ເບິ່ງບ້ານເຂົາເອົາບົດຮຽນ 20/03/2019

295 20 ມ.ນ. 2019 ຫົວຂໍ້ຂ່າວອື່ນໆ

    ມື້­ນີ້​ມີ​ສະ­ຖິ­ຕິ​ກ່ຽວ​ກັບ​ການ​ຄາ­ຕະ­ກຳ ແລະ ການ​ໃຊ້​ຄວາມ​ຮຸນ​ແຮງ​ຕໍ່​ເພດ​ຍິງ​ໃນ​ບຼາ​ຊິນ ແລະ ປິດ​ທ້າຍ​ກັບ​ຂ່າວ​ທາງ​ການ​ຈີນ ຮຽກ­ຮ້ອງ​ໃຫ້​ທົ່ວ​ສັງ­ຄົມ​ໃຊ້​ສື່​ສັງ­ຄົມ​ອອນ​ລາຍ ເຜີຍ​ແບ​ໃບ​ໜ້າ​ພວກ​ສໍ້​ລາດ​ບັງ​ຫຼວງ ຫຼື ໃຊ້​ຈ່າຍ​ຟຸມ​ເຟືອຍ.

    ທີ່ ບຣາ​ຊິນ: ໄພ​ໃກ້​ຕົວ​ແມ່­ຍິງ​ທີ່​ຊຳ​ເຮື້ອ​ມາ​ເປັນ​ເວ­ລາ​ດົນ​ນານ​ທົ່ວ​ປະ­ເທດ ບຣາ​ຊິນ ຢູ່​ພາກ​ພື້ນ​ອາ​ເມ​ຣິ​ກາ​ໃຊ້​ນັ້ນ ເກີດ​ມາ​ຈາກ​ການ​ຈຳ­ແນກ​ເຊື້ອ​ຊາດ​ຜິວ​ພັນ ໂດຍ​ແມ່ນ​ແມ່­ຍິງ​ທີ່​ມີ​ຜິວ​ສີ­ດຳ ມີ​ຄວາມ​ສ່ຽງ​ສູງ​ທີ່​ຈະ​ຕົກ​ເປັນ​ເຫຍື່ອ​ຄວາມ​ຮຸນ​ແຮງ​ເຖິງ​ຂັ້ນ​ເສຍ​ຊີ­ວິດ ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 22 ມິ­ຖຸ­ນາ 2018 ຊີ້​ອອກ​ວ່າ ໃນ​ປີ 2017 ທາງ​ການ ບຣາ​ຊິນ ໄດ້​ເພີ່ມ​ການ​ຕັດ­ສິນ​ຄະ­ດີ​ການ​ຄາ­ຕະ­ກຳ​ແມ່­ຍິງ ແຕ່​ປານ​ນັ້ນ​ກໍ​ຍັງ​ມີ​ຄະ­ດີ​ຄ້າງ​ທັງ​ໝົດ​ຫຼາຍ​ກວ່າ 10.700 ເລື່ອງ (ລວມ​ທັງ​ຄ້າງ​ມາ​ແຕ່​ປີ​ກ່ອນໆ) ໃນ​ປີ 2016 ບັນ­ດາ​ຫ້ອງ­ການ​ສານ​ໃນ​ທົ່ວ ບຣາ​ຊິນ ໄດ້​ແກ້​ໄຂ​ຄະ­ດີ​ການ​ຄາ­ຕະ­ກຳ​ແມ່­ຍິງ​ໄດ້​ທັງ​ໝົດ 1.942 ເລື່ອງ ສ່ວນ​ໃນ​ປີ 2017 ນັ້ນ ແກ້​ໄຂ​ຕົກ​ເຖິງ 4.829 ຄະ­ດີ ຜົນ­ງານ​ຂອງ​ສານ ໃນ​ປີ 2017 ນັ້ນ ໄດ້​ຮັບ​ການ​ຊົມ­ເຊີຍ​ຈາກ​ທົ່ວ​ສັງ­ຄົມ​ບຣາ​ຊິນ ແຕ່​ກໍ​ມີ​ຄຳ­ເຕືອນ​ຈາກ​ສະ­ພາ​ຍຸ­ຕິ​ທຳ​ແຫ່ງ​ຊາດ ບຣາ​ຊິນ ວ່າ​ຕ້ອງ​ໃຊ້​ຄວາມ​ພະ­ຍາ­ຍາມ​ແກ້​ໄຂ​ບັນ­ຫາ​ນີ້​ຕື່ມ ເພາະ­ວ່າ​ຈຳ­ນວນ​ຄະ­ດີ​ຄາ­ຕະ­ກຳ​ແມ່­ຍິງ​ຕົວ​ຈິງ​ນັ້ນ​ອາດ​ສູງ​ກວ່າ​ຈຳ­ນວນ​ທີ່​ມີ ເພາະ­ວ່າ​ຍັງ​ມີ​ບັນ­ຫາ​ຫຍຸ້ງ­ຍາກ​ໃນ​ການ​ຂຶ້ນ​ທະ­ບຽນ​ອາ​ຊະ​ຍາ​ກຳ​ທັງ​ໝົດ​ຢ່າງ​ເປັນ​ລະ­ບົບ​ຄົບ​ຊຸດ ລວມ​ທັງ​ສຳ­ນວນ​ຄະ­ດີ​ທີ່​ລາຍ​ງານ​ໃຫ້​ເຈົ້າ​ໜ້າ­ທີ່​ຕຳ­ຫຼວດ​ຊາບ​ແລ້ວ ແມ່­ຍິງ​ທີ່​ຕົກ​ເປັນ​ເຫຍື່ອ​ການ​ຄາ­ຕະ­ກຳ​ທີ່​ເກີດ​ຂຶ້ນ​ເປັນ​ປະ­ຈຳ ໄດ້­ແກ່​ແມ່­ຍິງ​ຜິວ​ດຳ​ທີ່​ສືບ​ເຊື້ອ­ສາຍ​ມາ​ຈາກ ອາ​ຟຣິ​ກາ ໃນ​ໄວ​ລະ​ວ່າງ 18-30 ປີ ນອກ­ຈາກ​ການ​ຄາ­ຕະ­ກຳ​ແລ້ວ ກໍ​ຍັງ​ມີ​ຮູບ​ການ​ໃຊ້​ຄວາມ​ຮຸນ​ແຮງ​ອື່ນໆ​ທີ່​ກະ­ທົບ​ຕໍ່​ແມ່­ຍິງ ບຣາ​ຊິນ ໃນ​ປີ 2017 ສານ​ທ້ອງ­ຖິ່ນ​ໃນ​ທົ່ວ​ປະ­ເທດ​ບຣາ​ຊິນ ໄດ້​ຮັບ​ຄະ­ດີ​ຈຳ­ນວນ 1.448.716 ເລື່ອງ ທີ່​ພົວ­ພັນ​ກັບ​ການ​ໃຊ້​ຄວາມ​ຮຸນ​ແຮງ​ໃນ​ຄອບ­ຄົວ ໂດຍ​ສະ­ເລ່ຍ​ແລ້ວ ແມ່ນ​ມີ​ຄະ­ດີ​ນີ້​ເກີດ​ຂຶ້ນ 13,8 ເລື່ອງ ຕໍ່​ຊາວ​ບຣາ​ຊິນ ໃນ​ແຕ່​ລະ 1.000 ຄົນ ໃນ​ປີ 2017 ບັນ­ດາ​ຫ້ອງ­ການ​ສານ​ບຣາ​ຊິນ​ໄດ້​ແກ້​ໄຂ​ຄະ­ດີ ຈຳ­ນວນ 540.000 ເລື່ອງ ທີ່​ພົວ­ພັນ​ກັບ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່­ຍິງ ແຕ່​ສ່ວນ​ທີ່​ຍັງ​ຄ້າງ​ນັ້ນ ຍັງ​ມີ​ສູງ​ເຖິງ 908.000 ເລື່ອງ.

