ສຳເລັດ​ແຂ່ງຂັນ​ກີລາ-ສິລະ​ປະ ປະຈຳ​ສົກຮຽນ 2018-2019

163 19 ມ.ນ. 2019 ວົງຈອນກີລາ
ສຳເລັດ​ແຂ່ງຂັນ​ກີລາ-ສິລະ​ປະ ປະຈຳ​ສົກຮຽນ 2018-2019

    ໂຮງຮຽນ​ມັດທະຍົມ​ສຶກ​ສາ ມິດຕະພາບ ລາວ-ຫວຽດນາມ ສຳເລັດ​ການ​ຈັດ​ແຂ່ງຂັນ​ກີລາ ແລະ ສິລະ​ປະ ພາຍ​ໃນ​ໂຮງຮຽນ ຄັ້ງ​ທີ IX ປະຈຳ​ສົກຮຽນ 2018-2019 ເພື່ອ​ຊົມເຊີຍ​ວັນ​ແມ່ຍິງ​ສາກົນ ຄົບຮອບ 109 ປີ ແລະ ຄຳນັບ​ຮັບ​ຕ້ອນ​ວັນ​ສ້າງຕັ້ງ​ພັກ​ປະຊາຊົນ​ປະຕິວັດ​ລາວ ຄົບຮອບ 64 ປີ ເມື່ອ​ວັນ​ທີ 15 ມີນາ ຜ່ານ​ມາ ຢູ່​ໂຮງຮຽນ​ດັ່ງກ່າວ ໂດຍ​ມີ ທ່ານ ປາດ​ຖະ​ໜາ ຊະນະ​ນິຄົມ ຮອງ​ຫົວໜ້າ​ພະ​ແນກ​ບໍລິຫານ ກົມ​ສາມັນ​ສຶກ​ສາ ກະຊວງ​ສຶກ​ສາ​ທິ​ການ ແລະ ກີລາ ມີ​ຕ່າງ​ໜ້າ​ຈາກ​ກົມ​ພະລະ ແລະ ສິລະ​ປະ​ສຶກ​ສາ ຂະແໜງ​ພະລະ ແລະ ສິລະ​ປະ​ສຶກ​ສາ ນະຄອນຫຼວງ​ວຽງ​ຈັນ ຕາງໜ້າ​ຄະນະ​ອຳນວຍ​ການ​ໂຮງຮຽນ​ອ້ອມ​ຂ້າງ ພ້ອມ​ດ້ວຍ​ຄະນະ ກ້ອນ​ກຳລັງ​ຄູ-ອາຈານ ຄະນະ​ກຳມະການ​ຕັດສິນ ນັກກີລາ ນັກສະແດງ​ສິລະ​ປະ ແລະ ນັກຮຽນ ເຂົ້າ​ຮ່ວມ.

    ທ່ານ ດອນ ແກ້ວ​ມີ​ໄຊ ຜູ້ອຳນວຍການ​ໂຮງຮຽນ​ມັດທະຍົມ​ສຶກ​ສາ ມິດຕະພາບ ລາວ-ຫວຽດນາມ ກໍ່​ໄດ້​ກ່າວ​ຈຸດປະສົງ​ໃຫ້​ຊາບ​ວ່າ: ການ​ແຂ່ງຂັນ​ດັ່ງກ່າວ​ນີ້ ແມ່ນ​ກິດຈະກຳ​ທີ່​ຈັດ​ຂຶ້ນ​ທຸກໆ​ປີ ໂດຍ​ມີ​ຈຸດປະສົງ​ເພື່ອ​ເປັນ​ການ ຈັດ​ຕັ້ງ​ຜັນ​ຂະຫຍາຍ​ເນື້ອ​ໃນ​ບຸກ​ທະລຸ ການ​ກໍ່ສ້າງ​ຊັບພະຍາກອນ​ມະນຸດ ໃຫ້​ມີ​ຄຸນ​ນະ​ພາບ​ຕາມ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ 10 ຂອງ​ພັກ ວາງ​ອອກ ແລະ ເພື່ອ​ເປັນ​ການຈັດຕັ້ງ​ປະຕິບັດ 3 ຂໍ້​ແຂ່ງຂັນ ແລະ  5 ຫຼັກ​ມູນ​ການ​ສຶກ​ສາ​ແຫ່ງ​ຊາດ ທັງ​ເປັນ​ການຈັດຕັ້ງ​ປະຕິບັດ​ແຜນການ​ຮຽນ 2018-2019 ຂອງ​ໂຮງຮຽນ ໃຫ້​ປາກົດ​ເປັນ​ຈິງ ແນ່​ໃສ່​ຮັກສາ​ນາມມະຍົດ​ໂຮງຮຽນ​ຕົວ​ແບບ​ຄຸນ​ນະ​ພາບ​ໄວ້​ໃຫ້​ໝັ້ນຄົງ ແລະ ເປັນ​ການ​ສ້າງ​ບັນຍາກາດ​ຮັບ​ໃຊ້​ການ​ຮຽນ-ການ​ສອນ ໃຫ້​ມີ​ຄວາມ​ຄືກ​ຄືນ​ມ່ວນຊື່ນ ເຮັດ​ໃຫ້​ນັກຮຽນ​ມີ​ນ້ຳ​ໃຈ້​ນັກ​ກິລາ ແລະ ຮູ້​ເສຍ ຮູ້​ຊະນະ ແລະ ຮູ້​ໃຫ້​ອະໄພ​ເຊິ່ງ​ກັນ ແລະ ກັນ ເຮັດ​ໃຫ້​ນັກຮຽນ​ຮູ້ຈັກ​ໃຊ້​ເວລາ​ຫວ່າງ​ໃຫ້​ເປັນ​ປະໂຫຍດ ແລະ ຫ່າງ​ໄກ່​ຢາ​ເສບ​ຕິດ.

    ການ​ແຂ່ງຂັນ​ກີລາ-ສິລະ​ປະ ຄັ້ງ​ນີ້ ແມ່ນ​ເລີ່ມ​ແຂ່ງຂັນ​ກັນ​ລະຫວ່າງ​ວັນ​ທີ 10 ຕຸລາ 2018 ຫາ 15 ມີນາ 2019 ປະກອບ​ມີ ການ​ແຂ່ງຂັນ 8 ປະເພດ​ກີລາ ຄື: ແລ່ນ-ລານ ດຶງເຊືອກ ດອກ​ປີກ​ໄກ່ ກະຕໍ້ ປິ່ງ​ປ່ອງ ບານສົ່ງ ບານເຕະ ແລະ ໝາກເສິກ ແລະ ການ​ແຂ່ງຂັນ​ສີ​ລະ​ປະ ປະກອບ​ມີ 2 ລາຍການ​ຄື: ປະເພດ​ບົດ​ຟ້ອນ ແລະ ຮ້ອງ​ເພັງ ໂດຍ​ຈະ​ແຂ່ງຂັນ​ກັນ​ຢູ່ 2 ລະດັບ ຄື: ລະດັບ​ມັດທະຍົມ​ຕອນ​ຕົ້ນ ແລະ ລະດັບ​ມັດທະຍົມ​ຕອນ​ປາຍ.

ຂ່າວທີ່ກ່ຽວຂ້ອງ