ແຂ່ງຂັນ​ລົດຈັກ​ວິບາກ​ລະດົມ​ທຶນ​ຊ່ວຍເຫຼືອ​ໂຮງຮຽນ​ຂາດເຂີນ

169 18 ມີ.ນ. 2019 ວົງຈອນກີລາ
ແຂ່ງຂັນ​ລົດຈັກ​ວິບາກ​ລະດົມ​ທຶນ​ຊ່ວຍເຫຼືອ​ໂຮງຮຽນ​ຂາດເຂີນ

    ສະຫະພັນ​ລົດຈັກ​ວິບາກ ນະຄອນຫຼວງ​ວຽງ​ຈັນ (ນວ) ຈັດການ​ແຂ່ງຂັນ​ກີລາ​ລົດຈັກ​ວິບາກ 12 ລາຍການ ຄັ້ງ​ທີ 1 ມິດຕະພາບ ລາວ-ໄທ ເພື່ອ​ເປັນ​ການ​ລະດົມ​ທຶນ​ການ​ກຸສົນ​ຈາກ​ບັນດາ​ນັກ​ຂັບ​ລົດຈັກ​ວິບາກ ແລະ ປະຊາຊົນ​ຊາວ​ນະຄອນຫຼວງ​ວຽງ​ຈັນ ເພື່ອ​ຈະ​ນຳ​ເອົາ​ເງິນ​ໄປ​ຊ່ວຍເຫຼືອ​ໂຮງຮຽນ​ປະຖົມ​ສົມບູນ ບ້ານ​ຜາ​ທອງ ເມືອງ​ວັງ​ວຽງ ແຂວງ​ວຽງ​ຈັນ ເຊິ່ງ​ການ​ແຂ່ງຂັນ​ຈັດ​ຂຶ້ນ​ວັນ​ທີ 9-10 ມີນາ 2019 ທີ່​ສະໜາມ​ແຂ່ງຂັນ​ລົດຈັກ​ວິບາກ ບຶງ​ທາດຫຼວງ ເມືອງ​ໄຊ​ເຊດ​ຖາ ມີ​ທ່ານ ສົມ​ພອນ ສອນ​ດາລາ ຮອງ​ຫົວໜ້າ​ພະ​ແນກ​ສຶກ​ສາ​ທິ​ການ ແລະ ກີລາ ນະຄອນຫຼວງ​ວຽງ​ຈັນ ທ່ານ ຄຳ​ສະຫວັນ ໂຄດ​ໄຊ ຮອງ​ເຈົ້າເມືອງ​ໄຊ​ເຊດ​ຖາ ຜູ້ຕາງໜ້າ​ຈາກ​ກົມ​ວິຊາ​ການ​ທີ່​ກ່ຽວຂ້ອງ ຕະຫຼອດ​ຮອດ​ປະຊາຊົນ ນວ ແລະ ແຂວງ​ໜອງ​ຄາຍ ປະເທດ​ໄທ​ເຂົ້າ​ຮ່ວມ.

