ລາວ-ໄທ ແລກປ່ຽນສິລະປະ ຫັດຖະກຳແກະສະຫຼັກໄມ້

222 20 ມີ.ນ. 2019 ຂ່າວໜ້າ​ໜຶ່ງ
ລາວ-ໄທ ແລກປ່ຽນສິລະປະ ຫັດຖະກຳແກະສະຫຼັກໄມ້

    ພິ­ທີ​ໄຂ​ງານ​ແລກ­ປ່ຽນ​ສິ­ລະ​ປະ ຫັດ­ຖະ­ກຳ​ແກະ­ສະ­ຫຼັກ​ໄມ້ ຮ່ວມ ລາວ-ໄທ ຈັດ​ຂຶ້ນ​ວັນ​ທີ 19 ມີ­ນາ 2019 ຢູ່​ສູນ​ພັດ­ທະ­ນາ ແລະ ທົດ​ສອບ​ສີ­ມື​ແຮງ​ງານ​ເວດ​ສະ​ພົງ ໂດຍ​ມີ​ທ່ານ ໂຍ­ທິນ ເວດ​ສະ​ພົງ ປະ­ທານ​ບໍ­ລິ­ຫານ​ສູນ​ພັດ­ທະ­ນາ ແລະ ທົດ​ສອບ​ສີ­ມື​ແຮງ​ງານ​ເວດ​ສະ​ພົງ ປະ­ທານ​ເຄືອ​ຄ່າຍ​ການ​ຜະ­ລິດ​ອຸດ­ສາ­ຫະ­ກຳ-ຫັດ­ຖະ­ກຳ​ໄມ້ ທ່ານ​ນາງ ແສງ​ຣາ​ວີ ສິງ​ທະ​ວິ­ບູນ ຮອງ​ອຳ­ນວຍ​ການ​ສູນ​ສົ່ງ­ເສີມ​ສິ­ລະ​ປະ​ຊີບ​ຣາ​ຊະ​ອາ­ນາ­ຈັກ​ໄທ ມີ​ຜູ້­ຕາງ­ໜ້າ​ຈາກ​ກະ­ຊວງ ສະ​ຖາ​ບັນ ພ້ອມ​ດ້ວຍ​ຄູ-ອາ­ຈານ ແລະ ພະ­ນັກ­ງານ​ວິ­ຊາ​ການ​ສອງ​ຝ່າຍ​ເຂົ້າ​ຮ່ວມ.

    ທ່ານ ໂຍ­ທິນ ເວດ​ສະ​ພົງ ກ່າວ​ວ່າ: ງານ​ສິ­ລະ​ປະ ຫັດ­ຖະ­ກຳ ແກະ­ສະ­ຫຼັກ​ລວ­ດລາຍ​ຂອງ​ລາວ ໄດ້​ເກີດ​ມາ​ແຕ່​ບັນ­ພະ­ບຸ­ລຸດ​ລາວ ເຊິ່ງ​ເຫັນ​ໄດ້​ຕາມ​ວັດ​ວາ​ອາ​ຮາມ​ຕ່າງໆ ດ້ວຍ​ການ​ບົ່ງ​ບອກ​ເຖິງ​ເອ­ກະ­ລັກ​ຂອງ​ຊາດ ສືບ​ທອດ​ກັນ​ມາ​ເຖິງ​ປັດ­ຈຸ­ບັນ ລາວ-ໄທ ໄດ້​ມີ​ໂອ­ກາດ​ຮ່ວມ​ສືບ​ມໍ­ລະ­ດົກ​ຕົກ​ທອດ​ມາ​ແຕ່​ບູ­ຮານ​ນະ​ການ​ເຊັ່ນ​ກັນ ມາ​ຮ່ວມ​ກັນ​ແລກ­ປ່ຽນ​ງານ​ແກະ­ສະ­ຫຼັກ​ໄມ້ ຮ່ວມ​ກັນ​ເຮັດ​ໃຫ້​ຄວາມ​ສຳ­ພັນ​ດີ​ຍິ່ງ​ຂຶ້ນ ເພື່ອ​ແລກ­ປ່ຽນ​ບົດ­ຮຽນ​ດ້ານ​ວຽກ​ແກະ­ສະ­ຫຼັກ​ໄມ້​ລວ­ດລາຍ​ຕ່າງໆ ລະ­ຫວ່າງ​ສູນ​ພັດ­ທະ­ນາ ແລະ ທົດ​ສອບ​ສີ­ມື​ແຮງ​ງານ​ເວດ​ສະ​ພົງ ແລະ ສູນ​ສົ່ງ­ເສີມ​ສິ­ລະ​ປະ​ຊີບ​ຣາ​ຊະ​ອາ­ນາ­ຈັກ​ໄທ ມີ​ຄວາມ​ພົ້ນ​ເດັ່ນ​ຂຶ້ນ​ໄປ​ສູ່​ເວ­ທີ​ສາ­ກົນ.

