ຍານ​ອາ​ວະ​ກາດ Soyuz MS-12 ນຳ​ເອົາ​ນັກ​ບິນ​ອາ​ວະ​ກາດ 3 ຄົນ​ຂຶ້ນ​ເມືອ​ຍັງ ISS

130 19 ມ.ນ. 2019 ຂ່າວຕ່າງປະເທດ
ຍານ​ອາ​ວະ​ກາດ Soyuz MS-12 ນຳ​ເອົາ​ນັກ​ບິນ​ອາ​ວະ​ກາດ 3 ຄົນ​ຂຶ້ນ​ເມືອ​ຍັງ ISS

     ກຸ່ມ​ບໍລິສັດ​ອາ​ວະ​ກາດ​ແຫ່ງ​ຊາດ​ຣັດ​ເຊຍ (Roscosmos) ແຈ້ງ​ໃຫ້​ຮູ້​ວ່າ ຍານ​ອາ​ວະ​ກາດ  Soyuz MS-12 ທີ່​ຜະລິດ​ໂດຍ​ຣັດ​ເຊຍ ໄດ້​ຖືກ​ຍິງ​ສົ່ງ​ຂຶ້ນ​ເມືອ​ຍັງ​ວົງ​ໂຄຈອນ ໃນ​ຮ່ວງ​ອາກາດ​ແລ້ວ ເມື່ອ​ຕອນ​ເຊົ້າ​ຂອງ​ວັນ​ທີ 15 ມີນາ​ທີ່​ຜ່ານ​ມາ ໂດຍ​ໄດ້​ນຳ​ເອົາ​ນັກ​ບິນ​ອາ​ວະ​ກາດ 3 ຄົນ ຂຶ້ນ​ເມືອ​ຍັງ ສະຖານີ​ອາ​ວະ​ກາດ​ສາກົນ (ISS).

    ຂ່າວ​ແຈ້ງວ່າ ຫຼັງ​ຈາກ​ທີ່​ຍິງ​ສົ່ງ​ອອກ​ໄປ​ຈາກ​ຖານ​ຍິງ​ໄດ້​ປະມານ 10 ນາທີ ຍານ Soyuz MS-12 ກໍ​ໄດ້​ແຍກ​ຕົວ​ອອກ​ຈາກ​ຖານ​ທີ​ສາມ​ຂອງ​ລູກ​ສອນ​ໄຟ​ທີ່​ໃຊ້​ໃນ​ການ​ຍິງ​ສົ່ງ ແລະ ​ສືບຕໍ່​ບິນ​ຂຶ້ນ​ເມືອ​ຍັງ ISS ພາຍ​ໃຕ້​ການ​ບັນຊາ​ຂອງ​ບັນດາ​ຊ່ຽວຊານ ຈາກ​ສູນ​ຕິດຕາມ​ພາລະກິດ​ຂອງ​ຣັດ​ເຊຍ ໂດຍ​ຄາດ​ວ່າ ຫຼັງ​ຈາກ​ທີ່​ບິນ​ໄດ້​ປະມານ 6 ຊົ່ວໂມງ ຍານ Soyuz MS-12 ຈະ​ໄປ​ເຖິງ  ISS.

   ບັນດາ​ນັກ​ບິນ​ອາ​ວະ​ກາດ ທີ່​ຂຶ້ນ​ໄປ​ຍັງ ISS ໃນ​ເທື່ອ​ນີ້ ປະກອບ​ມີ ອາ​ເລັກ​ເຊ ອອບ​ຊີ​ນິນ ທີ່​ມາ​ຈາກ Roscosmos ແລະ ​ນັກ​ບິນ​ອາ​ວະ​ກາດ​ຈາກ​ອົງການ​ການບິນ​ອາ​ວະ​ກາດ ສ ອາ​ເມ​ຣິ​ກາ  (NASA) ອີກ 2 ຄົນ ໄດ້ແກ່ ນິກ ເຮກ ແລະ​ຄຣິ​​ສ​ຕີ​ນາ ຄູກ.

    ຫຼັງ​ຈາກ​ທີ່ຍານ Soyuz MS-12 ເຊື່ອມ​ຈອດ​ກັບ ISS ແລ້ວ ນັກ​ບິນ​ອາ​ວະ​ກາດ​ສາມ​ຄົນ​ດັ່ງກ່າວ ຈະ​ໄດ້​ສົມທົບ​ກັບ​ນັກ​ບິນ​ອາ​ວະ​ກາດ 3 ຄົນ ທີ່​ມີໜ້າ​ຢູ່​ໃນ IS ມາ​ກ່ອນ ເພື່ອ​ດຳເນີນ​ການ​ທົດ​ລອງ​ກ່ຽວ​ກັບ​ຊີວະ​ສາດ ເຕັກ​ໂນ​ໂລ​ຊີ​ຊີວະ​ສາດ ວິທະຍາສາດ​ດ້ານ​ຟີ​ຊິກ ແລະ ​ວິທະຍາສາດ​ກ່ຽວ​ກັບ​ໜ່ວຍ​ໂລກ.

ຂ່າວທີ່ກ່ຽວຂ້ອງ