ຂ່າວຫຼ້າສຸດ

ຮ່ວມມືຈັດຕັ້ງປະຕິບັດ ກົນໄກສະໜອງຂໍ້ມູນຄວາມຕ້ອງການນຳໃຊ້ແຮງງານ

302 21 ມ.ນ. 2019 ຂ່າວໜ້າ​ໜຶ່ງ
ຮ່ວມມືຈັດຕັ້ງປະຕິບັດ ກົນໄກສະໜອງຂໍ້ມູນຄວາມຕ້ອງການນຳໃຊ້ແຮງງານ

    ພິ­ທີ​ລົງ​ນາມ​ບົດ​ບັນ­ທຶກ​ການ​ຮ່ວມ​ມື​ກັນ ຈັດ​ຕັ້ງ​ປະ­ຕິ­ບັດ​ກົນ​ໄກ​ສະ­ໜອງ​ຂໍ້​ມູນ​ຄວາມ​ຕ້ອງ­ການ​ນຳ​ໃຊ້​ແຮງ​ງານ ໃນ​ລະ­ບົບ​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ ຈັດ​ຂຶ້ນ​ວັນ​ທີ 18 ມີ­ນາ 2019 ຢູ່​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ (ຮສສ) ລະ­ຫວ່າງ​ທ່ານ ໄທ ແສງ​ອາ​ລຸນ ຮອງ​ຫົວ­ໜ້າ​ກົມ​ພັດ­ທະ­ນາ​ສີ­ມື​ແຮງ​ງານ ແລະ ຈັດ​ຫາ​ງານ ແລະ ທ່ານ ບຸນ​ທ່ຽງ ໄຊ​ສົງ­ຄາມ ຮອງ​ຫົວ­ໜ້າ​ກົມ​ທຸ­ລະ​ກິດ​ພະ­ລັງ­ງານ ກະ­ຊວງ​ພະ­ລັງ­ງານ ແລະ ບໍ່​ແຮ່ (ພບ) ໂດຍ​ຊ້ອງ​ໜ້າ​ທ່ານ​ນາງ ໃບ​ຄຳ ຂັດ​ທິ​ຍະ ຮອງ​ລັດ­ຖະ­ມົນ­ຕີ​ກະ­ຊວງ ຮສສ ທ່ານ ຈັນ​ສອນ ແສນ​ບຸດ­ຕະ­ລາດ ຮອງ​ລັດ­ຖະ­ມົນ­ຕີ​ກະ­ຊວງ ພບ ແລະ ພາກ ສ່ວນ​ກ່ຽວ­ຂ້ອງ.

    ທ່ານ ໄທ ແສງ​ອາ​ລຸນ ກ່າວ​ວ່າ: ກົມ​ພັດ­ທະ­ນາ​ສີ­ມື​ແຮງ​ງານ ແລະ ຈັດ​ຫາ​ງານ ໄດ້​ພະ­ຍາ­ຍາມ​ສ້າງ​ຕາ​ໜ່າງ​ລະ­ບົບ​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ ໃຫ້​ສາ­ມາດ​ເຊື່ອມ​ໂຍງ​ກັນ​ທຸກ​ພາກ­ສ່ວນ​ທີ່​ກ່ຽວ­ຂ້ອງ​ໄປ​ແຕ່​ລະ​ບາດ­ກ້າວ ໂດຍ​ໄດ້​ສ້າງ​ເວບ​ໄຊ​ລະ­ບົບ​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ www.lmi.molsw.gov.la ເຊິ່ງ​ເປັນ​ເຄື່ອງ­ມື​ໜຶ່ງ​ທີ່​ສຳ­ຄັນ​ດ້ານ​ວິ­ຊາ​ການ​ໃນ​ການ​ຂະ­ຫຍາຍ ແລະ ພັດ­ທະ­ນາ​ວຽກ​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ ໃຫ້​ແຕ່​ລະ​ພາກ­ສ່ວນ​ສາ­ມາດ​ມີ​ສ່ວນ​ຮ່ວມ​ເຂົ້າ​ເຖິງ ແລະ ສາ­ມາດ​ນຳ​ໃຊ້​ໄດ້​ຢ່າງ​ກວ້າງ­ຂວາງ.

