ມີ​ຜູ້​ເສຍ​ຊີວິດ 370.000 ກວ່າ​ຄົນ ຈາກ​ສົງຄາມ​ແກ່ຍາວ 8 ປີ ຢູ່​ໃນ​ຊີ​ຣີ

205 19 ມ.ນ. 2019 ຂ່າວຕ່າງປະເທດ
ມີ​ຜູ້​ເສຍ​ຊີວິດ 370.000 ກວ່າ​ຄົນ ຈາກ​ສົງຄາມ​ແກ່ຍາວ 8 ປີ ຢູ່​ໃນ​ຊີ​ຣີ

    ການ​ຄິດໄລ່ ຂອງ​ອົງການ​ຕິດຕາມ​ສິດທິ​ມະນຸ​ຊີ​ຣີ (SOHR) ໃຫ້​ຮູ້​ວ່າ ສົງຄາມ​ພາຍ​ໃນ​ປະເທດ​ຊີ​ຣີ ທີ່​ແກ່ຍາວ​ເປັນ​ເວລາ 8 ປີ​ທີ່​ຜ່ານ​ມາ ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ 370.000 ກວ່າ​ຄົນ ແລະ ມີ​ປະມານ 13 ລ້ານ​ຄົນ ຕ້ອງ​ໄດ້​ໜີ​ອອກ​ໄປ​ຈາກ​ເຮືອນ​ຊານ ຫຼື​ພັດ​ພາກ​ຈາກ​ບ້ານ​ເກີດ​ເມືອງ​ນອນ. ນອກຈາກ​ນັ້ນແລ້ວ ຍັງ​ສ້າງ​ຄວາມ​ເສຍ​ຫາຍ ເປັນ​ມູນ​ຄ່າ​ຫຼາຍ​ຕື້​ໂດ​ລາ​ສະຫະລັດ ໃຫ້​ແກ່​ຊີ​ຣີ.

    SOHR ໃຫ້​ຮູ້​ວ່າ ໃນ​ຈຳນວນ​ຜູ້​ເສຍ​ຊີວິດ​ດັ່ງກ່າວ ມີ 112.000 ຄົນ ເປັນ​ສາມັນ​ຊົນ (ໃນ​ນັ້ນ​ມີ​ເດັກນ້ອຍ 21.000 ກວ່າ​ຄົນ ແລະ​ແມ່ຍິງ 13.000 ຄົນ); ທະຫານ​ຂອງ​ຝ່າຍ​ລັດຖະບານ ແລະ​ມື​ປືນ​ທີ່​ໃຫ້ການ​ສະໜັບສະໜູນ​ລັດຖະບານ​ຊີ​ຣີ  125.000  ຄົນ; ແລະ ມື​ປືນ​ອື່ນໆ 67.000 ຄົນ (ລວມ​ທັງ​ກອງ​ກຳລັງ​ລຸກ​ຮື​ຂຶ້ນ ແລະ ຊາວ​ເຄີດ).

    ກອງ​ກຳລັງ​ຕ່າງໆ​ໄດ້​ສັງຫານ​ນັກຮົບ​ສັກສິດ​ໄປ​ປະມານ 66.000 ຄົນ ຊຶ່ງ​ຕົ້ນຕໍ​ແມ່ນ​ມື​ປືນ​ທີ່​ຂຶ້ນ​ກັບ​ອົງການ ລັດ​ອິ​ສລາມ (IS) ແລະ ກອງ​ກຳລັງ​ລຸກ​ຮື​ຂຶ້ນ Hayat Tahrir al-Sham (HTS) ທີ່​ພົວພັນ​ເຖິງ​ເຄືອ​ຂ່າຍ​ກໍ່​ການ​ຮ້າຍ​ສາກົນ ອາ​​ລ-ໄກ​ດາ (al-Qaeda).

