ເປີດມະຫະກຳ ອຸດສາຫະກຳປຸງແຕ່ງອາຫານນາໆຊາດ ຄັ້ງທີ 1

136 19 ມີ.ນ. 2019 ຂ່າວໜ້າ​ໜຶ່ງ

    ໃນ​ລະ­ຫວ່າງ​ວັນ​ທີ 15-19 ມີ­ນາ 2019 ນີ້ ກົມ​ສົ່ງ­ເສີມ​ການ​ຄ້າ ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ຮ່ວມ​ກັບ​ບໍ­ລິ­ສັດ ເດີ​ພາ​ສ​ໂອ​ຣ​ເຈັກ ຈຳ­ກັດ ແລະ ອີ​ເວັນ ອໍ​ກາ​ໄນ​ເຊີ ໄດ້​ເປີດ​ຕະ­ຫຼາດ​ອຸດ­ສາ­ຫະ­ກຳ​ປຸງ​ແຕ່ງ­ອາ­ຫານ​ນາໆຊາດ ຄັ້ງ​ທີ 1 ຂຶ້ນ​ທີ່​ສູນ​ການ​ຄ້າ ລາວ-ໄອ​ເຕັກ (ຕຶກ​ເກົ່າ) ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ແລະ ທ່ານ​ນາງ ເຂັມ​ມະ­ນີ ພົນ​ເສ­ນາ ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ໄຊ​ສົມ​ເພັດ ນໍ­ລະ​ສິງ ຫົວ­ໜ້າ​ກົມ​ສົ່ງ­ເສີມ​ການ​ຄ້າ ກ່າວ​ວ່າ: ງານ​ມະ​ຫະ​ກຳ​ອຸດ­ສາ­ຫະ­ກຳ​ປຸງ​ແຕ່ງ­ອາ­ຫານ​ນາໆຊາດ​ຄັ້ງ​ທຳ​ອິດ​ນີ້ ໄດ້​ລິ​ເລີ່ມ​ຈັດ​ຂຶ້ນ ເພື່ອ​ຈັດ​ຕັ້ງ​ຜັນ​ຂະ­ຫຍາຍ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ ສປປ ລາວ ເປັນ​ການ​ຊຸກ­ຍູ້​ສົ່ງ­ເສີມ​ສິນ­ຄ້າ​ທີ່​ເປັນ​ທ່າ­ແຮງ​ຂອງ​ລາວ ໄດ້​ຮັບ​ການ​ໂຄ­ສະ­ນາ​ໃຫ້​ສັງ­ຄົມ ທັງ​ພາຍ​ໃນ ແລະ ສາ­ກົນ ໄດ້​ຮັບ​ຮູ້​ຢ່າງ​ທົ່ວ​ເຖິງ ເປັນ​ການ​ສ້າງ​ໂອ­ກາດ​ໃຫ້​ຜູ້​ຜະ­ລິດ ຜູ້​ປຸງ​ແຕ່ງ ໄດ້​ມີ​ໂອ­ກາດ​ນຳ​ສະ­ເໜີ​ສິນ­ຄ້າ​ຂອງ​ຕົນ​ກ້າວ​ໄປ​ສູ່​ການ​ສ້າງ​ຍີ່­ຫໍ້ ຄຸນ​ນະ​ພາບ​ຂອງ​ຜະ­ລິດ​ຕະ​ພັນ​ຂອງ​ຕົນ ໃຫ້​ເປັນ​ທີ່​ຍອມ­ຮັບ​ຂອງ​ສັງ­ຄົມ ກໍ​ຄື ຕະ­ຫຼາດ ພ້ອມ​ນີ້ ຍັງ​ເປັນ​ການ​ສ້າງ​ໂອ­ກາດ​ໃຫ້​ຜູ້​ຜະ­ລິດ​ໃນ​ປະ­ເທດ ມີ​ການ​ແລກ­ປ່ຽນ​ບົດ­ຮຽນ​ຄວາມ​ຮູ້​ດ້ານ​ການ​ຜະ­ລິດ ອອກ​ແບບ ການ​ຫຸ້ມ​ຫໍ່ ກ້າວ​ໄປ​ເຖິງ​ການ​ຈັບ​ຄູ່​ທຸ­ລະ​ກິດ ແລະ ຍັງ​ເປັນ​ໂອ­ກາດ​ທີ່​ດີ​ກອງ​ເລ­ຂາ​ສະ­ແດງ ຈີນ-ອາ​ຊຽນ ບັນ­ດາ​ທະ­ນາ­ຄານ ແລະ ບັນ­ດາ​ບໍ­ລິ­ສັດ​ກະ­ສິ­ກຳ​ປຸງ​ແຕ່ງ​ຈາກ​ພາຍ​ໃນ ແລະ ຕ່າງ­ປະ­ເທດ​ໄດ້​ມາ​ພົບ​ກັນ ເພື່ອ​ເປັນ​ການ​ຮ່ວມ​ມື​ໃນ​ອະ­ນາ­ຄົດ ນອກ​ນັ້ນ ຍັງ​ມີ​ການ​ຈັດ​ແບບ​ຈຳ­ລອງ​ບັນ­ຍາ­ກາດ​ຈາກ​ທົ່ງ​ນາ​ເຖິງ​ການ​ຜະ­ລິດ ແລະ ເປັນ​ການ​ກະ​ຕຸ້ນ​ບັນ­ຍາ­ກາດ​ທ່ອງ​ທ່ຽວ​ໃນ ສປປ ລາວ.

    ງານ​ຄັ້ງ​ນີ້ ມີ​ຫ້ອງ​ວາງ­ສະ­ແດງ​ທັງ​ໝົດ 170 ຫ້ອງ ມີ​ທັງ​ນັກ­ທຸ­ລະ­ກິດ​ທັງ​ພາຍ​ໃນ ແລະ ຕ່າງ­ປະ­ເທດ ໃນ​ນັ້ນ ມີ​ຫຼາກ​ຫຼາຍ​ປະ­ເພດ​ສິນ­ຄ້າ ເຊັ່ນ: ສິນ­ຄ້າ​ກະ­ສິ­ກຳ​ປຸງ​ແຕ່ງ ເຄື່ອງ​ອຸ­ປະ­ໂພກ-ບໍ­ລິ­ໂພກ ເຄື່ອງ­ມື​ຮັບ​ໃຊ້​ກະ­ສິ­ກຳ ອາ­ຫານ​ສຳ­ເລັດ​ຮູບ ແລະ ເຄື່ອງ​ດື່ມ ສິນ­ຄ້າ​ໂອ​ດັອບ ຈາກ 18 ແຂວງ​ທົ່ວ​ປະ­ເທດ ຫ້ອງ​ວາງ­ສະ­ແດງ ກອງ​ເລ­ຂາ​ວາງ­ສະ­ແດງ ຈີນ-ອາ​ຊຽນ ຫ້ອງ​ວາງ­ສະ­ແດງ​ສິນ­ຄ້າ ທ່າ­ແຮງ​ທີ່​ເຂົ້າ​ຮ່ວມ​ງານ​ວາງ­ສະ­ແດງ​ຢູ່​ຕ່າງ­ປະ­ເທດ ຫ້ອງ​ກິດ­ຈະ­ກຳ​ຈັບ​ຄູ່​ທຸ­ລະ​ກິດ ແລະ ສະ­ຖານ­ທີ່​ຈຳ­ລອງ​ຕ່າງໆ.

ຂ່າວທີ່ກ່ຽວຂ້ອງ