    ທີ່ ສປ ຈີນ: ຄົງ​ຈຳ​ໄດ້​ນຳ​ກັນ​ວ່າ ໃນ​ປີ 2012 ສູນ​ກາງ​ພັກ​ກອມ​ມູ​ນິດ​ຈີນ ໄດ້​ອອກ​ກົດ​ລະ­ບຽບ 8 ຂໍ້​ຫ້າມ​ພະ­ນັກ­ງານ​ລັດ ນຳ​ໃຊ້​ຈ່າຍ​ຟຸມ​ເຟືອຍ​ເງິນ ກໍ​ຄື ວັດ­ຖຸ​ສິງ​ຂອງ​ລວມ ແຕ່​ກໍ​ຍອມ­ຮັບ​ວ່າ ການ​ຕິດ­ຕາມ​ການ​ປະ­ພຶດ​ຂອງ​ພະ­ນັກ­ງານ​ທີ່​ແຕກ​ປອກ​ອອກ​ທາງ​ນັ້ນ ເຮັດ​ບໍ່​ໄດ້​ງ່າຍໆ​ດັ່ງ​ຄິດ ດັ່ງ­ນັ້ນ ເລີ່ມ​ແຕ່​ປີ 2014 (ໜັງ­ສື­ພິມ China Douly ສະ­ບັບ​ສັງ​ລວມ​ປະ­ຈຳ​ອາ­ທິດ ສະ­ບັບ​ແຕ່​ວັນ​ທີ 11-17 ເມ­ສາ 2014) ຈຶ່ງ​ໄດ້​ໃຫ້​ຮູ້​ວ່າ ທາງ​ການ​ຈີນ​ໄດ້​ຮຽກ­ຮ້ອງ​ໃຫ້​ຊາວ​ເນັດ (ຜູ້​ໃຊ້​ສື່​ສັງ­ຄົມ​ຜ່ານ​ລະ­ບົບ​ອິນ​ເຕີ​ເນັດ) ນຳ​ໃຊ້​ອຸ­ປະ­ກອນ​ສື່​ສັງ­ຄົມ ຊ່ວຍ​ເຜີຍ​ແບ​ການ​ປະ­ພຶດ​ໃຊ້​ຈ່າຍ​ຟຸມ​ເຟືອຍ​ຂອງ​ພະ­ນັກ­ງານ​ລັດ​ໃຫ້​ສັງ­ຄົມ​ຮັບ​ຮູ້ ເຊັ່ນ: ການ​ຈັດ​ງານ​ລ້ຽງ​ແບບ​ໃຫຍ່​ໂຕ​ຕາມ​ສະ­ໂມ­ສອນ​ເອ­ກະ​ຊົນ ກໍ​ຄື ການ​ສໍ້​ລາດ​ບັງ​ຫຼວງ ຄະ­ນະ​ກວດ­ກາ​ວິ­ໄນ​ປະ­ຈຳ​ສູນ​ກາງ​ພັກ​ກອມ​ມູ​ນິດ​ຈີນ ໄດ້​ຮຽກ­ຮ້ອງ​ທົ່ວ​ສັງ­ຄົມ​ຜ່ານ​ອິນ​ເຕີ​ເນັດ​ໃຫ້​ຊ່ວຍ​ກັນ​ເຜີຍ​ແບ ແລະ ປະ­ຈານ​ການ​ກະ­ທຳ​ທີ່​ເປັນ​ການ​ສໍ້​ລາດ​ບັງ​ຫຼວງ ແລະ ຟຸມ​ເຟືອຍ ແນ­ໃສ່​ເຮັດ​ໃຫ້​ຂໍ້​ຫ້າມ 8 ຂໍ້​ທີ່​ກ່າວ​ມາ​ເທິງ​ນັ້ນ ມີ​ຜົນ​ສັກ­ສິດ​ໃນ​ການ​ກຳ­ຈັດ​ບັນ­ຫາ​ຟຸມ​ເຟືອຍ ສໍ້​ລາດ​ບັງ​ຫຼວງ ກໍ​ຄື ສິນ​ບົນ.

ຂ່າວທີ່ກ່ຽວຂ້ອງ