ຂ່າວຫຼ້າສຸດ

ກາແດງລາວ ສຸມໃສ່ 6 ກິດຈະກຳຊ່ວຍເຫຼືອປະຊາຊົນເມືອງສະໜາມໄຊ

223 20 ມ.ນ. 2019 ຂ່າວໜ້າ​ໜຶ່ງ
ກາແດງລາວ ສຸມໃສ່ 6 ກິດຈະກຳຊ່ວຍເຫຼືອປະຊາຊົນເມືອງສະໜາມໄຊ

    ກອງ​ປະ­ຊຸມ​ແນະ­ນຳ​ໂຄງ­ການ​ຊ່ວຍ­ເຫຼືອ ແລະ ຟື້ນ​ຟູ​ຜູ້​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ ຢູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ວັນ​ທີ 13 ມີ­ນາ ຜ່ານ​ມາ ຢູ່​ແຂວງ​ດັ່ງ­ກ່າວ ໂດຍ​ເປັນ​ປະ­ທານ​ຂອງ​ທ່ານ ຄຳ​ຮຸ່ງ ເຮືອງ​ວົງ​ສີ ປະ­ທານ​ອົງ­ການ​ກາ­ແດງ​ລາວ ມີ​ທ່ານ ອຸ່ນ​ຫຼ້າ ໄຊ​ຍະ​ສິດ ຮອງ​ເຈົ້າ­ແຂວງ​ອັດ​ຕະ​ປື ຜູ້​ຊີ້​ນຳ​ຂົງ­ເຂດ​ວັດ­ທະ­ນະ­ທຳ-ສັງ­ຄົມ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ກາ​ວີ​ພອນ ສຸດ­ທິ ຫົວ­ໜ້າ​ກອງ​ຊ່ວຍ­ເຫຼືອ​ບັນ­ເທົາ​ທຸກ ອົງ­ການ​ກາ­ແດງ​ລາວ ກ່າວ​ວ່າ: ນັບ​ຕັ້ງ­ແຕ່​ວັນ​ທີ 23 ກໍ­ລະ­ກົດ 2018 ເຖິງ​ປັດ­ຈຸ­ບັນ ພວກ​ເຮົາ​ໄດ້​ສຸມ​ໃສ່​ວຽກ​ງານ​ຕົ້ນ­ຕໍ​ຄື: ສ້າງ​ທີ່​ພັກ​ອາ­ໄສ​ຊົ່ວ­ຄາວ ຫຼຸດ­ຜ່ອນ​ຄວາມ​ສ່ຽງ​ໄພ­ພິ­ບັດ ສ້າງ​ເຄື່ອງ​ກອງ​ນ້ຳ ແຈກ​ຢາຍ​ເຄື່ອງ­ນຸ່ງ ເຂົ້າ­ສານ-ອາ­ຫານ ສ້າງ​ວິດ­ຖ່າຍ ຄົ້ນ​ຫາ​ຜູ້​ສູນ­ຫາຍ ແລະ ອື່ນໆ ຕາມ​ສະ­ພາບ​ຄວາມ​ເປັນ​ຈິງ ເຊິ່ງ​ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ສັງ­ຄົມ ກາ­ແດງ​ປະ­ເທດ​ເພື່ອນ​ມິດ ສະ­ຫະ­ພັນ​ກາ­ແດງ ແລະ ຊີກ​ວົງ​ເດືອນ​ແດງ​ສາ­ກົນ ຄະ­ນະ​ກຳ­ມະ­ການ​ກາ­ແດງ​ສາ­ກົນ ແລະ ກາ­ແດງ​ປະ­ເທດ​ອື່ນໆ.

    ເພື່ອ​ໃຫ້­ການ​ຊ່ວຍ­ເຫຼືອ​ປະ­ຊາ­ຊົນ​ໃນ​ໄລ­ຍະ​ຟື້ນ​ຟູ ແນ­ໃສ່​ໃຫ້​ເຂົາ­ເຈົ້າ​ມີ​ຊີ­ວິດ​ການ​ເປັນ​ຢູ່​ດີ​ຂຶ້ນ​ກວ່າ​ເກົ່າ ພວກ​ເຮົາ​ຈະ​ສຸມ​ໃສ່ 6 ກິດ­ຈະ­ກຳ​ຄື: ໂຄງ­ການ​ສ້ອມ­ແປງ​ເຮືອນ ແລະ ທີ່​ພັກ​ອາ­ໄສ 500 ຫຼັງ ວິດ­ຖ່າຍ 500 ໜ່ວຍ ສົ່ງ­ເສີມ​ຊີ­ວິດ​ການ​ເປັນ​ຢູ່​ປູກ­ຝັງ-ລ້ຽງ­ສັດ 500 ຄອບ­ຄົວ ສົ່ງ­ເສີມ​ວຽກ​ງານ​ສຸ​ຂະ​ອະ­ນາ­ໄມ ສຸ­ຂາ­ພິ­ບານ ແລະ ນ້ຳ​ສະ­ອາດ ສົ່ງ­ເສີມ​ບົດ­ບາດ​ຍິງ-ຊາຍ ໂຄງ­ການ​ຫຼຸດ­ຜ່ອນ​ຄວາມ​ສ່ຽງ​ໄພ­ພິ­ບັດ​ຊຸມ​ຊົນ ແລະ ສົ່ງ­ເສີມ​ຄວາມ​ເຂັ້ມ­ແຂງ​ໃຫ້​ອາ­ສາ​ສະ­ໝັກ ແລະ ພະ­ນັກ­ງານ ເຊິ່ງ​ຈະ​ໄດ້​ຈັດ​ຢູ່ 4 ສູນ​ຄື: ສູນ​ຕະ​ມໍ​ຢອດ ສູນ​ປິນ​ດົງ ສູນ​ດອນ​ບົກ ສູນ​ຫາດ​ຍາວ ແລະ ສູນ​ດົງ​ບາກ ໂດຍ​ຈະ​ໃຫ້​ສຳ­ເລັດ​ໃນ​ທ້າຍ​ປີ 2019.

ຂ່າວທີ່ກ່ຽວຂ້ອງ