ຂ່າວຫຼ້າສຸດ

ເປີດຂະບວນການເສຍຄ່າທຳນຽມທາງ ແລະ ພາສີທີ່ດິນ

284 18 ມ.ນ. 2019 ຂ່າວໜ້າ​ໜຶ່ງ
ເປີດຂະບວນການເສຍຄ່າທຳນຽມທາງ ແລະ ພາສີທີ່ດິນ

    ໂດຍ​ປະ­ຕິ­ບັດ​ຕາມ​ລັດ​ຖະ​ບັນ­ຍັດ​ຂອງ​ປະ­ທານ​ປະ­ເທດ ແຫ່ງ ສປປ ລາວ ວ່າ​ດ້ວຍ​ຄ່າ​ທຳ­ນຽມ​ທາງ ແຈ້ງ​ການ​ຂອງ​ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ວ່າ​ດ້ວຍ​ການ​ເສຍ​ຄ່າ​ທຳ­ນຽມ​ທາງ ປະ­ຈຳ​ປີ 2019 ແຈ້ງ​ການ​ຂອງ​ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ວ່າ​ດ້ວຍ​ການ​ເສຍ​ຄ່າ​ພາ­ສີ​ທີ່​ດິນ​ຜ່ານ​ລະ­ບົບ​ທະ­ນາ­ຄານ ເພື່ອ​ປະ­ຕິ­ບັດ​ຄາດ­ໝາຍ​ສູ້​ຊົນ​ຂອງ​ພັກ ແຕ່​ນີ້​ຫາ​ປີ 2020 ໃຫ້​ປະ­ເທດ​ລາວ​ຫຼຸດ​ພົ້ນ​ອອກ​ຈາກ​ສະ­ພາບ​ດ້ອຍ​ພັດ­ທະ­ນາ ກາຍ­ເປັນ​ປະ­ເທດ​ທີ່​ພັດ­ທະ­ນາ ເຮັດ​ໃຫ້​ເສດ­ຖະ­ກິດ​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ປະ­ເທດ​ລາວ​ຮັ່ງ­ມີ​ເຂັ້ມ­ແຂງ ປະ­ຊາ­ຊົນ​ມີ​ຄວາມ​ຜາ​ສຸກ ສັງ­ຄົມ​ມີ​ຄວາມ​ສີ­ວິ­ໄລ.

    ຄື​ດັ່ງ​ທີ່​ພວກ​ເຮົາ​ຮູ້​ນຳ​ກັນ​ແລ້ວ​ວ່າ ວຽກ​ງານ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ກໍ​ແມ່ນ​ວຽກ​ງານ​ໜຶ່ງ​ທີ່​ສຳ­ຄັນ ແລະ ເປັນ​ພື້ນ­ຖານ​ໃຫ້​ແກ່​ຄາດ­ໝາຍ​ທີ່​ໄດ້​ກ່າວ​ມາ​ຂ້າງ​ເທິງ​ນັ້ນ ການ​ປະ­ຕິ­ບັດ​ພັນ­ທະ​ເຂົ້າ​ງົບ­ປະ­ມານ​ລັດ ແມ່ນ​ໜ້າ­ທີ່​ຂອງ​ທຸກ​ພາກ­ສ່ວນ ນັບ​ທັງ​ອົງ​ການ­ຈັດ­ຕັ້ງ​ພັກ-ລັດ ອົງ​ການ­ຈັດ­ຕັ້ງ​ມະ­ຫາ­ຊົນ ຫົວ­ໜ່ວຍ​ທຸ­ລະ​ກິດ ແລະ ພົນ­ລະ­ເມືອງ​ລາວ​ທຸກ​ຄົນ​ມີ​ສ່ວນ​ຮ່ວມ.

    ພະ​ແນກ​ສ່ວຍ​ສາ​ອາ­ກອນ ນະ­ຄອນ­ຫຼວງ​ວຽງ​ຈັນ (ນວ) ສົມ­ທົບ​ກັບ​ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ ມະ­ຫາ­ຊົນ ຈັດ​ພິ­ທີ​ເປີດ​ຂະ​ບວນ​ການ​ເສຍ​ຄ່າ​ທຳ­ນຽມ​ທາງ ແລະ ພາ­ສີ​ທີ່​ດິນ​ຜ່ານ​ລະ­ບົບ​ທະ­ນາ­ຄານ ປະ­ຈຳ​ປີ 2019 ຂຶ້ນ​ວັນ​ທີ 14 ມີ­ນາ 2019 ຢູ່​ຕໍ່­ໜ້າ​ສຳ­ນັກ­ງານ​ປົນ​ຄອງ ນວ ມີ​ທ່ານ ແກ້ວ​ພິ­ລາ​ວັນ ອາ​ໄພ​ລາດ ຮອງ​ເຈົ້າ​ຄອງ ນວ ທ່ານ ສີ​ລິ​ລາດ​ທົງ​ສິນ ທອງ​ເພັງ ຫົວ­ໜ້າ​ພະ​ແນກ​ສ່ວຍ​ສາ​ອາ­ກອນ ນວ ທ່ານ ວຽງ​ສຸກ ຈຸນ​ທະ​ວົງ ຮອງ​ຜູ້­ອຳ­ນວຍ­ການ​ທະ​ນາ​ການ​ຄ້າ​ຕ່າງ­ປະ­ເທດ​ລາວ ມະ­ຫາ­ຊົນ ພ້ອມ​ດ້ວຍ​ພະ­ນັກ­ງານ-ວິ­ຊາ​ການ ແລະ ແຂກ​ຖືກ​ເຊີນ​ເຂົ້າ​ຮ່ວມ.

    ການ​ເປີດ​ຂະ​ບວນ​ການ​ເສຍ​ຄ່າ​ທຳ­ນຽມ​ດັ່ງ­ກ່າວ ແມ່ນ​ເພື່ອ​ເປັນ​ການ​ປຸກ­ລະ­ດົມ ກະ­ຕຸກ​ຊຸກ­ຍູ້ ແລະ ອຳ­ນວຍ​ຄວາມ​ສະ­ດວກ​ໃຫ້​ບັນ­ດາ​ອົງ​ການ­ຈັດ­ຕັ້ງ​ລັດ ພະ­ນັກ­ງານ-ລັດ­ຖະ­ກອນ ໄດ້​ມາ​ເສຍ​ຄ່າ​ທຳ­ນຽມ​ທາງ ແລະ ພາ­ສີ​ທີ່​ດິນ​ປະ­ຈຳ​ປີ 2019 ໃຫ້​ເປັນ​ຂະ​ບວນ​ຟົດ­ຟື້ນ ອັນ​ສຳ­ຄັນ​ແມ່ນ​ສ້າງ​ຂະ​ບວນ​ການ​ໃຫ້​ເປັນ​ແບບ­ຢ່າງ​ນຳ​ໜ້າ ສະ­ແດງ​ເຖິງ​ສະ­ຕິ​ຕື່ນ​ຕົວ ຄວາມ​ສະ­ໝັກ​ໃຈ ທີ່​ຈະ​ປະ­ກອບ­ສ່ວນ​ເຂົ້າ​ໃນ​ງົບ­ປະ­ມານ​ໃຫ້​ແກ່​ລັດ ກໍ​ຄື ການ​ສ້າງ­ສາ​ພັດ­ທະ­ນາ​ປະ­ເທດ​ຊາດ​ອັນ​ແສນ​ຮັກ​ຂອງ​ພວກ​ເຮົາ.

ຂ່າວທີ່ກ່ຽວຂ້ອງ