ມີ​ຜູ້​ເສຍ​ຊີວິດ​ຈຳນວນ​ຫຼາຍ ຈາກ​​ໄພ​ທຳ​ມະ​ຊາດ​ຮ້າຍ​ແຮງ​ຢູ່​ໃນ​ປະ​ເທດ​ຕ່າງໆ

200 19 ມ.ນ. 2019 ຂ່າວຕ່າງປະເທດ
ມີ​ຜູ້​ເສຍ​ຊີວິດ​ຈຳນວນ​ຫຼາຍ ຈາກ​​ໄພ​ທຳ​ມະ​ຊາດ​ຮ້າຍ​ແຮງ​ຢູ່​ໃນ​ປະ​ເທດ​ຕ່າງໆ

     ອົງການ​ປ້ອງ​ກັນ​ໄພພິບັດ​ແຫ່ງ​ຊາດ​ອິນ​ໂດ​ເນ​ເຊຍ ແຈ້ງ​ໃຫ້​ຮູ້ເມື່ອ​ວັນ​ທີ 17 ມີນາ​ນີ້​ວ່າ ພາຍຸ​ຝົນ​ຮ້າຍ​ແຮງ​ຢູ່​ໃນ​ອິນ​ໂດ​ເນ​ເຊຍ ໄດ້​ເຮັດ​ໃຫ້​ເກີດ​ນ້ຳນອງ ແລະ ​ດິນ​ເຈື່ອນ​ຢູ່​ໃນ​ເຂດ​ພູ​ດອຍ​ຂອງ​ແຂວງ​ປາ​ປົວ (ທິດຕາເວັນອອກ​ຂອງ​ອິນ​ໂດ​ເນ​ເຊຍ) ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ​ຢ່າງ​ໜ້ອຍ 50 ຄົນ ແລະ ບາດເຈັບ​ອີກ 70 ກວ່າ​ຄົນ.

    ນອກຈາກ​ນັ້ນແລ້ວ ດິນ​ເຈື່ອນ​ຍັງ​ເຮັດ​ໃຫ້​ເຮືອນ​ຊານ​ຖືກ​ທຳລາຍ​ຫຼາຍ​ສິບ​ຫຼັງ ຖະໜົນ​ຫົນທາງ ແລະ ​ຂົວ​ຖືກ​ເປ່​ເພ​ຮ້າຍ​ແຮງ ເຮັດ​ໃຫ້​ກີດຂວາງ​ຕໍ່​ການ​ຊ່ວຍເຫຼືອ​ກູ້​ໄພ. ໃນ​ຂະນະ​ດຽວ​ກັນ ກໍ​ມີ 4.000 ກວ່າ​ຄົນ ພວມ​ອາ​ໃສ​ຢູ່​ໃນ​ຕູບ​ເປັນ​ບ່ອນຢູ່​ອາ​ໃສ​ຊົ່ວຄາວ ແລະ ​ເຈົ້າ​ໜ້າທີ່​ໃນ​ທ້ອງຖິ່ນ ໄດ້​ປະກາດ​ພາວະ​ສຸກ​ເສີນ​ແກ່ຍາວ​ເປັນ​ເວລາ 14 ວັນ.

    ທີ່​ປະເທດ​ຈີນ ເຈົ້າ​ໜ້າທີ່​ໃນ​ທ້ອງຖິ່ນ ແຈ້ງ​ໃຫ້​ຮູ້ເມື່ອ​ວັນ​ທີ 17 ມີນາ​ນີ້​ວ່າ ເຫດການ​ດິນ​ເຈື່ອນ​ໄດ້​ເຮັດ​ໃຫ້​ອາຄານ​ຫຼັງ​ໜຶ່ງ​ພັງ​ຖະ​ຫຼົ່ມ ຢູ່​ໃນ​ພື້ນ​ທີ່​ແຂວງ​ຊານ​ຊີ (ພາກ​ເໜືອ​ຈີນ) ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ 10 ຄົນ ບາດເຈັບ 13 ຄົນ ແລະ​ຫາຍ​ສາບ​ສູນ 10 ຄົນ.

    ໃນ​ຂະນະ​ດຽວ​ກັນ ຫຼັງ​ຈາກ​ທີ່​ໄດ້​ພັດ​ຜ່ານ​ປະເທດ​ຊິມ​ບັບ​ເວ ແລ້ວ ພາຍຸ​ເຂດ​ຮ້ອນ ອີ​ດາຍ (Idai) ກໍ​ໄດ້​ສືບຕໍ່​ພັດ​ໄປ​ທາງ​ທິດຕາເວັນອອກ​ຂອງ​ປະເທດ​ນີ້ ໃນ​ວັນ​ທີ 17 ມີນາ ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ​ຢ່າງ​ໜ້ອຍ 31 ຄົນ ແລະ​ຫາຍ​ສາບ​ສູນ 70 ກວ່າ​ຄົນ. ຈາກ​ສະພາບ​ການ​ດັ່ງກ່າວ ປະທານາທິບໍດີ​ຊິມ​ບັບ​ເວ ເອມ​ເມີ​ຊອນ ມະ​ນັນ​ກາກ​ວາ ທີ່ຢູ່​ລະຫວ່າງ​ການ​ຢ້ຽມຢາມ ສະຫະລັດ ອາ​ຣັບ​ເອ​ມີ​ເຣດ ໄດ້​ປະກາດ​ພາວະ​ໄພພິບັດ ຢູ່​ໃນ​ເຂດ​ທີ່​ໄດ້​ຮັບ​ຜົນ​ກະທົບ​ໜັກໜ່ວງ​ຈາກ​ພາຍຸ​ດັ່ງກ່າວ.

    ກ່ອນ​ໜ້າ​ນັ້ນ ເມື່ອ​ວັນ​ທີ 15 ມີນາ ພາຍຸ ອີ​ດາຍ ໄດ້​ພັດ​ຜ່ານ​ພາກ​ກາງ​ໂມ​ຊຳ​ບິກ ເປັນ​ເຫດ​ໃຫ້​ມີ​ຜູ້​ເສຍ​ຊີວິດ​ຢ່າງ​ໜ້ອຍ 21 ຄົນ ແລະ ປະຊາຊົນ​ເຄິ່ງ​ລ້ານ​ຄົນ ຢູ່​ໃນ​ເມືອງ ເບ​ຣາ ຕົກ​ຢູ່​ໃນ​ສະພາບ​ຖືກ​ໂດດດ່ຽວ. ເຈົ້າ​ໜ້າທີ່​ໃນ​ທ້ອງຖິ່ນ​ຂອງ​ໂມ​ຊຳ​ບິກ ຍັງ​ໃຫ້​ຮູ້​ຕື່ມ​ວ່າ ຝົນຕົກ​ໃນ​ຕົ້ນ​ອາທິດ​ທີ່​ຜ່ານ​ມາ ກ່ອນ​ທີ່​ຈະ​ເກີດ​ພາຍຸ​ອີ​ດາຍ ນັ້ນ​ກໍ​ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ 66 ຄົນ.

    ສ່ວນ​ທີ່​ປະເທດ​ມາລາ​ວີ ກໍ​ມີ​ຜູ້​ເສຍ​ຊີວິດ 56 ຄົນ ແລະ ມີ​ຜູ້​ໄດ້​ຮັບ​ຜົນ​ກະທົບ​ອີກ​ເກືອບ 1 ລ້ານ​ຄົນ ຈາກ​ຝົນຕົກ​ໜັກ​ເມື່ອ​ອາທິດ​ທີ່​ຜ່ານ​ມາ.

 

ຂ່າວທີ່ກ່ຽວຂ້ອງ