ຫວຽດນາມ ​ເພີ່ມ​ທະວີ​ຄວບ​ຄຸມ​ການ​ຄ້າຂາຍ ​ແລະ​ການ​ເຄື່ອນ​ຍ້າຍ​ໝູ​ສວາຍ​ງາມ

105 21 ມີ.ນ. 2019 ຂ່າວຕ່າງປະເທດ
ຫວຽດນາມ ​ເພີ່ມ​ທະວີ​ຄວບ​ຄຸມ​ການ​ຄ້າຂາຍ ​ແລະ​ການ​ເຄື່ອນ​ຍ້າຍ​ໝູ​ສວາຍ​ງາມ

    ຂ່າວສານ​ຫວຽດນາມ ລາຍ​ງານ​ວ່າ ກະຊວງ​ກະສິກຳ ແລະ ພັດທະນາ​ຊົນນະບົດ​ຂອງ​ຫວຽດນາມ ໄດ້​ສົ່ງ​ສານ​ທາງ​ການ​ເປັນ​ການ​ດ່ວນ ໄປ​ຍັງ​ຄະນະ​ກຳມະການ​ປະຊາຊົນ​ແຂວງ ແລະ​ ນະຄອນ ທີ່​ຂຶ້ນ​ກັບ​ສູນ​ກາງ; ຜູ້​ປະຈຳການ​ຄະນະ​ປະຈຳ​ແຫ່ງ​ຊາດ ກ່ຽວ​ກັບ​ການ​ຕ້ານ​ການ​ຄ້າ​ເຖື່ອນ ສໍ້​ໂກງ​ດ້ານ​ການ​ຄ້າ ແລະ​ສິນຄ້າ​ປອມ (ຄະນະ​ຊີ້​ນຳ 389) ໃຫ້​ປະຕິບັດ​ວິທີ​ການ​ແກ້​ໄຂ ເພື່ອ​ເພີ່ມ​ທະວີ​ການ​ຄວບ​ຄຸມ​ສະພາບ​ການ​ຄ້າຂາຍ ແລະ​ການ​ເຄື່ອນ​ຍ້າຍ​ໝູ​ສວາຍ​ງາມ ຢູ່​ຜິດ​ກົດໝາຍ.

    ກະຊວງ​ດັ່ງກ່າວ ໄດ້​ສະເໜີ​ໄປ​ຍັງ​ບັນດາ​ພາກສ່ວນ​ຕ່າງໆ​ດັ່ງກ່າວ ໃຫ້​ຊີ້​ນຳໄປ​ຍັງ​ບັນດາ​ພະ​ແນກ ຂະແໜງການ ແລະ ​ອຳນາດ​ການ​ປົກຄອງ​ຂັ້ນ​ຮາກ​ຖານ ສຸມ​ໃສ່​ຈັດ​ຕັ້ງ​ປະຕິບັດ​ຢ່າງ​ເຂັ້ມ​ງວດ ຕໍ່​ບັນດາ​ເນື້ອ​ໃນ​ຂອງ​ຄຳ​ສັ່ງ​ແນະນຳ​ຂອງ​ນາຍົກລັດຖະມົນຕີ​ຫວຽດນາມ ທີ່​ໄດ້​ນຳ​ອອກ​ມາ​ເມື່ອ​ວັນ​ທີ 20 ກຸມພາ 2019; ພ້ອມ​ກັນ​ນັ້ນ​ກໍ​ຊີ້​ນຳ​ໃຫ້​ເພີ່ມ​ທະວີ​ການ​ຄວບ​ຄຸມ​ຢ່າງ​ເຄັ່ງ​ຄັດ ຕໍ່​ການ​ຄ້າຂາຍ ເຄື່ອນ​ຍ້າຍ​ໝູ​ມີ​ນີ (mini) ສວາຍ​ງາມ ຂ້າມ​ຊາຍ​ແດນ; ກວດ​ຫາ ແລະ ແກ້​ໄຂ​ຢ່າງ​ທັນ​ການ  ສຳລັບ​ກໍລະນີ​ການ​ຄ້າຂາຍ ເຄື່ອນ​ຍ້າຍ​ໝູ​ສວາຍ​ງາມ ທີ່​ມີ​ຕົ້ນ​ທາງ​ບໍ່​ຈະແຈ້ງ ຫຼື​ໝູ​ນຳ​ເຂົ້າ​ເຖື່ອນ.

