ຂ່າວຫຼ້າສຸດ

ປະທານາທິບໍດີ ມູນ​ເຈ​ອິນ ໃຫ້​ສັນຍາ​ເປີດ​ກວ້າງ​ການ​ຮ່ວມ​ມື​ກັບ​ກຳປູເຈຍ

141 19 ມີ.ນ. 2019 ຂ່າວຕ່າງປະເທດ
ປະທານາທິບໍດີ ມູນ​ເຈ​ອິນ ໃຫ້​ສັນຍາ​ເປີດ​ກວ້າງ​ການ​ຮ່ວມ​ມື​ກັບ​ກຳປູເຈຍ

     ໃນ​ຂອບ​ຂອງ​ການ​ຢ້ຽມຢາມ​ກຳປູເຈຍ​ຢ່າງ​ເປັນ​ທາງ​ການ ເມື່ອ​ວັນ​ທີ 15 ມີນາ​ທີ່​ຜ່ານ​ມາ ທ່ານ ມູນ​ເຈ​ອິນ ປະທານາທິບໍດີ ສ ເກົາຫຼີ ໄດ້​ພົບ​ປະ​ກັບ​ທ່ານ ຮຸນ​ແຊນ ນາຍົກ​ລັດ​ຖະ​ມົນ​​​ຕີ​ກຳປູເຈຍ ເພື່ອ​ປຶກສາ​ຫາລື​ກ່ຽວ​ກັບ​ບັນດາ​ມາດ​ຕະການ ໃນ​ການ​ເພີ່ມ​ທະວີ​ການ​ຮ່ວມ​ມື ມິດຕະພາບ ລະຫວ່າງ​ສອງ​ປະເທດ.

    ຂ່າວ​ແຈ້ງວ່າ ຜູ້ນຳ​ທັງ​ສອງ ໄດ້​ຕີ​ລາຄາ​ສູງ​ຕໍ່​ບັນດາ​ບາດກ້າວ ໃນ​ການ​ແລກປ່ຽນ​ທາງ​ດ້ານ​ການ​ຄ້າ ໂດຍ​ໄດ້​ຍົກ​ມູນ​ຄ່າ​ການ​ຄ້າ​ແບບ​ສອງ​ຝ່າຍ​ຂຶ້ນ​ຈາກ 54 ລ້ານ​ໂດ​ລາ​ສະຫະລັດ ໃນ​ປີ 1997 ເມື່ອ​ສອງ​ປະເທດ​ກັບ​ສູ່​ການ​ສ້າງ​ສາຍ​ພົວພັນ​ທາງ​ດ້ານ​ການ​ທູດ ຂຶ້ນ​ສູ່​ລະດັບ 970 ລ້ານ​ໂດ​ລາ​ສະຫະລັດ ໃນ​ປີ 2018.

    ສອງ​ຝ່າຍ​ໃຫ້ການ​ຢັ້ງຢືນ​ວ່າ ມີ​ກວ່າ 200 ວິ​ສາ​ຫະ​ກິດ​ຂອງ ສ ເກົາຫຼີ ທີ່​ພວມ​ເຄື່ອນ​ໄຫວ​ຢູ່​ໃນ​ກຳປູເຈຍ ມີ​ບົດບາດ​ທີ່​ສຳຄັນ ໃນ​ການ​ຊຸກຍູ້​ການ​ປະຕິບັດ ເປົ້າ​ໝາຍ​ຄວາມ​ເຕີບ​ໂຕ​ຮ່ວມ​ກັນ. ໃນ​ຂະນະ​ດຽວ​ກັນ ສອງ​ຝ່າຍ​ກໍ​ຈະ​ຊຸກຍູ້​ການ​ເຈລະຈາ ກ່ຽວ​ກັບ​ສັນຍາ​ວ່າ​ດ້ວຍ​ການ​ຫຼີກເວັ້ນ​ການ​ເສຍ​ພາສີ​ຊ້ອນ ເພີ່ມ​ທະວີ​ການ​ຊ່ວຍເຫຼືອ ແລະ ສົ່ງເສີມ​ບັນດາ​ວິ​ສາ​ຫະ​ກິດ​ຂອງ ສ ເກົາຫຼີ ຮ່ວມ​ມື​ລົງທຶນ​ຢູ່​ໃນ​ກຳປູເຈຍ.

    ປະທານາທິບໍດີ ມູນ​ເຈ​ອິນ ແລະ ນາຍົກລັດຖະມົນຕີ ຮຸນ​ແຊນ ຍັງ​ໄດ້​ເຫັນ​ດີ​ເປັນ​ເອກະສັນ​ກັນ ທີ່​ຈະ​ສືບຕໍ່​ຮ່ວມ​ມື​ໃນ​ຂົງເຂດ​ກະສິກຳ ໂດຍ​ທີ່​ມີ​ຈຸດ​ເນັ້ນ​ໜັກ​ກໍ​ແມ່ນ​ການ​ເປີດ​ສູນ​ແຈກ​ຢາຍ​ຜະລິດ​ຕະ​ພັນ​ກະສິກຳ ເປີດ​ອົງການ​ກວດ​ພະຍາດ​ກັບ​ຜະລິດ​ຕະ​ພັນ​ກະສິກຳ​ແຫ່ງ​ທຳ​ອິດ​ຂອງ​ກຳປູເຈຍ ເມື່ອ​ເດືອນ​ກຸມພາ​ທີ່​ຜ່ານ​ມາ ໂດຍ​ມີ​ການ​ເຂົ້າ​ຮ່ວມ​ໃນ​ການ​ລົງທຶນ​ຂອງ​ວິ​ສາ​ຫະ​ກິດ​ສອງ​ປະເທດ.

    ໃນ​ຂະນະ​ດຽວ​ກັນ ປະທານາທິບໍດີ ມູນ​ເຈ​ອິນ ໄດ້​ຕີ​ລາຄາ​ຢ່າງ​ຕັ້ງໜ້າ ຕໍ່​ການ​ທີ່​ສອງ​ຝ່າຍ​ລົງ​ນາມ​ໃນ​ສັນຍາ​ວ່າ​ດ້ວຍ​ການ​ຍົກ​ກຳນົດ​ລະດັບ​ໃຫ້​ກູ້​ຢືມ ຈາກ​ກອງ​ທຶນ​ການ​ຮ່ວມ​ມື​ເພື່ອ​ການ​ພັດທະນາ​ເສດຖະກິດ  (EDCF) ຂອງ ສ ເກົາຫຼີ ຂຶ້ນ​ເປັນ  700 ລ້ານ​ໂດ​ລາ​ສະຫະລັດ ໃນ​ໄລຍະ​ປີ 2019-2023.

 

ຂ່າວທີ່ກ່ຽວຂ້ອງ