    ທ່ານ​ນາງ ແສງ​ຣາ​ວີ ສິງ​ທະ​ວິ­ບູນ ກ່າວ​ວ່າ: ວຽກ​ຫຼັກ​ຂອງ​ອົງ​ກອນ​ປະ­ຈຳ​ປີ 2019 ແມ່ນ​ເນັ້ນ​ການ​ພັດ­ທະ­ນາ​ວຽກ​ຫັດ­ຖະ­ກຳ​ປະ­ເພດ​ໄມ້ ຮ່ວມ​ກັບ​ໜ່ວຍ​ງານ​ພາກ​ລັດ­ຖະ­ບານ 2 ປະ­ເທດ​ໃນ​ພາກ​ພື້ນ ຄື: ການ​ເນັ້ນ​ການ​ພັດ­ທະ­ນາ​ຫັດ­ຖະ­ກຳ​ໄມ້ ໂດຍ​ດຳ­ເນີນ​ງານ​ຮ່ວມ​ກັບ​ປະ­ເທດ​ໃນ​ພາກ​ພື້ນ​ອາ­ຊີ ທີ່​ມີ​ຄວາມ​ຊ່ຽວ­ຊານ​ງານ​ຫັດ­ຖະ­ກຳ​ໄມ້ ທັງ​ໃນ​ແບບ​ລວມ​ສະ­ໄໝ ເຊັ່ນ ປະ­ເທດ​ຍີ່­ປຸ່ນ ແລະ ສປປ ລາວ ເຊິ່ງ​ມີ​ມໍ­ລະ­ດົກ​ພູມ​ປັນ­ຍາ​ງານ​ຫັດ­ຖະ­ກຳ​ໄມ້​ທີ່​ມີ​ເອ­ກະ­ລັກ ແລະ ຮາກ​ຖານ​ທາງ​ວັດ­ທະ­ນະ­ທຳ​ຮ່ວມ​ກັບ​ປະ­ເທດ​ໄທ ໂດຍ​ການ​ຮ່ວມ​ມື​ຝ່າຍ​ໂຄງ­ການ ໃນ​ນີ້ ກໍ​ຈະ​ເກີດ​ໃຫ້­ການ​ສືບ​ທອດ​ພູມ​ປັນ­ຍາ ແລະ ພັດ­ທະ­ນາ​ຫັດ­ຖະ­ກຳ​ໄມ້ ເຊິ່ງ​ເປັນ​ຫັດ­ຖະ­ກຳ​ທີ່​ໃກ້​ຈະ​ສູນ­ຫາຍ ໃຫ້​ເກີດ​ມີ​ມູນ​ຄ່າ​ເພີ່ມ ຈົນ​ສາ­ມາດ​ພັດ­ທະ­ນາ​ສູ່​ສາ­ກົນ​ໄດ້.

    ສຳ­ລັບ​ງານ​ແລກ­ປ່ຽນ​ສິ­ລະ​ປະ ຫັດ­ຖະ­ກຳ​ແກະ­ສະ­ຫຼັກ​ໄມ້ ຮ່ວມ ລາວ-ໄທ ຈະ​ດຳ­ເນີນ​ແຕ່​ວັນ​ທີ 18-21 ມີ­ນາ 2019.

ຂ່າວທີ່ກ່ຽວຂ້ອງ