ເພີ່ມຫຼາຍລາງວັນໃຫ້ນາງສາວ ນະຄອນຫຼວງ ປະຈຳປີ 2019

147 19 ມີ.ນ. 2019 ຂ່າວໜ້າ​ໜຶ່ງ
ເພີ່ມຫຼາຍລາງວັນໃຫ້ນາງສາວ ນະຄອນຫຼວງ ປະຈຳປີ 2019

    ພິ­ທີ​ຖະ­ແຫຼງ​ຂ່າວ​ແນະ­ນຳ​ຕົວ​ນາງ​ສາວ​ນະ­ຄອນ­ຫຼວງ​ວຽງ​ຈັນ (ນວ) ປະ­ຈຳ​ປີ 2019 ຈັດ​ຂຶ້ນ​ວັນ​ທີ16 ມີ­ນາ 2019 ຢູ່​ໂຮງ­ແຮມ​ແລນ​ມາກ ໂດຍ​ມີ​ທ່ານ ສາ­ລີ ນັນ­ທະ​ວົງ ຫົວ­ໜ້າ​ຂະ­ແໜງ​ວັດ­ທະ­ນະ­ທຳ ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນວ ທ່ານ​ນາງ ອໍ­ລະ­ໄທ ສັນ­ຕິ​ຄົງ​ຄາ ຜູ້­ອຳ­ນວຍ­ການ​ບໍ­ລິ­ສັດ ກຣິດ​ຕະ​ພົງ​ກຣຸບ ຈຳ­ກັດ ທ່ານ​ນາງ ນິ​ສຸ­ດາ ວົງ​ປະ­ເສີດ ນາງ​ສາວ ນວ ປີ 2018 ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ເວ­ທີ​ນາງ​ສາວ ນວ ຈັດ​ຂຶ້ນ​ທຸກໆ​ປີ ເຊິ່ງ​ປີ​ນີ້​ເປັນ​ປີ​ທີ 11 ເພື່ອ​ຄັດ​ເລືອກ​ສາວ​ງາມ​ທີ່​ມີ​ຄຸນ­ສົມ­ບັດ​ຄົບ​ຖ້ວນ ເພື່ອ​ເປັນ​ນາງ​ສາວ​ວັດ­ທະ­ນາ​ທຳ ນຳ­ໄປ​ເຜີຍ­ແຜ່​ແລກ­ປ່ຽນ​ວັດ­ທະ­ນາ​ທຳ​ຢູ່​ພາຍ​ໃນ ແລະ ຕ່າງ­ປະ­ເທດ ສຳ­ລັບ​ປີ 2019 ມີ​ຫຼາຍ​ລາ­ງວັນ ຄື: ນາງ​ສາວ​ສະ­ເໜ​ຍິງ​ລາວ (ລາ­ງວັນ​ຂອງ​ນ້ຳ​ຫອມ​ເຊຣິ​ຊ່າ) ນາງ​ສາວ​ຜິວ​ງາມ​ໜ້າ​ໃສ (ລາ­ງວັນ​ຈາກ​ແປ້ງ​ຊາ​ຊາ) ນາງ​ສາວ​ໜ້າ​ອ່ອນ​ກ່ອນ​ໄວ (ລາ­ງວັນ​ຈາກ​ນົມ​ດີ​ນ່າ) ສ່ວນ​ລາ­ງວັນ​ຈາກ​ກອງ​ແຂ່ງ­ຂັນ​ນາງ​ສາວ ນວ ມີ​ລາ­ງວັນ​ຊົມ­ເຊີຍ​ສຳ­ລັບ​ຜູ້​ທີ່​ບໍ່​ໄດ້​ຮັບ​ລາ­ງວັນ​ໃດໆ ລາ­ງວັນ​ນາງ​ສາວ​ຂວັນ​ໃຈ​ຊ່າງ​ພາບ ລາ­ງວັນ​ນາງ​ສາວ​ຂວັນ​ໃຈ​ມະ­ຫາ­ຊົນ ລາ­ງວັນ​ນາງ​ສາວ​ຂວັນ​ໃຈ​ມິດ­ຕະ­ພາບ ລາ­ງວັນ​ນາງ​ສາວ​ບຸກ​ຄະ​ລິກ​ກະ​ພາບ​ດີ ລາ­ງວັນ​ຮອງ​ອັນ​ດັບ 3 ຈຳ­ນວນ 4 ລາ­ງວັນ ຮອງ​ອັນ​ດັບ 2 ຈຳ­ນວນ 1 ລາ­ງວັນ ຮອງ​ອັນ​ດັບ 1 ຈຳ­ນວນ 1 ລາ­ງວັນ ແລະ ລາ­ງວັນ​ຊະ­ນະ​ເລີດ 1 ລາ­ງວັນ.

    ກອງ​ແຂ່ງ­ຂັນ​ນາງ​ສາວ ນວ ໄດ້​ເປີດ​ໂຫວດ​ເພື່ອ​ໃຫ້​ກຳ­ລັງ​ໃຈ​ນາງ​ສາວ ນວ 20 ນາງ​ສາວ ໂດຍ​ສາ­ມາດ​ໂຫວດ​ໄດ້​ດ້ວຍ​ການ​ສົ່ງ​ຂໍ້­ຄວາມ​ຜ່ານ​ເຄືອ​ຄ່າຍ ETL ພິມ​ໝາຍ​ເລກ​ທີ່​ທ່ານ​ມັກ MVT ຈາກ​ນັ້ນ​ຂັ້ນ​ດ້ວຍ​ເຄື່ອງ­ໝາຍ “*” ຕາມ​ດ້ວຍ​ຈຳ­ນວນ ແລະ ສົ່ງ​ໄປ​ເບີ 2018 ລາ­ຄາ 800 ກີບ​ຕໍ່​ຄັ້ງ ຫຼື Super Vote: MVT99*10 ຈະ​ໄດ້ 10 ຄະ­ແນນ ລາ­ຄາ 8.000 ກີບ​ຕໍ່​ຄັ້ງ ບໍ່​ໃຫ້​ເກີນ 100 ຄະ­ແນນ​ຕໍ່​ຄັ້ງ ເລີ່ມ​ໂຫວດ​ແຕ່​ວັນ​ທີ 1 ມີ­ນາ-6 ເມ­ສາ 2019.

    ທ່ານ ພູ​ວົງ ພາ​ມີ​ສິດ ປະ­ທານ​ຮ້ານ​ຄຳ​ພູ​ວົງ ຍັງ​ໄດ້​ມອບ​ມຸງ­ກຸດ 2 ມຸງ​ກົດ ໃຫ້​ຮອງ​ອັນ​ດັບ 1 ແລະ ຮອງ​ອັນ​ດັບ 2 ນາງ​ສາວ ນວ ເຊິ່ງ​ທັງ 3 ມຸງ­ກຸດ ມີ​ມູນ​ຄ່າ​ຫຼາຍ​ກວ່າ 150 ລ້ານ​ກີບ ຕາງ­ໜ້າ​ຮັບ​ໂດຍ​ທ່ານ​ນາງ ອໍ­ລະ­ໄທ ສັນ­ຕິ​ຄົງ​ຄາ ແລະ ອີກ 2 ມຸງ​ກົດ ກອງ​ແຂ່ງ­ຂັນ​ຈະ​ນຳ​ສະ­ເໜີ​ໃນ​ມື້​ຊີງ​ຊະ­ນະ​ເລີດ ວັນ​ທີ 6 ເມ­ສາ 2019.

ຂ່າວທີ່ກ່ຽວຂ້ອງ