    ໃນ​ຂະນະ​ດຽວ​ກັນ ແຈ້ງ​ການ​ຈາກ​ອົງການ​ສັດຕະວະແພດ​ໂລກ (OIE) ແລະ​ອົງການ​ອາຫານ ແລະ​ກຳ​ສິ​ກຳ​ຂອງ​ສະຫະ​ປະຊາ​ຊາດ (FAO) ໃຫ້​ຮູ້​ວ່າ ນັບ​ແຕ່​ວັນ​ທີ 3 ສິງຫາ ປີ 2018 ຫາ​ວັນ​ທີ 16 ມີນາ ປີ 2019 ຈີນ​ໄດ້​ແຈ້ງ​ໃຫ້​ຮູ້​ວ່າ ມີ​ການລະບາດພະຍາດ​ອະຫິ​ວາ​ໝູ​ສາຍ​ພັນ​ອາ​ຟະ​ຣິກ​ກາ ລວມ​ແລ້ວ 113 ຈຸດ ຊຶ່ງ​ປະກົດ​ຢູ່​ໃນ 28 ແຂວງ ເຮັດ​ໃຫ້​ຕ້ອງ​ໄດ້​ຂ້າ​ທຳລາຍ​ໝູ​ກວ່າ 1,1 ລ້ານ​ໂຕ; ແລະ​ວ່າ​ພະຍາດ​ຍັງ​ຄົງ​ຜັນ​ແປ​ໄປ​ຢ່າງ​ສັບສົນ ຢູ່​ໃນ​ຫຼາຍ​ປະເທດ​ໃນ​ໂລກ.

    ຂ່າວ​ແຈ້ງວ່າ ຢູ່​ໃນ​ຫວຽດນາມ ໄລ່​ມາ​ຮອດ​ວັນ​ທີ 16 ມີນາ ປີ 2019 ພະຍາດ​ອະຫິ​ວາ​ໝູ​ສາຍ​ພັນ​ອາ​ຟະ​ຣິກ​ກາ ໄດ້​ເກີດ​ຂຶ້ນ​ຢູ່​ໃນ 253 ຕາແສງ 57 ເມືອງ ຂອງ 18 ແຂວງ ແລະ ນະຄອນ ໂດຍ​ລວມ​ແລ້ວ​ມີ​ໝູ​ທີ່​ຕິດພະຍາດ​ຖືກ​ຂ້າ​ທຳລາຍ ຈຳນວນ 26.807 ໂຕ. ໂດຍ​ສະເພາະ​ແລ້ວ ພະຍາດ​ອະຫິ​ວາ​ໝູ​ສາຍ​ພັນ​ອາ​ຟະ​ຣິກ​ກາ ເປັນ​ພະຍາດ​ຕິດຕໍ່​ທີ່​ອັນຕະລາຍ ຍ້ອນ​ວ່າ​ໄວ​​ຣັສ​ທີ່​ພາໃຫ້​ເກີດ​ພະຍາດ​ນັ້ນ ມີ​ໄດ້​ຢູ່​ໃນ​ໝູ​ທຸກໆ​ປະເພດ (ໝູ​ລ້ຽງ ລວມ​ເຖິງ​ໝູ​ສວາຍ​ງາມ ແລະ​ໝູ​ປ່າ); ໝູ​ທີ່​ເປັນ​ພະຍາດ​ສາມາດ​ຕາຍ​ໄດ້​ເຖິງ 100% ເຮັດ​ໃຫ້​ເກີດ​ຄວາມ​ເສຍ​ຫາຍ​ອັນ​ໃຫຍ່​ໂຕ​ໃນ​ດ້ານ​ເສດຖະກິດ.

ຂ່າວທີ່ກ່ຽວຂ້ອງ