ຂ່າວຫຼ້າສຸດ

ຊຽງ​ຂວາງ ເກມ ເລື່ອນ​ໄປ​ຈັດ​ຕົ້ນ​ປີ 2020

190 18 ມ.ນ. 2019 ວົງຈອນກີລາ
ຊຽງ​ຂວາງ ເກມ ເລື່ອນ​ໄປ​ຈັດ​ຕົ້ນ​ປີ 2020

    ອີງ​ຕາມ​ຂໍ້​ມູນ​ຈາກ​ແຈ້ງ​ການ ຂອງ​ຫ້ອງ​ວ່າການ​ສຳນັກງານ​ນາຍົກລັດຖະມົນຕີ ລົງ​ວັນ​ທີ 6 ມີນາ 2019 ເລກ​ທີ 388/​ຫສນຍ ກ່ຽວ​ກັບ​ການ​ຈັດ​ງານ​ມະ​ຫະ​ກຳ​ກີລາ​ແຫ່ງ​ຊາດ ຄັ້ງ​ທີ XI ທີ່​ແຂວງ​ຊຽງ​ຂວາງ ຮັບ​ກຽດ​ເປັນ​ເຈົ້າພາບ ລະຫວ່າງ​ວັນ​ທີ 21-30 ທັນວາ 2019 ໃຫ້​ຊາບ​ວ່າ: ອີງ​ຕາມ​ເອກະສານ​ສະເໜີ ສະບັບ​ເລກ​ທີ 236/​ສສກ ລົງ​ວັນ​ທີ 22 ກຸມພາ 2019 ຂອງ​ກະຊວງ​ສຶກ​ສາ​ທິ​ການ ແລະ ກີລາ ແລະ ອີງ​ຕາມ​ການ​ຕົກລົງ ແລະ ທິດ​ຊີ້​ນຳ​ຂອງ​ກອງ​ປະຊຸມ​ນາຍົກ-ຮອງ​ນາຍົກລັດຖະມົນຕີ ຄັ້ງ​ວັນ​ທີ 6 ມີນາ 2019 ຫ້ອງ​ວ່າ​ສຳນັກງານ​ນາຍົກລັດຖະມົນຕີ ຂໍ​ຖື​ເປັນ​ກຽດ​ແຈ້ງ​ການ​ຕົກລົງ ແລະ ທິດ​ຊີ້​ນຳ ຂອງ​ກອງ​ປະຊຸມ​ນາຍົກ-ຮອງ​ນາຍົກລັດຖະມົນຕີ ຊາບ​ດັ່ງນີ້​ວ່າ: ເຫັນ​ດີ​ດ້ານ​ຫຼັກການ​ໃຫ້​ເລື່ອນ​ການ​ຈັດ​ງານ​ມະຫາ​ກຳ​ກີລາ​ແຫ່ງ​ຊາດ ຄັ້ງ​ທີ XI ທີ່​ແຂວງ​ຊຽງ​ຂວາງ ເປັນ​ເຈົ້າພາບ ລະຫວ່າງ​ວັນ​ທີ 21-30 ທັນວາ 2019 ນີ້ ໄປ​ຈັດ​ໃສ່​ໃນ​ລະຫວ່າງ​ວັນ​ທີ 22 ມີນາ ຫາ 1 ເມສາ 2020 ເພື່ອ​ໃຫ້​ເໝາະ​ສົມ​ກັບ​ສະພາບ​ອາກາດ​ຕົວ​ຈິງ ທີ່​ແຂວງ​ຊຽງ​ຂວາງ ເພາະ​ຖ້າ​ຈັດ​ໃສ່​ເດືອນ​ທັນວາ 2019 ແມ່ນ​ສະພາບ​ອາກາດ​ໜາວ​ໂພດ ແລະ ອັນ​ສຳຄັນ​ແມ່ນ​ເພື່ອ​ເປັນ​ການ​ສ້າງ​ຂະ​ບວນ​ການ​ຕ້ອນຮັບ​ວັນ​ສຳຄັນ​ຕ່າງໆ​ຂອງ​ຊາດ ໃນ​ປີ 2020.