    ໂອກາດ​ນີ້​ທ່ານ ກັນຫາ ແສນ​ພົນ​ອາສາ ປະທານ​ສະຫະພັນ​ລົດຈັກ​ວິບາກ ນວ ກ່າວ​ວ່າ: ການ​ແຂ່ງຂັນ​ຄັ້ງ​ນີ້ ເພື່ອ​ເປັນ​ການ​ລະດົມ​ທຶນ​ການ​ກຸສົນ​ຈາກ​ນ້ຳໃຈ​ຂອງ​ປະຊາຊົນ 2 ຊາດ ລາວ-ໄທ ເພື່ອ​ເປັນ​ການ​ສ້າງ​ຄວາມ​ຮັດ​ແໜ້ນ​ສາມັກຄີ​ມິດຕະພາບ​ຮັກແພງ ເຊື່ອມ​ສາຍສຳພັນ​ອັນ​ດີງາມ​ຂອງ​ປະຊາຊົນ 2 ຊາດ ລາວ-ໄທ​ໃຫ້​ນັບ​ມື້​ແໜ້ນ​ແຟ້ນ​ຂຶ້ນ​ເລື້ອຍໆ ອີກ​ດ້ານ​ໜຶ່ງ​ກໍ​ຍັງ​ເປັນ​ການ​ປຸກລະດົມ​ທຶນ​ການ​ກຸສົນ ເພື່ອ​ຈະ​ນຳໄປ​ຊ່ວຍເຫຼືອ​ໂຮງຮຽນ​ປະຖົມ​ສົມບູນ​ບ້ານ​ຜາ​ທອງ ເມືອງ​ວັງ​ວຽງ ແຂວງ​ວຽງ​ຈັນ ໂດຍ​ຮູບ​ແບບ​ໃນ​ການ​ລະດົມ​ທຶນ​ໄດ້​ເອົາ​ຈາກ​ຄ່າ​ສະໝັກ ແລະ ການ​ຕັ້ງ​ບູດ​ຈາກ​ຫົວໜ່ວຍ​ທຸລະ​ກິດ​ມາ​ຈັບຈອງ ສ່ວນ​ການ​ແຂ່ງຂັນ​ມີ​ນັກ​ກິລາ​ຈາກ 3 ພາກ​ຄື: ແຂວງ​ສະຫວັນ​ນະ​ເຂດ ນວ ແລະ ແຂວງ​ໜອງ​ຄາຍ ມີ​ທັງ​ໝົດ 12 ຮຸ່ນ.

    ສຳລັບ​ຜົນ​ການ​ແຂ່ງຂັນ 12 ລາຍການ ປາກົດ​ວ່າ: ລົດຈັກ​ປະເພດ​ເອັມ​ເອັກ ຮຸ່ນ​ເຍົາວະ​ຊົນ ທີ 1 ທ້າວ ລີ​ວາຍ ຈາກ ນວ ທີ 2 ທ້າວ ສຸລະ​ສິດ ຈາກ ນວ ແລະ ທີ 3 ທ້າວ ຝະ​ລັງ ຮຸ່ນ ເອັມ​ເອັກ 150 ຊີ​ຊີ ທີ 1 ທ້າວ ທີ​ເດັດ ຈາກ​ໄທ ຮຸ່ນ​ມື​ໃໝ່ ທີ 1 ທ້າວ ທີ​ເດັດ ຮຸ່ນ ເອັມ​ເອັກ ວີ​ໄອ​ພີ ທີ 1 ຮຸ່ນ​ອາຍຸ 30-40 ປີ ທີ 1 ທ້າວ ທີ​ເດັດ ຮຸ່ນ​ເອັມ​ເອັກ ວີ​ໄອ​ພີ ຮຸ່ນ​ອາຍຸ 41-55 ທີ 1 ທ້າວ ທີ​ເດັດ ຮຸ່ນ​ເອັມ​ເອັກ ທົ່ວ​ໄປ ທີ 1 ທ້າວ ທີ​ເດັດ ຮຸ່ນ​ມິດຕະພາບ ທີ 1 ນັກກີລາ​ແຂວງ​ສະຫວັນ​ນະ​ເຂດ ຮຸ່ນ ເອັນດູ​ໂລ​ໂຊ ທີ 1 ນັກກີລາ ນວ ຮຸ່ນ ເອັມ​ເອັກ ນິວ ທີ 1 ທີ​ເດັດ ຮຸ່ນ ເອັມ​ເອັກ ໂອ​ເພັນ​ທີ 1 ນັກກີລາ​ໄທ ຮຸ່ນ​ມິດຕະພາບ ລາວ-ໄທ ທີ 1 ທ້າວ ທີ​ເດັດ. 

ຂ່າວທີ່ກ່ຽວຂ້ອງ