ຂ່າວຫຼ້າສຸດ

ຄິດຮອດຜູ້ຕາຍ ເສຍດາຍຜູ້ຍັງ

711 22 ມ.ນ. 2019 ນານາສາລະ

    ໃນ​ສັງ­ຄົມ​ບ້ານ​ເຮົາ​ຍັງ​ມີ​ຄົນ​ບໍ່​ເຫັນ​ຄ່າ​ຂອງ​ຄົນ ສ້າງ​ປະ­ໂຫຍດ​ແກ່​ຊາດ​ບ້ານ​ເມືອງ ໃນ​ຂະ­ນະ​ທີ່​ພວກ​ເຂົາ​ເຫຼົ່າ­ນັ້ນ​ຍັງ​ມີ​ຊີ­ວິດ ຫຼື ຈາກ​ພວກ​ເຮົາ​ໄປ​ແລ້ວ​ກໍ​ຕາມ ເຊິ່ງ​ສ່ວນ​ຕົວ​ຜູ້​ຂຽນ ຂໍ​ສະ­ເໜີ​ແລກ­ປ່ຽນ​ບົດ­ຮຽນ​ທີ່​ເຫັນ​ປາ­ກົດ­ການ​ເກີດ​ຂຶ້ນ​ກັບ​ບາງ​ຄົນ​ໃນ​ສັງ­ຄົມ ເຊິ່ງ​ໃນ​ເວ­ລາ​ທີ່​ຜູ້­ກ່ຽວ​ຍັງ​ມີ​ຊີ­ວິດ ຄົນ​ອ້ອມ​ຂ້າງ ຫຼື ໃກ້​ໂຕ ເຊັ່ນ: ໃນ​ໜ່ວຍ​ງານ​ດຽວ​ກັນ ຫຼື ສະ­ມາ­ຄົມ​ດຽວ​ກັນ​ກໍ​ອິດ­ສາ​ຕາ​ຮ້ອນ ຫຼາຍ​ຄັ້ງ​ເຈິ​ະ​ໜ້າ​ກັນ​ບໍ່​ຢາກ​ຮອດ​ເອີ່ຍ​ປາກ​ຖາມ ຊ້ຳ​ບໍ່​ພໍ​ເວ­ລາ​ສະ­ເໜີ​ຜົນ­ງານ​ຍັງ​ອອກ­ປາກ​ຂັດ­ຂວາງ​ໄວ້​ອີກ ບາດ​ຜູ້­ກ່ຽວ​ຕາຍ​ຈາກ​ໄປ​ກັບ​ມາ­ຕີ​ສີ​ໜ້າ​ສະ­ແດງ​ຄວາມ​ຮັກ­ຫອມ​ຂຶ້ນ​ມາ​ທັນ­ທີ...

    ປາ­ກົດ­ການ​ທີ່​ເວົ້າ​ຂ້າງ​ເທິງ​ນີ້ ຜູ້​ຂຽນ​ບໍ່​ແນ່​ໃຈ​ວ່າ​ຜູ້​ອ່ານ​ຈະ​ເຄີຍ​ເຈິ​ະ​ແບບ​ດຽວ​ກັນ ຫຼື ບໍ່ ? ຖ້າ​ເປັນ​ແນວ​ນັ້ນ​ແທ້​ກໍ​ບອກ​ໄດ້​ວ່າ ໄດ້​ແຕ່​ຄິດ​ຮອດ​ຜູ້​ຕາຍ ເສຍ­ດາຍ​ຜູ້​ຍັງ​ແທ້ໆ ເພາະ​ຄ່າ​ຂອງ​ຄົນ ສຳ­ລັບ​ຄົນ​ເຮົາ ຄວນ​ຈະ​ຖືກ​ຍອມ­ຮັບ ແລະ ເຊີດ​ຊູ​ກຽດ​ຕອນ​ເຂົາ​ຍັງ​ມີ​ຊີ­ວິດ ເຊິ່ງ​ມັນ​ຈະ​ກາຍ­ເປັນ​ແຮງ​ກະ​ຕຸ້ນ ແລະ ຄ່າ​ນິ­ຍົມ​ທີ່​ດີ​ໃຫ້​ຄົນ​ຜູ້​ໄຕ່​ຕາມ​ຫຼັງ​ໄດ້​ຫ້າວ­ຫັນ ຢາກ​ສ້າງ​ຜົນ­ງານ​ໃຫ້​ຊາດ ແລະ ສັງ­ຄົມ ປະ­ເດັນ​ນີ້​ມັນ​ຈຶ່ງ​ພົວ­ພັນ​ເຖິງ​ໜ່ວຍ​ງານ ຫຼື ຫ້ອງ­ການ ສະ­ມາ­ຄົມ​ໃດ​ກໍ​ຕາມ ຄວນ​ສ້າງ​ຄ່າ​ນິ­ຍົມ​ຍອມ­ຮັບ​ຄວາມ​ຮູ້​ຄວາມ​ສາ­ມາດ​ຂອງ​ໝູ່​ເພື່ອນ​ຮ່ວມ​ງານ ໂດຍ​ຍົກ​ລະ­ດັບ​ແນວ​ຄິດ​ຈິດ­ໃຈ​ຂອງ​ຕົນ​ເອງ​ໃຫ້​ກວ້າງ​ອອກ ແລະ ສູງ​ຂຶ້ນ ຈຶ່ງ​ຈະ​ແນມ​ເຫັນ​ຄວາມ​ດີ ແລະ ຍອມ­ຮັບ​ຄຸນ­ຄ່າ​ຂອງ​ຄົນ​ອື່ນ​ໄດ້ ເຊິ່ງ​ມັນ​ຮຽກ­ຮ້ອງ​ໃຫ້​ຫຼາຍ​ໜ່ວຍ​ງານ​ໄດ້​ຄຳ­ນຶງ​ເຖິງ​ການ​ສ້າງ​ຄ່າ​ນິ­ຍົມ​ອັນ​ນີ້ ເພື່ອ​ເປັນ​ການ​ສ້າງ­ສັນ​ສັງ­ຄົມ​ໃຫ້​ຮູ້­ຈັກ ແລະ ເຄົາ­ລົບ​ໃນ​ຄຸນ­ຄ່າ ແລະ ຜົນ­ງານ​ຂອງ​ຄົນ​ຢູ່​ຮ່ວມ​ກັນ ບໍ່​ແມ່ນ​ວ່າ​ຈະ​ຕຽມ​ຍ້ອງ​ຜູ້­ກ່ຽວ​ພຽງ​ແຕ່​ບາດ​ຕາຍ​ຈາກ​ໄປ​ແລ້ວ.

