ຂ່າວຫຼ້າສຸດ

ຟີ​ລິບ​ປິນ ຖອນ​ອອກ​ຈາກ ICC ຢ່າງ​ເປັນ​ທາງ​ການ

135 21 ມ.ນ. 2019 ຂ່າວຕ່າງປະເທດ
ຟີ​ລິບ​ປິນ ຖອນ​ອອກ​ຈາກ ICC ຢ່າງ​ເປັນ​ທາງ​ການ

    ຟີ​ລິບ​ປິນ ໄດ້​ຖອນ​ອອກ​ຈາກ​ສານ​ອາຍາ​ສາກົນ (ICC) ຢ່າງ​ເປັນ​ທາງ​ການ ເມື່ອ​ວັນ​ທີ 17 ມີນາ​ນີ້ ກາຍເປັນ​ປະເທດ​ທີ​ສອງ ທີ່​ຖອນ​ຕົວ​ອອກ​ຈາກ​ສານ​ດັ່ງກ່າວ. 

   ຕາມ​ການ​ກຳນົດ​ຂອງ ICC ແລ້ວ ການ​ຖອນ​ອອກ​ຈາກ​ສານ​ນີ້ ຈະ​ມີ​ຜົນ​ບັງຄັບ​ໃຊ້​ພາຍ​ໃນ​ເວລາ 1 ປີ ຫຼັງ​ຈາກ​ທີ່​ຟີ​ລິບ​ປິນ ແຈ້ງ​ຕໍ່​ສະຫະ​ປະຊາ​ຊາດ (​ສປຊ) ກ່ຽວ​ກັບ​ການ​ຕົກລົງ​ນັ້ນ.

    ທ່ານ ເອ​ຣີ ກາ​ເນ​ໂກ ໂຄສົກ​ຂອງ ​ສປຊ ແຈ້ງ​ໃຫ້​ຮູ້​ວ່າ ເມື່ອ​ບໍ່​ດົນ​ມາ​ນີ້ ເລຂາທິການ​ໃຫຍ່ ​ສປຊ ໄດ້​ແຈ້ງ​ຕໍ່​ທຸກໆ​ປະເທດ​ທີ່​ກ່ຽວຂ້ອງ​ວ່າ ການ​ຖອນ​ອອກ​ຈາກ ICC  ຂອງ​ຟີ​ລິບ​ປິນ ຈະ​ມີ​ຜົນ​ບັງຄັບ​ໃຊ້​ໃນ​ວັນ​ທີ 17 ມີນາ​ນີ້.

    ຟີ​ລິບ​ປິນ ມີ​ການ​ຕົກລົງ​ດັ່ງກ່າວ​ອອກ​ມາ ຫຼັງ​ຈາກ​ທີ່ ICC ເປີດ​ການ​ສືບສວນ​ສອບ​ສວນ ຕໍ່​ບັ້ນ​ຕໍ່ຕ້ານ​ຢາ​ເສບ​ຕິດ ຂອງ​ປະທານາທິບໍດີ​ຟີ​ລິບ​ປິນ ໂຣດ​ຣີ​ໂກ ດູ​ເຕີ​ເຕ ເມື່ອ​ປີ 2018.

    ICC ໄດ້​ຮັບ​ການ​ສ້າງຕັ້ງ​ເມື່ອ 2002 ຊຶ່ງ​ເປັນສານ​ປະຈຳການ​ເພື່ອ​ໄຕ່​ສວນ​ຕໍ່​ບັນດາ​ບຸກຄົນ​ທີ່​ຕ້ອງ​ໂທດ​ຕ້ານ​ກັບ​ມວນ​ມະນຸດ ແລະ​ໂທດ​ກຳ​ສົງຄາມ.

    ບຣຸນ​ດີ ເປັນ​ປະເທດ​ທຳ​ອິດ ທີ່​ຖອນ​ອອກ​ຈາກ ICC  ໃນ​ປີ 2017. ຕໍ່​ມາ ກໍ​ມີ​ປະເທດ​ອື່ນໆ​ໃນ​ອາ​ຟະ​ຣິກ​ກາ ເຊັ່ນ ຕັງ​ຊາ​ນີ ອາ​ຟະ​ຣິກ​ກາ​ໃຕ້ ເຄນ​ຢາ ແລະ​ກຳ​ບີ ຕ່າງ​ກໍ​ມີ​ທ່າ​ທີ ຫຼື​ສະແດງ​ອອກ​ເຖິງ​ຄວາມ​ຢາກ​ຖອນ​ອອກ​ຈາກ ICC. ໃນ​ຂະນະ​ດຽວ​ກັນ ມາ​ເລ​ເຊຍ ເປັນ​ປະເທດ​ໃໝ່​ຫຼ້າ​ສຸດ ທີ່​ເຂົ້າ​ຮ່ວມ ICC.

ຂ່າວທີ່ກ່ຽວຂ້ອງ