງ​ໄດ້​ເຫັນ​ດີ​ໃຫ້​ສິ້ນ​ສຸດ​ການ​ເຈລະຈາ ໃນ​ໂອກາດ​ກອງ​ປະຊຸມ​ສຸດ​ຍອດ​ພິເສດ ລະຫວ່າງ ສ ເກົາຫຼີ ກັບ​ສະມາຄົມ​ບັນດາ​ປະເທດ​ອາຊີ ຕາເວັນ​ອອກ​ສ່ຽງ​ໃຕ້ (ASEAN) ໃນ​ທ້າຍ​ປີ​ນີ້ ດ້ວຍ​ວິທີ​ການ​ຊຸກຍູ້​ການ​ເຈລະຈາ​ໃຫ້​ໄວ​ຂຶ້ນ.

ຂ່າວທີ່ກ່ຽວຂ້ອງ