ການຍິງປືນຂູ່ຢູ່ບ້ານນາໂນ ຍ້ອນມີຜູ້ບຸກລຸກ ບຸກເບີກດິນໂດຍບໍ່ໄດ້ຮັບອະນຸຍາດ

250 19 ມີ.ນ. 2019 ຂ່າວໜ້າ​ໜຶ່ງ

    ທ່ານ ບຸນ​ປີງ ປັນ­ຍາ​ຈິດ ຮອງ​ເຈົ້າ­ເມືອງ​ໄຊ​ເຊດ​ຖາ ໄດ້​ລາຍ​ງານ​ຕໍ່​ທ່ານ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ທ່ານ ສິນ​ລະ​ວົງ ຄຸດ​ໄພ­ທູນ ແລະ ທ່ານ ລາດ​ຊະ­ນີ​ວົງ ອະ​ມາ​ຣາ​ທິ​ທາ­ດາ ປະ­ທານ​ກວດ­ກາ​ພັກ ນະ­ຄອນ­ຫຼວງ​ວຽງ​ຈັນ ເມື່ອ​ບໍ່​ດົນ​ມາ​ນີ້​ວ່າ: ວັນ​ທີ 1 ມີ­ນາ 2018 ອຳ­ນາດ​ການ​ປົກ­ຄອງ​ບ້ານ​ນາ​ໂນ ໄດ້​ລາຍ​ງານ​ຕໍ່​ອົງ­ການ​ປົກ­ຄອງ​ເມືອງ​ໄຊ​ເຊດ​ຖາ ວ່າ​ມີ​ປະ­ຊາ­ຊົນ​ຈຳ­ນວນ​ໜຶ່ງ ມາ​ບຸກ­ເບີກ​ທີ່​ດິນ​ຢູ່​ບ້ານ​ນາ​ໂນ ໂດຍ​ບໍ່​ໄດ້​ຮັບ​ອະ­ນຸ­ຍາດ ເຊິ່ງ​ນຳ​ໃຊ້​ລົດ​ໄຖ​ນາ 4 ຄັນ ເປັນ​ພາ­ຫະ­ນະ ອົງ­ການ​ປົກ­ຄອງ​ເມືອງ ຈຶ່ງ​ໄດ້​ມອບ​ໃຫ້​ຫ້ອງ­ການ​ຊັບ​ພະ­ຍາ​ການ​ທຳ​ມະ​ຊາດ ແລະ ສິ່ງ­ແວ­ດລ້ອມ​ເມືອງ ລົງ​ສົມ­ທົບ​ກັບ​ພາກ­ສ່ວນ​ທີ່​ກ່ຽວ­ຂ້ອງ ເພື່ອ​ຕິດ­ຕາມ​ສະ­ພາບ​ຕົວ​ຈິງ ແລະ ພົບ​ເຫັນ​ການ​ບຸ­ກລຸກ​ແທ້ ຈາກ​ນັ້ນ ຄະ­ນະ​ກໍ​ໄດ້​ບອກ​ໃຫ້​ຢຸດ​ເຊົາ ແຕ່​ພວກ​ກ່ຽວ​ກໍ​ບໍ່​ຍອມ​ຢຸດ​ເຊົາ ຕໍ່​ມາ​ອົງ­ການ​ປົກ­ຄອງ​ເມືອງ​ໄຊ​ເຊດ​ຖາ ໄດ້​ອອກ​ແຈ້ງ​ການ​ກ່ຽວ​ກັບ​ໃຫ້​ຢຸດ­ຕິ​ການ​ບຸກ­ເບີກ​ທີ່​ດິນ​ຢູ່​ບ້ານ​ນາ​ໂນ ວັນ​ທີ 12 ມີ­ນາ 2019 ຄະ­ນະ​ກຳ­ມະ­ການ​ທີ່​ຖືກ​ແຕ່ງ­ຕັ້ງ ຈຶ່ງ​ໄດ້​ລົງ​ສຳ​ຫຼວດ​ກວດ­ກາ​ພື້ນ​ທີ່ ແລະ ໄດ້​ເຮັດ​ບົດ​ບັນ­ທຶກ​ຮ່ວມ​ກັບ​ອຳ­ນາດ​ການ​ປົກ­ຄອງ​ບ້ານ ແລະ ຜູ້​ບຸ­ກລຸກ.

