ດຶງເຊືອກ​ລາວ ຈະ​ສົ່ງ​ນັກກີລາ 2 ທີມ​ເຂົ້າ​ຮ່ວມ ກົວ​ລາ​ລຳ​ເປີ ແຊັມ​ປ້ຽນ​ຊິບ 2019

131 22 ມີ.ນ. 2019 ວົງຈອນກີລາ
ດຶງເຊືອກ​ລາວ ຈະ​ສົ່ງ​ນັກກີລາ 2 ທີມ​ເຂົ້າ​ຮ່ວມ  ກົວ​ລາ​ລຳ​ເປີ ແຊັມ​ປ້ຽນ​ຊິບ 2019

    ສະຫະພັນ​ກີລາ​ດຶງເຊືອກ​ແຫ່ງ​ຊາດ​ລາວ ແຈ້ງ​ໃຫ້​ຊາບ​ເມື່ອ​ບໍ່​ດົນ​ມາ​ນີ້ ວ່າ: ສະຫະພັນ​ດຶງເຊືອກ​ແຫ່ງ​ຊາດ​ມາ​ເລ​ເຊຍ ໄດ້​ເຊີນ​ທີມ​ຊາດ​ລາວ ເຂົ້າ​ຮ່ວມ​ແຂ່ງຂັນ​ກີລາ​ດຶງເຊືອກ​ລາຍການ ກົວ​ລາ​ລຳ​ເປີ ແຊັມ​ປ້ຽນ​ຊີບ 2019 (KL TUG OFWAR CHAMPIONSHIPS 2019) ຢູ່​ກົວ​ລາ​ລຳ​ເປີ ປະເທດ​ມາ​ເລ​ເຊຍ ວັນ​ທີ 26-31 ສິງຫາ 2019 ເພື່ອ​ສະເຫຼີມສະຫຼອງ​ວັນ​ປະກາດ​ເອກະລາດ​ຂອງ​ເມືອງ​ພັດ​ຣາ​ຈາ​ຢາ ແລະ ນະຄອນຫຼວງ​ກົວ​ລາ​ລຳ​ເປີ ໂດຍ​ການ​ແຂ່ງຂັນ​ແບ່ງ​ເປັນ 2 ປະເພດ ຄື: ປະເພດ​ຊາຍ ນ້ຳໜັກ 600 ກິ​ໂລ (ບໍ່​ເກີນ 8 ຄົນ) ປະເພດ​ຍິງ ນ້ຳໜັກ​ບໍ່​ເກີນ 500 ກິ​ໂລ (ບໍ່​ເກີນ 8 ຄົນ) ມີ 11 ປະເທດ​ເຂົ້າ​ຮ່ວມ ຄື: ໄທ ກຳປູເຈຍ ລາວ ຫວຽດນາມ ສິງກະໂປ ບຣູ​ໄນ ອິນ​ໂດ​ເນ​ເຊຍ ມາ​ເລ​ເຊຍ ຟີ​ລິບ​ປິນ ມຽນ​ມາ ແລະ ຕີ​ມໍ​ແລ​​ສ​ເຕ.

    ປັດຈຸບັນ​ນັກກີລາ​ທີມ​ຊາດ​ລາວ ໄດ້​ກະກຽມ​ທີມ​ບາງ​ສ່ວນ ແລະ ເຝິກຊ້ອມ​ເປັນ​ປະຈຳ​ຢູ່​ສະ​ໂມ ສອນ​ໂຮງຮຽນ​ມັດທະຍົມ​ສຶກ​ສາ​ວຽງ​ຈັນ ໃນ​ນີ້​ຈະ​ສົ່ງ​ເຂົ້າ​ຮ່ວມ​ລາຍການ​ດັ່ງກ່າວ 2 ທີມ ໂດຍ​ຕັ້ງ​ເປົ້າ​ສູ້​ຊົນ​ໃຫ້​ຕິດ 1 ໃນ 3 ເພື່ອ​ຫາ​ປະສົບ​ການ​ໄປ​ແຂ່ງຂັນ​ໃນ​ລາຍການ​ລະດັບ​ສາກົນ ຢູ່​ຫວຽດນາມ ເຊິ່ງ​ຈະ​ຈັດ​ຂຶ້ນ​ຕໍ່​ຈາກ​ລາຍການ​ນີ້.

    ກ່ອນ​ຈະ​ເຂົ້າ​ຮ່ວມ​ແຂ່ງຂັນ​ລາຍການ KL TUG OFWAR CHAMPIONSHIPS 2019 ສະ ຫະ​ພັນ​ກິລາ​ດຶງເຊືອກ​ແຫ່ງ​ຊາດ​ລາວ ຈະ​ສົ່ງ​ຄະນະ​ນຳ ຄູ​ເຝິກ ແລະ ນັກ​ກິລາ ເຂົ້າ​ຮ່ວມ​ການ​ແຂ່ງຂັນ​ດຶງເຊືອກ​ຍິງ-ຊາຍ ຊີງ​ແຊັມ​ອາຊີ ຄັ້ງ​ທີ 9 ຢູ່​ປະເທດ​ໄທ ວັນ​ທີ 11-14 ເມສາ 2019 ໂດຍ​ຄາດ​ວ່າ​ຈະ​ມີ​ນັກກີລາ 19 ປະເທດ​ເຂົ້າ​ຮ່ວມ ເຊິ່ງ​ປະກອບ​ມີ​ປະເພດ​ຊາຍ ນ້ຳໜັກ​ລວມ 600 ກິ​ໂລ ບໍ່​ເກີນ 8 ຄົນ ປະເພດ​ຍິງ ນ້ຳໜັກ​ລວມ 500 ກິ​ໂລ ບໍ່​ເກີນ 8 ຄົນ ປະເພດ​ປະສົມ​ຊາຍ-ຍິງ ນ້ຳໜັກ​ລວມ​ບໍ່​ເກີນ 500 ກິ​ໂລ ຕື່ມ​ອີກ. 

ຂ່າວທີ່ກ່ຽວຂ້ອງ