    ແນວໃດ​ກໍ​ຕາມ ໃຫ້​ກະຊວງ​ສຶກ​ສາ​ທິ​ການ ແລະ ກີລາ ສົມທົບ​ກັບ​ຫ້ອງ​ວ່າການ​ສຳນັກງານ​ນາຍົກລັດຖະມົນຕີ ຮ່າງ​ບົດ​ລາຍ​ງານ​ຂໍ​ການ​ຊີ້​ນຳ​ຈາກ​ກົມ​ການເມືອງ​ສູນ​ກາງ​ພັກ​ຕື່ມ​ອີກ ໃຫ້​ກະຊວງ​ການ​ເງິນ ກະກຽມ​ງົບປະມານ​ບ້ວງ​ບໍລິຫານ​ສຳລັບ​ການ​ຈັດ​ງານ​ແຂ່ງຂັນ​ກີລາ​ແຫ່ງ​ຊາດ ທີ່​ໄດ້​ຂຶ້ນ​ແຜນ​ໄວ້​ແລ້ວ​ນັ້ນ ໃຫ້​ມີ​ຄວາມ​ພ້ອມ​ໃນ​ການ​ນຳ​ໃຊ້​ໃນ​ເວລາ​ຈັດ​ງານ​ແຂ່ງຂັນ​ໃນ​ເດືອນ​ມີນາ 2020 ແລະ ໃຫ້​ແຂວງ​ຊຽງ​ຂວາງ ເປັນໃຈ​ກາງ​ສົມທົບ​ກະຊວງ​ສຶກ​ສາ​ທິ​ການ ແລະ ກີລາ ແລະ ກະຊວງ​ແຜນການ ແລະ ການ​ລົງທຶນ ຕິດຕາມ ແລະ ຊຸກຍູ້​ການ​ກໍ່ສ້າງ​ບັນດາ​ໂຄງການ​ພື້ນຖານ​ໂຄງ​ລ່າງ ຮັບ​ໃຊ້​ໃຫ້​ແກ່​ການ​ຈັດ​ງານ​ມະ​ຫະ​ກຳ​ກີລາ​ແຫ່ງ​ຊາດ​ດັ່ງກ່າວ ໃຫ້​ສຳເລັດ ແລະ ທັນ ມອບ-ຮັບ​ໂຄງການ ກ່ອນ​ມື້​ເປີດ​ງານ​ມະ​ຫະ​ກຳ​ກີລາ​ແຫ່ງ​ຊາດ.

    ສຳລັບ​ງານ​ມະ​ຫະ​ກຳ​ກີລາ​ແຫ່ງ​ຊາດ ຄັ້ງ​ທີ XI ທີ່​ແຂວງ​ຊຽງ​ຂວາງ ເປັນ​ເຈົ້າພາບ ໃນ​ຄັ້ງ​ນີ້ ຖື​ວ່າ​ເປັນ​ຄັ້ງ​ທີ 2 ແລ້ວ​ທີ່​ມີ​ການ​ເລື່ອນ ຫຼັງ​ຈາກ​ໃນ​ເບື້ອງ​ຕົ້ນ​ຕົກລົງ​ຈັດ​ໃນ​ທ້າຍ​ປີ 2018 ຕໍ່​ມາ​ເລື່ອນ​ມາ​ຈັດ​ໃນ​ທ້າຍ​ປີ 2019 ແລະ ຫຼ້າ​ສຸດ​ນີ້ ແມ່ນ​ຈະ​ເລື່ອນ​ມາ​ຈັດ​ໃສ່​ໃນ​ລະຫວ່າງ​ວັນ​ທີ 22 ມີນາ ຫາ 1 ເມສາ 2020.

ຂ່າວທີ່ກ່ຽວຂ້ອງ