ຂ່າວຫຼ້າສຸດ

ຮອງນາຍົກ ເນັ້ນ ຄຊກມດ ເອົາໃຈໃສ່ປະຕິບັດວຽກງານຈຸດສຸມໃຫ້ມີປະສິດທິຜົນ

267 20 ມ.ນ. 2019 ຂ່າວໜ້າ​ໜຶ່ງ
ຮອງນາຍົກ ເນັ້ນ ຄຊກມດ ເອົາໃຈໃສ່ປະຕິບັດວຽກງານຈຸດສຸມໃຫ້ມີປະສິດທິຜົນ

    ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກຳ­ມາ​ທິ​ການ​ແຫ່ງ​ຊາດ ເພື່ອ​ຄວາມ​ກ້າວ­ໜ້າ​ຂອງ​ແມ່­ຍິງ ແລະ ແມ່-ເດັກ (ຄຊກມດ) ກ່າວ​ໃນ​ກອງ​ປະ­ຊຸມ​ປຶກ­ສາ​ຫາ­ລື​ການ­ຈັດ­ຕັ້ງ​ຜັນ​ຂະ­ຫຍາຍ ຂໍ້​ສະ­ເໜີ​ແນະ​ຂອງ​ສະ­ຫະ​ປະ­ຊາ​ຊາດ (ສປຊ) ຕໍ່​ບົດ​ລາຍ​ງານ​ແຫ່ງ​ຊາດ​ປະ­ຈຳ​ໄລ­ຍະ​ທີ 3-6 ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ສົນ­ທິ­ສັນ­ຍາ​ວ່າ​ດ້ວຍ​ສິດ­ທິ​ເດັກ ແລະ ບົດ​ລາຍ​ງານ​ແຫ່ງ​ຊາດ ປະ­ຈຳ​ໄລ­ຍະ​ທີ 8-9 ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ສົນ­ທິ­ສັນ­ຍາ​ຊີ​ດໍ ກັບ​ບັນ­ດາ​ຄູ່​ຮ່ວມ​ພັດ­ທະ­ນາ ໃນ​ວັນ​ທີ 19 ມີ­ນາ 2019 ຢູ່​ໂຮງ­ແຮມ​ລາວ​ພລາ​ຊາ ໂດຍ​ໄດ້​ເນັ້ນ​ໃຫ້ ຄຊກມດ ຄະ­ນະ​ກຳ­ມາ​ທິ​ການ​ບັນ­ດາ​ກະ­ຊວງ-ອົງ­ການ ແຂວງ ແລະ ນະ­ຄອນ­ຫຼວງ​ວຽງ​ຈັນ ລວມ​ທັງ​ຫ້ອງ­ການ​ກອງ​ເລ­ຂາ ຄຊກມດ ເອົາ­ໃຈ­ໃສ່​ໃນ​ການ­ຈັດ­ຕັ້ງ​ປະ­ຕິ­ບັດ​ບາງ​ວຽກ​ງານ​ຈຸດ​ສຸມ​ໃຫ້​ມີ​ປະ​ສິດ­ທິ​ຜົນ​ສູງ​ໃນ­ຕໍ່­ໜ້າ​ຄື:

    ເປັນ​ເຈົ້າ​ການ­ຈັດ­ຕັ້ງ​ຜັນ​ຂະ­ຫຍາຍ​ບັນ­ດາ​ຂໍ້​ສະ­ເໜີ​ແນະ ສປຊ ໃນ​ການ­ຈັດ­ຕັ້ງ​ປະ­ຕິ­ບັດ​ສົນ­ທິ­ສັນ­ຍາ​ວ່າ​ດ້ວຍ​ສິດ­ທິ​ເດັກ ລວມ​ທັງ 2 ອະ­ນຸ​ສັນ­ຍາ​ຕາມ​ໜ້າ​ວຽກ​ຂອງ​ຂະ­ແໜງ­ການ ແລະ ທ້ອງ­ຖິ່ນ ໃຫ້​ເປັນ​ແຜນ​ວຽກ ແຜນ​ຄົນ ແລະ ແຜນ​ເງິນ ເພື່ອ​ຈັດ​ຕັ້ງ​ປະ­ຕິ­ບັດ​ຕົວ​ຈິງ ໂຄ­ສະ­ນາ​ເຜີຍ­ແຜ່​ທາງ​ກວ້າງ ແລະ ທາງ​ເລິກ ກ່ຽວ​ກັບ​ບັນ­ດາ​ຂໍ້​ສະ­ເໝີ​ແນະ​ຂອງ ສປຊ ຂອງ​ສົນ­ທິ­ສັນ­ຍາ​ດັ່ງ­ກ່າວ ໃນ​ຂະ­ແໜງ­ການ ແລະ ທ້ອງ­ຖິ່ນ​ຕົນ ເພື່ອ​ປັບ​ປ່ຽນ​ພຶດ­ຕິ​ກຳ​ຂອງ​ສັງ­ຄົມ ໃນ​ການ​ລຶ­ບລ້າງ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່­ຍິງ ແລະ ເດັກ ສົ່ງ­ເສີມ​ໃຫ້​ລູກ​ຍິງ-ຊາຍ ໃຫ້​ໄດ້​ເຂົ້າ​ໂຮງ­ຮຽນ ແລະ ຮຽນ​ຈົບ​ການ​ສຶກ​ສາ​ພາກ​ບັງ­ຄັບ ຄົ້ນ­ຄວ້າ-ປັບ­ປຸງ​ກົດ­ໝາຍ ແລະ ນິ­ຕິ​ກຳ​ຕ່າງໆ ໃຫ້​ສອດ­ຄ່ອງ​ກັບ​ເນື້ອ​ໃນ​ຂອງ​ສົນ­ທິ­ສັນ­ຍາ​ວ່າ​ດ້ວຍ​ສິດ­ທິ​ເດັກ ລວມ​ທັງ 2 ອະ­ນຸ​ສັນ­ຍາ ເກັບ​ກຳ ແລະ ສ້າງ​ຖານ​ຂໍ້​ມູນ​ສະ­ຖິ­ຕິ​ໃນ​ລະ­ບົບ​ຍຸ­ຕິ​ທຳ​ສຳ­ລັບ​ເດັກ ຄົ້ນ­ຄວ້າ-ປັບ­ປຸງ​ລະ­ບົບ ແລະ ກົນ​ໄກ​ການ​ປົກ​ປ້ອງ​ເດັກ​ທີ່​ມີ​ຢູ່​ໃຫ້​ເຊື່ອມ​ຈອດ​ກັນ ສາ­ມາດ​ປະ­ສານ​ງານ​ກັນ​ຢ່າງ​ກົມ­ກຽວ ແລະ ມີ​ປະ​ສິດ­ທິ​ຜົນ ຢຸດ­ຕິ​ການ​ໃຊ້​ຄວາມ​ຮຸນ​ແຮງ​ຕໍ່​ເດັກ​ໃນ​ໂຮງ­ຮຽນ ຄົ້ນ­ຄວ້າ​ປະ­ກອບ​ບຸ​ຄະ­ລາ​ກອນ ແລະ ສ້າງ​ຄວາມ​ເຂັ້ມ­ແຂງ​ຂອງ​ກອງ​ເລ­ຂາ​ຊ່ວຍ​ວຽກ​ຂັ້ນ​ສູນ​ກາງ ຂັ້ນ​ແຂວງ ແລະ ຂັ້ນ​ເມືອງ ໃຫ້​ສາ­ມາດ​ເຄື່ອນ​ໄຫວ​ຕາມ​ພາ­ລະ​ບົດ­ບາດ-ໜ້າ­ທີ່​ເປັນ​ເສ­ນາ​ທິ​ການ​ຢູ່​ຂັ້ນ​ຕ່າງໆ ເອົາ­ໃຈ­ໃສ່​ເກັບ​ກຳ​ຂໍ້​ມູນ ເພື່ອ​ສະ­ຫຼຸບ​ລາຍ​ງານ​ວຽກ​ງານ​ຈົດ​ທະ­ບຽນ​ການ​ເກີດ ແຕ່ງ­ງານ ແລະ ສາ­ເຫດ​ຂອງ​ການ​ເສຍ​ຊີ­ວິດ​ເດັກ ເອົາ­ໃຈ­ໃສ່​ໂຄ­ສະ­ນາ​ໃຫ້​ຜູ້­ນຳ​ຊຸມ​ຊົນ ເຈົ້າ​ກົກ​ເຈົ້າ​ເຫຼົ່າ ປ່ຽນ­ແປງ​ທັດ­ສະ­ນະ​ຄະ­ຕິ​ແບບ​ຄອງ​ເດີມ ແລະ ຮີດ­ຄອງ​ປະ­ເພ­ນີ​ເກົ່າ​ແກ່ ຫຼ້າ­ຫຼັງ ທີ່​ເປັນ​ອຸ­ປະ­ສັກ​ກີດ­ຂວາງ​ການ​ພັດ­ທະ­ນາ​ເດັກ ຈັດ​ຕັ້ງ​ໂຄ­ສະ­ນາ​ເຜີຍ­ແຜ່​ໃຫ້​ສັງ­ຄົມ​ຮັບ​ຮູ້​ຢ່າງ​ກວ້າງ­ຂວາງ ກ່ຽວ​ກັບ​ການ​ປົກ​ປ້ອງ​ສິດ ແລະ ຜົນ​ປະ­ໂຫຍດ​ຂອງ​ເດັກ ກຳ­ນົດ​ມາດ­ຕະ­ຖານ​ການ​ຊ່ວຍ­ເຫຼືອ​ເດັກ ທີ່​ຖືກ​ເຄາະ​ຮ້າຍ​ຈາກ​ການ​ຄ້າ-ຂາຍ​ເດັກ ຄ້າ​ປະ­ເວ­ນີ​ເດັກ ໃຊ້​ແຮງ​ງານ​ເດັກ ຄວາມ​ຮຸນ​ແຮງ​ຕໍ່​ແມ່­ຍິງ ແລະ ເດັກ ແລະ ອື່ນໆ.