    ມາ​ຮອດ​ວັນ​ທີ 17 ມີ­ນາ 2019 ສະ­ພາບ​ການ​ບຸ­ກລຸກ​ຂອງ​ປະ­ຊາ­ຊົນ​ຍັງ​ບໍ່​ຢຸດ​ເຊົາ ພ້ອມ​ນີ້​ຍັງ​ໄດ້​ມີ​ການ​ຝັງ​ເສົາ​ຮົ້ວ​ແບ່ງ​ກັນ​ເປັນ​ລອກ ແລະ ກວມ​ເອົາ​ດິນ​ຂອງ​ປະ­ຊາ­ຊົນ​ຈຳ­ນວນ​ໜຶ່ງ​ທີ່​ມີ​ໃບ​ຕາ­ດິນ​ແລ້ວ ສະ­ນັ້ນ ຈຶ່ງ​ເກີດ​ມີ​ການ​ໂຕ້​ຖຽງ​ກັນ ແລະ ໃຊ້​ອາ­ວຸດ​ປືນ​ຍິງ​ນາບ​ຂູ່​ປະ­ມານ 4 ນັດ ຜູ້­ຍິງ​ຊື່​ທ້າວ ໃຫຍ່ ອາ­ຍຸ 39 ປີ ຢູ່​ບ້ານ​ຕານ​ມີ​ໄຊ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ເຫດ­ຜົນ​ທີ່​ຍິງ​ແມ່ນ​ຍ້ອນ​ຜູ້​ບຸ­ກລຸກ​ດັ່ງ­ກ່າວ ເອົາ​ລົດ​ມາ​ດຸດ​ດິນ​ຂອງ​ຕົນ​ເອງ ເຊິ່ງ​ເຫດ­ການ​ດັ່ງ­ກ່າວ ອົງ­ການ​ປົກ­ຄອງ​ເມືອງ ໄດ້​ມອບ​ໃຫ້​ເຈົ້າ​ໜ້າ­ທີ່ ປກຊ-ປກສ ເມືອງ ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ ລົງ​ຕິດ­ຕາມ​ຢູ່​ສະ­ຖານ­ທີ່​ຕົວ​ຈິງ ແລະ ຈະ​ສະ­ເໜີ​ໃຫ້​ຂັ້ນ​ເທິງ​ຊາບ​ຕາມ​ພາຍ­ຫຼັງ.

    ສຳ­ລັບ​ຜູ້​ເອົາ​ລົດ​ເຂົ້າ​ໄປ​ບຸກ­ເບີກ​ທີ່​ດິນ​ຈຳ­ນວນ​ດັ່ງ­ກ່າວ ແມ່ນ​ບໍ່​ໄດ້​ຮັບ​ອະ­ນຸ­ຍາດ​ຈາກ​ການ­ຈັດ­ຕັ້ງ​ຂອງ​ພັກ-ລັດ ບໍ່​ວ່າ​ຈະ​ເປັນ​ດິນ​ລັດ ຫຼື ດິນ​ບຸກ­ຄົນ​ກໍ​ຕາມ ເຊິ່ງ​ເປັນ​ການ​ລະ­ເມີດ​ລະ­ບຽບ​ກົດ­ໝາຍ ແລະ ກຸ່ມ​ຄົນ​ຈຳ­ນວນ​ດັ່ງ­ກ່າວ ຍັງ​ບໍ່​ລົດ​ລະ ແລະ ດື້​ດ້ານ​ບຸກ­ເບີກ​ຕໍ່ ຈຶ່ງ​ສະ­ເໜີ​ຂັ້ນ​ເທິງ​ຂໍ​ນຳ​ໃຊ້​ກຳ­ລັງ​ເຈົ້າ​ໜ້າ­ທີ່ ປກຊ-ປກສ ເຂົ້າ​ສະ­ກັດ ຖ້າ​ຜູ້​ໃດ​ທີ່​ຝ່າ­ຝືນ ກໍ​ຈະ​ໃຊ້​ມາດ​ຕະ­ການ​ດ້ານ​ກົດ­ໝາຍ​ຢ່າງ​ເດັດ­ຂາດ.

ຂ່າວທີ່ກ່ຽວຂ້ອງ