ອາກ​ຊັງ​ຕິນ-ຈີນ ເຈລະຈາ​ກ່ຽວ​ກັບ​ກໍ່ສ້າງ​ໂຮງງານ​ໄຟຟ້າ​ນີວ​ເຄລຍ

126 21 ມີ.ນ. 2019 ຂ່າວຕ່າງປະເທດ
ອາກ​ຊັງ​ຕິນ-ຈີນ ເຈລະຈາ​ກ່ຽວ​ກັບ​ກໍ່ສ້າງ​ໂຮງງານ​ໄຟຟ້າ​ນີວ​ເຄລຍ

   ແຫຼ່ງ​ຂ່າວ​ຈາກ​ນະຄອນຫຼວງ ບູ​ເອນ​​ົສ ໄອ​ເຣ​​ສ ອ້າງ​ຕາມ​ແຫຼ່ງ​ຂ່າວ​ຂອງ​ລັດຖະບານ​ອາກ​ຊັງ​ຕິນ ໃຫ້​ຮູ້ເມື່ອ​ວັນ​ທີ 16 ມີນາ​ນີ້​ວ່າ ຄະນະ​ຜູ້​ແທນ​ດ້ານ​ເຕັກນິກ​ຂອງ​ຈີນ ຈະ​ເດີນທາງ​ໄປ​ຍັງ​ອາກ​ຊັງ​ຕິນ ເພື່ອ​ສືບຕໍ່​ປຶກສາ​ຫາລື ກ່ຽວ​ກັບ​ການ​ກໍ່ສ້າງ​ໂຮງງານ​ໄຟຟ້າ​ນີວ​ເຄລຍ Atucha III ທີ່​ມີ​ມູນ​ຄ່າ​ການ​ລົງທຶນ​ເຖິງ 8 ຕື້​ໂດ​ລາ​ສະຫະລັດ. ນີ້​ເປັນ​ໂຄງການ​ທີ່​ອາກ​ຊັງ​ຕິນ ແລະ​ຈີນ ເຈລະຈາ​ກັນ​ມາ​ຕັ້ງແຕ່​ສະໄໝ​ຂອງ​ອະດີດ​ປະທານາທິບໍດີ ຄຣິ​​ສ​ຕີ​ນາ ເຟີ​ນານ​ເດ​​ສ ຂອງ​ອາກ​ຊັງ​ຕິນ.

    ເມື່ອ​ເດືອນ​ພະຈິກ ປີ 2017 ສອງ​ຝ່າຍ​ໄດ້​ຄາດ​ໄວ້​ວ່າ​ຈະ​ປະກາດ​ການ​ລົງ​ນາມ​ຂໍ້​ຕົກລົງ ກ່ຽວ​ກັບ​ການ​ລົງທຶນ​ກໍ່ສ້າງ​ໂຮງງານ​ໄຟຟ້າ​ນີວ​ເຄລຍ​ດັ່ງກ່າວ ໃນ​ໂອກາດ​ທີ່​ປະທານ​ປະເທດ​ຈີນ ສີ​ຈິ້ນ​ຜິງ ເດີນທາງ​ໄປ​ຢ້ຽມຢາມ​ອາກ​ຊັງ​ຕິນ ແຕ່​ວ່າ​ຍ້ອນ​ການ​ທີ່​ຍັງ​ບໍ່​ສາມາດ​ເປັນ​ເອກະ​ພາບ​ກັນ ກ່ຽວ​ກັບ​ບັນດາ​ຂໍ້ຄວາມ ຈຶ່ງ​ຈຳເປັນ​ຕ້ອງ​ໄດ້​ເລື່ອນ​ເວລາ​ອອກ​ໄປ.

    ອາກ​ຊັງ​ຕິນ ມີ​ໂຮງງານ​ໄຟຟ້າ​ນີວ​ເຄລຍ​ຢູ່​ແລ້ວ 3 ແຫ່ງ ໃນ​ນັ້ນ​ໂຮງງານ Atucha I ທີ່​ເປັນ​ແຫ່ງ​ທຳ​ອິດ​ໃນ​ອາ​ເມ​ຣິ​ກາ ລາ​ຕິນ ມີ​ກຳລັງ​ການ​ຜະລິດ 357 MW ໄດ້​ເປີດ​ຕົວ​ເມື່ອ​ປີ 1974. ໂຮງງານ​ແຫ່ງ​ທີ​ສອງ ມີ​ຊື່ວ່າ Embalse ດ້ວຍ​ກຳລັງ​ການ​ຜະລິດ 648 MW ໄດ້​ນຳ​ເຂົ້າ​ສູ່​ການເຄື່ອນໄຫວ​ຜະລິດ​ໃນ​ປີ 1984 ແລະ ​ໂຮງງານ​ແຫ່ງ​ທີ​ສາມ ມີ​ຊື່ວ່າ Atucha II ໄດ້​ນຳ​ເຂົ້າ​ສູ່​ການເຄື່ອນໄຫວ​ຜະລິດ​ໃນ​ເດືອນ​ມິຖຸນາ ປີ 2014. ໄຟຟ້າ​ນີວ​ເຄລຍ ກວມ​ເອົາ​ປະມານ 10% ຂອງ​ຍອດ​ປະລິມານ​ການ​ຜະລິດ​ໄຟຟ້າ​ຂອງ​ອາກ​ຊັງ​ຕິນ.

ຂ່າວທີ່ກ່ຽວຂ້ອງ