    ສຳ­ລັບ​ແຜນ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ຂໍ້​ສະ­ເໜີ​ຂອງ ສປຊ ຕໍ່​ບົດ​ລາຍ​ງານ​ສິດ­ທິ​ເດັກ ໄດ້​ລວມ​ເອົາ​ການ​ປັບ­ປຸງ​ລະ­ບົບ ແລະ ກົນ​ໄກ​ທີ່​ມີ​ຢູ່​ແລ້ວ​ໃນ​ການ​ປົກ​ປ້ອງ​ເດັກ ເພື່ອ​ໃຫ້​ພວກ​ເຂົາ​ມີ​ການ​ເຊື່ອມ​ສານ ປະ­ສານ​ງານ​ຢ່າງ​ມີ​ປະ​ສິດ­ທິ​ຜົນ ສາ­ມາດ​ສ້າງ​ກົນ​ໄກ​ການ​ຕິດ­ຕາມ​ກວດ­ກາ ແລະ ລາຍ​ງານ​ກ່ຽວ​ກັບ​ການ​ເຄື່ອນ​ຍ້າຍ​ແຮງ​ງານ​ເດັກ​ໃນ​ເຂດ​ຕົວ​ເມືອງ ແລະ ຊົນ­ນະ­ບົດ ແກ້​ໄຂ​ບັນ­ຫາ​ການ​ໃຊ້​ຄວາມ​ຮຸນ​ແຮງ​ໃນ​ໂຮງ­ຮຽນ ໂດຍ​ສະ­ເພາະ ການ​ລົງ­ໂທດ​ດ້ານ​ຮ່າງ­ກາຍ ແລະ ສົ່ງ­ເສີມ​ທາງ​ສື່​ອອນ​ລາຍ​ທີ່​ປອດ​ໄພ ສ່ວນ​ຕໍ່​ບົດ​ລາຍ​ງານ​ຊີ​ດໍ ແມ່ນ​ໄດ້​ລວມ​ການ​ສ້າງ​ຄວາມ​ເຂັ້ມ­ແຂງ​ຂອບ​ດ້ານ​ນະ­ໂຍ­ບາຍ ແລະ ນິ­ຕິ​ກຳ ສ້າງ​ຄວາມ​ເຂັ້ມ­ແຂງ​ໃຫ້​ແມ່­ຍິງ​ການ​ນຳ ແລະ ສ້າງ​ເງື່ອນ­ໄຂ​ໃຫ້​ແມ່­ຍິງ ໃນ​ຕຳ­ແໜ່ງ​ຕັດ­ສິນ​ບັນ­ຫາ​ຄວາມ​ສະ­ເໝີ­ພາບ​ໃນ​ການ​ມີ​ສ່ວນ​ຮ່ວມ ເປັນ­ຕົ້ນ ແມ່­ຍິງ​ໃນ​ຊົນ­ນະ­ບົດ ສ້າງ​ສະ­ພາບ​ແວດ​ລ້ອມ​ອຳ­ນວຍ​ຄວາມ​ສະ­ດວກ​ດ້ານ​ການ​ເງິນ ໃນ​ວຽກ​ງານ​ຄວາມ​ສະ­ເໜີ​ພາບ​ຍິງ-ຊາຍ ການ​ເຂົ້າ​ເຖິງ​ການ​ສຶກ​ສາ ແລະ ສາ­ທາ­ລະ­ນະ​ສຸກ.