   ການ​ຮ່ວມ​ມື​ຄັ້ງ​ນີ້ ແມ່ນ​ບາດ­ກ້າວ​ໃໝ່​ແຫ່ງ​ການ​ເຊື່ອມ​ໂຍງ​ລະ­ຫວ່າງ​ຜູ້​ອອກ­ແຮງ​ງານ ແລະ ຜູ້​ໃຊ້​ແຮງ​ງານ​ເຂົ້າ​ຫາ​ກັນ ໂດຍ​ນຳ​ໃຊ້​ລະ­ບົບ​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ ເປັນ​ສື່​ກາງ​ໃນ​ການ​ປະ­ກາດ​ຕຳ­ແໜ່ງ​ງານ​ວ່າງ ຫຼື ປະ­ກາດ​ຮັບ​ສະ­ໝັກ​ງານ ເຊິ່ງ​ການ​ລົງ​ນາມ​ຄັ້ງ​ນີ້ ໄດ້​ຮ່ວມ​ມື​ຈັດ​ຕັ້ງ​ປະ­ຕິ­ບັດ​ກົນ​ໄກ​ການ​ສະ­ໜອງ​ຄວາມ​ຕ້ອງ­ການ​ແຮງ​ງານ (ຂອງ​ຜູ້​ໃຊ້​ແຮງ​ງານ) ລົງ​ໃນ​ລະ­ບົບ​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ ລະ­ຫວ່າງ​ກົມ​ພັດ­ທະ­ນາ​ສີ­ມື​ແຮງ​ງານ ແລະ ຈັດ​ຫາ​ງານ​ກັບ​ກົມ​ທຸ­ລະ​ກິດ​ພະ­ລັງ­ງານ ໂດຍ​ກົມ​ທຸ­ລະ​ກິດ​ພະ­ລັງ­ງານ ຈະ​ຊຸກ­ຍູ້​ໃຫ້​ບັນ­ດາ​ຫົວ­ໜ່ວຍ​ທຸ­ລະ​ກິດ​ທີ່​ຂຶ້ນ​ກັບ​ຂະ­ແໜງ­ການ​ຕົນ ມີ​ສ່ວນ​ຮ່ວມ ແລະ ເປັນ​ເຈົ້າ​ການ​ສະ­ໜອງ​ຂໍ້​ມູນ​ຄວາມ​ຕ້ອງ­ການ​ແຮງ​ງານ ລົງ​ໃນ​ລະ­ບົບ​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ ຊຸກ­ຍູ້-ສົ່ງ­ເສີມ​ໃຫ້​ທຸກ​ພາກ­ສ່ວນ​ໃນ​ສັງ­ຄົມ ສາ­ມາດ​ເຂົ້າ​ເຖິງ​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ ຮູ້​ນຳ​ໃຊ້ ແລະ ເຂົ້າ​ເຖິງ​ເວບ​ໄຊ​ຂອງ​ລະ­ບົບ​ຖານ​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ​ໄດ້​ງ່າຍ​ຂຶ້ນ ເຊິ່ງ​ຈະ​ເປັນ​ປະ­ໂຫຍດ​ໃຫຍ່​ຫຼວງ ໃຫ້​ບັນ­ດາ​ຫົວ­ໜ່ວຍ​ແຮງ​ງານ​ທີ່​ເຮັດ​ທຸ­ລະ​ກິດ​ດ້ານ​ພະ­ລັງ­ງານ ຫຼື ທຸ­ລະ​ກິດ​ກ່ຽວ­ຂ້ອງ ໄດ້​ນຳ​ໃຊ້​ລະ­ບົບ​ນີ້ ປະ­ກາດ​ຮັບ​ສະ­ໝັກ​ງານ​ໃນ​ຕຳ­ແໜ່ງ​ງານ​ຕ່າງໆ ທີ່​ຕ້ອງ­ການ​ໄດ້​ທັນ​ເວ­ລາ ຖືກ­ຕ້ອງ ແລະ ຊັດ​ເຈນ ເພື່ອ​ເຮັດ​ໃຫ້​ຜູ້​ທີ່​ກຳ­ລັງ​ຊອກ​ວຽກ​ເຮັດ​ງານ​ທຳ ທີ່​ໄດ້​ລົງ­ທະ­ບຽນ​ໄວ້​ໃນ​ລະ­ບົບ​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ ສາ­ມາດ​ຊອກ​ຫາ​ວຽກ​ເຮັດ​ທີ່​ເໝາະ​ສົມ​ກັບ​ວິ­ຊາ​ສະ­ເພາະ ຫຼື ຕຳ­ແໜ່ງ​ງານ​ທີ່​ຕົນ​ຕ້ອງ­ການ.

ຂ່າວທີ່ກ່ຽວຂ້ອງ