    ໃນ​ຂະນະ​ດຽວ​ກັນ ທ່ານ ຄຣິ​​ສຕົສ ສະ​ໄຕ​ເລຍ​ນິ​​ສ​ເດີ ກຳມະການ​ຮັບຜິດຊອບ​ວຽກ​ງານ​ມະນຸດສະທຳ ຂອງ​ສະຫະພາບ​ເອີ​ຣົບ (EU) ແຈ້ງ​ໃຫ້​ຮູ້​ຢູ່​ໃນ​ຕອນ​ທ້າຍ​ຂອງ​ກອງ​ປະຊຸມ​ກ່ຽວ​ກັບ​ຄວາມ​ຊ່ວຍເຫຼືອ​ດ້ານ​ການ​ເງິນ​ໃຫ້​ແກ່​ຊີ​ຣີ ຊຶ່ງ​ຈັດ​ຂຶ້ນ​ຢູ່​ທີ່​ນະຄອນຫຼວງ ບຣຸກ​ແຊນ ເມື່ອ​ວັນ​ທີ 14 ມີນາ​ທີ່​ຜ່ານ​ມາ​ວ່າ ບັນດາ​ຜູ້​ໃຫ້ການ​ອຸປະຖຳ​ທາງ​ດ້ານ​ການ​ເງິນ ໄດ້​ໃຫ້​ສັນຍາ​ຊ່ວຍເຫຼືອ​ເກືອບ 7 ຕື້ ໂດ​ລາ​ສະຫະລັດ ພາຍ​ໃນ​ປີ 2019 ໃຫ້​ແກ່​ສາມັນ​ຊົນ​ທີ່​ຈົມ​ຢູ່​ໃນ​ການ​ພິພາດ​ນອງ​ເລືອດ​ຢູ່​ໃນ​ຊີ​ຣີ ແຕ່​ວ່າ​ຕົວ​ເລກ​ດັ່ງກ່າວ ບໍ່​ບັນລຸ​ຕົວ​ເລກ​ທີ່​ຈຳເປັນ ຕາມ​ການ​ຄາດ​ຄະເນ​ຂອງ​ສະຫະ​ປະຊາ​ຊາດ (​ສປຊ).

    ກ່ອນ​ຈັດ​ກອງ​ປະຊຸມ​ດັ່ງກ່າວ​ນັ້ນ ​ສປຊ ໃຫ້ການ​ຄາດ​ຄະເນ​ຄວາມ​ຕ້ອງການ​ທີ່ 5,5 ຕື້ ໂດ​ລາ​ສະຫະລັດ ເພື່ອ​ຊ່ວຍເຫຼືອ​ປະຊາຊົນ​ຊີ​ຣີ ປະມານ 5,6 ລ້ານ​ຄົນ ທີ່​ຈຳເປັນ​ຕ້ອງ​ໄດ້​ໜີ​ໄປ​ລີ້​ໄພ​ຢູ່​ໃນ​ບັນດາ​ປະເທດ​ໃກ້​ຄຽງ ຊຶ່ງ​ສ່ວນ​ຫຼາຍ​ແມ່ນ​ຢູ່​ໃນ​ຕວກ​ກີ ລີ​ບັງ ແລະ ຊອກ​ດາ​ນີ. ນອກຈາກ​ນັ້ນແລ້ວ ຍັງ​ມີ​ຄວາມ​ຕ້ອງການ​ຕື່ມ 3,3 ຕື້​ໂດ​ລາ​ສະຫະລັດ ເພື່ອ​ນຳໄປ​ຊ່ວຍເຫຼືອ​ປະຊາຊົນ​ຊີ​ຣີ 12 ລ້ານ​ຄົນ ທີ່​ດຳລົງ​ຊີວິດ​ຢູ່​ໃນ​ປະເທດ​ຂອງ​ຕົນ ທີ່​ພວມ​ປະ​ເຊີນ​ກັບ​ວິ​ກິດ​ການ​ມະນຸດສະທຳ​ຢ່າງ​ຮ້າຍ​ແຮງ.

 

ຂ່າວທີ່ກ່ຽວຂ້ອງ