    ນອກ​ນີ້ ກອງ​ປະ­ຊຸມ​ຍັງ​ໄດ້​ຮັບ​ຟັງ​ການ​ລາຍ​ງານ​ຜົນ­ສຳ­ເລັດ ການ​ເຂົ້າ​ຮ່ວມ​ປ້ອງ​ກັນ​ບົດ​ລາຍ​ງານ​ແຫ່ງ​ຊາດ 2 ສະ­ບັບ ພາຍ​ໃຕ້​ສົນ­ທິ­ສັນ­ຍາ​ທີ່ ສປປ ລາວ ເປັນ​ພາ­ຄີ ຄື: ບົດ​ລາຍ​ງານ​ແຫ່ງ​ຊາດ​ສະ­ບັບ​ທີ 3-6 ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ສົນ­ທິ­ສັນ­ຍາ​ວ່າ​ດ້ວຍ​ສິດ­ທິ​ເດັກ ແລະ ບົດ​ລາຍ​ງານ​ແຫ່ງ​ຊາດ ປະ­ຈຳ​ໄລ­ຍະ​ທີ 8 ແລະ 9 ໃນ​ການ­ຈັດ­ຕັ້ງ​ປະ­ຕິ­ບັດ​ສົນ­ທິ­ສັນ­ຍາ​ຊີ​ດໍ ລວມ​ທັງ​ບັນ­ດາ​ຂໍ້​ສະ­ເໜີ​ແນະ​ຂອງ ສປຊ ຕໍ່​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຄວາມ​ສະ­ເໝີ­ພາບ​ຍິງ-ຊາຍ ແລະ ວຽກ​ແມ່-ເດັກ ກໍ​ຄື ທິດ​ທາງ​ແຜນ​ວຽກ​ຈຸດ​ສຸມ​ການ­ຈັດ­ຕັ້ງ​ຜັນ​ຂະ­ຫຍາຍ​ບັນ­ດາ​ຂໍ້​ສະ­ເໜີ​ແນະ​ຂອງ ສປຊ ໃນ​ວຽກ​ສິດ­ທິ​ເດັກ ແລະ ວຽກ​ຊີ​ດໍ ໄລ­ຍະ​ປີ 2019-2023.

ຂ່າວທີ່ກ່ຽວຂ້ອງ