ຂ່າວຫຼ້າສຸດ

ນູ​ແວນ ​ເຊ​ລັງ ຈັດ​ພິທີ​ໄວ້​ທຸກ ​ໃຫ້​ແກ່​ຜູ້​ເສຍ​ຊີວິດ​ຈາກ​ເຫດການ​ສັງຫານ​ໂຫດ

278 19 ມ.ນ. 2019 ຂ່າວຕ່າງປະເທດ
ນູ​ແວນ ​ເຊ​ລັງ ຈັດ​ພິທີ​ໄວ້​ທຸກ ​ໃຫ້​ແກ່​ຜູ້​ເສຍ​ຊີວິດ​ຈາກ​ເຫດການ​ສັງຫານ​ໂຫດ

    ຕາມ​ຂ່າວ​ຕ່າງປະເທດ ວັນ​ທີ 17 ມີນາ​ນີ້ ນູ​ແວນ ເຊ​ລັງ ໄດ້​ຈັດ​ພິທີ​ໄວ້​ທຸກ​ໃຫ້​ແກ່​ຜູ້​ໄດ້​ຮັບ​ເຄາະ​ຮ້າຍ 50 ຄົນ ທີ່​ໄດ້​ເສຍ​ຊີວິດ​ຈາກ​ເຫດການ​ໂຈມ​ຕີ​ກໍ່​ການ​ຮ້າຍ ຢູ່​ໃນ​ສະຖານທີ່​ສັກສິດ​ຂອງ​ຊາວ​ມຸ​ສລິມ ໃນ​ນະຄອນ ໄຄຣ​ເຊີດ ເມື່ອ​ວັນ​ທີ 15 ມີນາ​ທີ່​ຜ່ານ​ມາ ທີ່​ເປັນ​ເຫດການ​ສັງຫານ​ໂຫດ​ໂດຍ​ໃຊ້​ອາວຸດ​ປືນ​ໃນ​ການ​ກໍ່​ເຫດ ຖື​ວ່າ​ເປັນ​ເຫດການ​ນອງ​ເລືອດ​ທີ່​ສຸດ ໃນ​ປະຫວັດສາດ​ຂອງ ນູ​ແວນ ເຊ​ລັງ.

    ຜູ້ອຳນວຍການ​ອົງການ​ຕຳຫຼວດ ນູ​ແວນ ເຊ​ລັງ ແຈ້ງ​ໃຫ້​ຮູ້​ກ່ອນ​ໜ້າ​ນີ້​ວ່າ ກອງ​ກຳລັງ​ທີ່​ກ່ຽວຂ້ອງ ໄດ້​ພົບ​ເຫັນ​ຮ່າງ​ຜູ້​ເສຍ​ຊີວິດ​ອີກ 1 ສົບ ຢູ່​ໃນ​ສະຖານທີ່​ສັກສິດ Al Noor ຂອງ​ຊາວ​ມຸ​ສລິມ ເຮັດ​ໃຫ້​ຍອດ​ຈຳນວນ​ຜູ້​ເສຍ​ຊີວິດ ເພີ່ມ​ຂຶ້ນ​ເປັນ 50 ຄົນ ໃນ​ຂະນະ​ທີ່​ຜູ້​ໄດ້​ຮັບ​ບາດເຈັບ​ຈາກ​ເຫດການ​ຮຸນ​ແຮງ​ດັ່ງກ່າວ ກໍ​ມີ 50 ຄົນ ໃນ​ນັ້ນ​ມີ​ເດັກນ້ອຍ​ອາຍຸ 5 ປີ ລວມ​ຢູ່​ນຳ 1 ຄົນ.

    ນາຍົກລັດຖະມົນຕີ​ນູ​ແວນ ເຊ​ລັງ ຈາ​ຊິນ​ດາ ອາ​ເດນ ໄດ້​ເດີນທາງ​ໄປ​ຍັງ​ຫຼາຍ​ສະຖານທີ່ ໃນ​ນະຄອນ ໄຄຣ​ເຊີດ ເພື່ອ​ແບ່ງ​ເບົາ​ຄວາມທຸກ​ໂສກ ກັບ​ຊຸມ​ຊົນ​ຊາວ​ມຸ​ສລິມ ໂດຍ​ທີ່​ນາງ ອາ​ເດນ ໄດ້​ກ່າວ​ຢູ່​ທີ່​ສູນ​ຕັ້ງ​ຖິ່ນ​ຖານ ຄັນ​ເຕີ​ບູ​ຣີ ວ່າ ນູ​ແວນ ເຊ​ລັງ ເປັນ​ກຸ່ມ​ກ້ອນ​ແຫ່ງ​ຄວາມ​ເປັນ​ເອກະ​ພາບ ແລະ ພ້ອມ​ກັນ​ແບ່ງ​ເບົາ​ຄວາມທຸກ​ໂສກ​ອັນ​ໃຫຍ່​ໂຕ​ໃນ​ເທື່ອ​ນີ້.

ຂ່າວທີ່ກ່ຽວຂ້ອງ