ຂພສ ລອງແທ່ງ-ວຽງຈັນ ກຽມພັດທະນາໄລຍະ 3

342 21 ມີ.ນ. 2019 ຂ່າວໜ້າ​ໜຶ່ງ
ຂພສ ລອງແທ່ງ-ວຽງຈັນ ກຽມພັດທະນາໄລຍະ 3

    ພາຍ­ຫຼັງ​ຜູ້​ພັດ­ທະ­ນາ​ໄດ້​ບຸກ­ເບີກ​ເຂດ​ເສດ­ຖະ­ກິດ​ພິ­ເສດ (ຂພສ) ລອງ​ແທ່ງ-ວຽງ​ຈັນ ແຕ່​ປີ 2009 ກໍ​ໄດ້​ມີ​ການ​ພັດ­ທະ­ນາ​ຢ່າງ​ຕໍ່​ເນື່ອງ ເລີ່ມ​ຈາກ​ການ​ບຸກ­ເບີກ​ໜ້າ­ດິນ ແລະ ສ້າງ​ສະ​ໜາມ​ກ໊ອຟ​ມາດ­ຕະ­ຖານ (ຕິດ​ຢູ່​ໃນ​ອັນ​ດັບ​ຂອງ​ອາ­ຊີ) ເພື່ອ​ພັດ­ທະ­ນາ​ຕາມ​ແຜນ­ການ​ທີ່​ວາງ​ໄວ້.

    ທ່ານ ຫງວຽນ ມິງ ຈີ ຮອງ​ຜູ້­ອຳ­ນວຍ­ການ​ບໍ­ລິ­ສັດ ເຄ​ເອັນ-ວຽງ​ຈັນ​ກຣຸບ ຈຳ­ກັດ ຜູ້​ພັດ­ທະ­ນາ ຂພສ ລອງ​ແທ່ງ-ວຽງ​ຈັນ ໃຫ້​ສຳ­ພາດ​ວັນ​ທີ 19 ມີ­ນາ 2019 ວ່າ: ລັດ­ຖະ­ບານ​ໄດ້​ອະ­ນຸ­ມັດ​ໃຫ້​ບໍ­ລິ­ສັດ ເຄ​ເອັນ-ວຽງ​ຈັນ​ກຣຸບ ຈຳ­ກັດ ເປັນ​ຜູ້​ພັດ­ທະ­ນາ​ເຂດ​ດັ່ງ­ກ່າວ ດ້ວຍ​ງົບ­ປະ­ມານ 1 ຕື້​ໂດ​ລາ​ສະ­ຫະ­ລັດ ຫຼື ປະ­ມານ 8.586,63 ຕື້​ກີບ ໃນ​ເນື້ອ­ທີ່ 557 ກວ່າ​ເຮັກ­ຕາ ປັດ­ຈຸ­ບັນ​ໄດ້​ສຳ­ເລັດ​ການ​ພັດ­ທະ­ນາ​ບຸກ­ເບີກ​ເນື້ອ­ທີ່​ແລ້ວ​ໃນ​ເບື້ອງ​ຕົ້ນ ແລະ ກໍ່­ສ້າງ​ສະ​ໜາມ​ກ໊ອຟ​ມາດ­ຕະ­ຖານ 27 ຂຸມ ສາ­ມາດ​ຮອງ​ຮັບ​ການ​ແຂ່ງ­ຂັນ​ໃນ​ລະ­ດັບ​ສາ­ກົນ ແລະ ເປັນ​ທີ່​ຍອມ­ຮັບ​ຂອງ​ນັກ​ກ໊ອຟ​ພາຍ​ໃນ ແລະ ຕ່າງ­ປະ­ເທດ ນອກ​ນີ້ ສະ­ໜາມ​ກ໊ອບ​ແຫ່ງ​ນີ້ ຍັງ​ໄດ້​ຖືກ​ຈັດ​ຢູ່​ອັບ​ດັບ 1 ໃນ 10 ສະ​ໜາມ​ກ໊ອຟ​ທີ່​ດີ​ສຸດ​ໃນ​ລະ­ດັບ​ອາ­ຊີ.

    ຂພສ ລອງ​ແທ່ງ-ວຽງ​ຈັນ ຕັ້ງ​ຢູ່​ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ ແມ່ນ 1 ໃນ 12 ຂພສ ທີ່​ລັດ­ຖະ­ບານ​ອະ­ນຸ­ມັດ​ຕາມ​ແຜນ ນອກ­ຈາກ​ມີ​ສະ​ໜາມ​ກ໊ອຟ​ແລ້ວ ຍັງ​ມີ​ເຮືອນ​ພັກ ເຮືອນ​ວິນ​ລາ​ລະ­ດັບ​ສູງ ໂຮງ­ຮຽນ (ອະ­ນຸ­ບານ-ວິ­ທະ­ຍາ­ໄລ) ໂຮງ­ໝໍ ສູນ​ການ​ຄ້າ ແລະ ໂຮງ­ແຮມ​ລະ­ດັບ 5 ດາວ ເພື່ອ​ຮອງ​ຮັບ​ຜູ້​ທີ່​ບໍ່​ທັນ​ມີ​ທີ່­ຢູ່​ອາ­ໄສ​ພາຍ​ໃນ ແລະ ຕ່າງ­ປະ­ເທດ​ທີ່​ເຂົ້າ​ມາ​ແບບ​ຖືກ​ກົດ­ໝາຍ ປັດ­ຈຸ­ບັນ​ກຳ­ລັງ​ເຈລະ­ຈາ​ກັບ​ເຈົ້າ​ຂອງ​ດິນ 36 ເຮັກ­ຕາ ທີ່­ຢູ່​ຕິດ​ກັບ​ເຂດ​ດັ່ງ­ກ່າວ ເພື່ອ​ສືບ­ຕໍ່​ການ​ພັດ­ທະ­ນາ​ໄລ­ຍະ 3 ລວມ​ມີ​ສູນ​ການ​ຄ້າ ເຮືອນ​ວິນ​ລາ ໂຮງ­ຮຽນ ແລະ ໂຮງ­ໝໍ ໂດຍ​ມີ​ອຳ­ນາດ​ການ​ປົກ­ຄອງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ​ໃນ​ການ​ເຈລະ­ຈາ​ດັ່ງ­ກ່າວ.

    ທ່ານ ແກ່ນ ວໍ­ລະ​ສານ ຮອງ​ເຈົ້າ­ເມືອງ​ຫາດ​ຊາຍ​ຟອງ ຮອງ​ຫົວ­ໜ້າ​ຄະ­ນະ​ກຳ­ມະ­ການ​ຮັບ­ຜິດ­ຊອບ​ຄຸ້ມ​ຄອງ​ການ​ຂຸດ​ຄົ້ນ​ດິນ ຂພສ ວຽງ​ຈັນ-ລອງ​ແທ່ງ ກ່າວ​ວ່າ: ເມືອງ​ຫາດ​ຊາຍ​ຟອງ ມີ ຂສພ 2 ແຫ່ງ ຄື: ຂສພ ລອງ​ແທ່ງ-ວຽງ​ຈັນ ແລະ ຂສພ ດົງ​ໂພ​ສີ ສຳ­ລັບ ຂພສ ລອງ​ແທ່ງ-ວຽງ​ຈັນ ມີ​ອາ­ຍຸ​ສຳ​ປະ­ທານ 99 ປີ ຜູ້​ພັດ­ທະ­ນາ​ແມ່ນ​ນັກ­ທຸ­ລະ­ກິດ​ຫວຽດ­ນາມ ໂດຍ​ລວມ​ໂຄງ­ການ​ມີ​ຄວາມ​ຄືບ​ໜ້າ​ກາຍ​ເຄິ່ງ​ແລ້ວ ແຮງ​ງານ​ລາວ​ເຂົ້າ​ເຮັດ​ວຽກ​ຢູ່​ເຂດ​ດັ່ງ­ກ່າວ 700 ກວ່າ​ຄົນ ຄາດ​ວ່າ​ຈະ​ສຳ­ເລັດ​ການ​ພັດ­ທະ­ນາ​ເຕັມ​ຮູບ​ແບບ ໃນ​ປີ 2030 ສ່ວນ​ການ​ເຈລະ­ຈາ​ເບື້ອງ​ຕົ້ນ​ກັບ​ເຈົ້າ​ຂອງ​ດິນ​ທີ່​ຈະ​ບຸກ­ເບີກ 36 ເຮັກ­ຕາ ແມ່ນ​ຍັງ​ບໍ່​ທັນ​ສຸກ​ງອມ​ຍ້ອນ​ປະ­ຊາ­ຊົນ ຍັງ​ຮຽກ­ຮ້ອງ​ຄ່າ​ຊົດ​ເຊີຍ​ສູງ​ກວ່າ​ມູນ​ຄ່າ​ຄວາມ​ເປັນ​ຈິງ ເຊິ່ງ​ຕ້ອງ​ໄດ້​ໃຊ້​ເວ­ລາ​ໃນ​ການ​ໄກ່​ເກ່ຍ ເພື່ອ​ຫາ​ທາງ​ອອກ​ຮ່ວມ​ກັນ​ຢ່າງ​ລະ­ອຽດ ບົນ​ພື້ນ­ຖານ​ຜົນ​ປະ­ໂຫຍດ​ສ່ວນ​ລວມ.

ຂ່າວທີ່ກ່ຽວຂ້ອງ