    ຄິດ​ຮອດ​ຜູ້​ຕາຍ ເສຍ­ດາຍ​ຜູ້​ຍັງ ເບິ່ງ​ຄື​ວ່າ​ເປັນ​ຄຳ​ເວົ້າ​ທຳ​ມະ​ດາ​ທີ່​ຄົນ​ໃນ​ສັງ­ຄົມ​ໃຊ້​ເວົ້າ​ຢອກ​ກ້ຽວ​ສາວ​ກັນ ແຕ່​ຫາກ​ຄິດ​ລົງ​ໃຫ້​ເລິກ​ກໍ​ຈະ​ພົບ​ວ່າ​ຄຳ​ເວົ້າ​ດັ່ງ­ກ່າວ ມັນ​ຍັງ​ມີ​ຄວາມ​ໝາຍ​ເຖິງ​ເປັນ​ຄົນ​ແນມ​ບໍ່​ເຫັນ​ຄຸນ­ຄ່າ​ຄົນ​ຕາຍ ຫຼື ຄົນ​ເປັນ​ດ້ວຍ​ກັນ​ກໍ​ຍັງ​ແນມ​ບໍ່​ເຫັນ​ຄຸນ­ຄ່າ​ຂອງ​ຄົນ​ຍັງ​ມີ​ຊີ­ວິດ​ລົມ​ຫາຍ­ໃຈ​ດ້ວຍ​ກັນ ເຊິ່ງ​ສາ­ເຫດ​ດັ່ງ­ກ່າວ​ອາດ​ມາ​ຈາກ​ການ​ໃຈ­ແຄບ ຫຼື ໄດ້​ຄະ­ນະ​ຜູ້​ບໍ­ລິ­ຫານ ຂາດ​ວິ­ໄສ​ທັດ​ເບິ່ງ​ບໍ່​ເຫັນ​ອັນ​ໃດ​ເປັນ​ຄຸນ­ຄ່າ​ແທ້ ຄວນ​ປະ­ຕິ­ບັດ​ຕໍ່​ເພື່ອນ​ມະ­ນຸດ​ດ້ວຍ​ກັນ.

    ສັງ​ລວມ​ໄດ້​ວ່າ: ຕອນ​ນີ້​ສັງ­ຄົມ​ຍາມ​ໃດ​ກໍ​ຕ້ອງ­ການ​ການ​ສ້າງ​ຄ່າ​ນິ­ຍົມ​ການ​ຍອມ­ຮັບ ແລະ ເຊີດ​ຊູ​ກຽດ ຄົນ​ດີ​ມີ​ສີ­ມື​ທີ່​ມີ​ຜົນ­ງານ​ແກ່​ຊາດ ແລະ ສັງ­ຄົມ ເຊິ່ງ​ບໍ່​ແມ່ນ​ຈະ​ຖື​ຄະ­ຕິ​ຂອງ​ຄົນ​ຄິດ​ສັ້ນ ໃຈ­ແຄບ​ວ່າ ຜູ້​ໃດ​ບໍ່​ເຮັດ​ຕາມ​ເຮົາ​ຖື​ວ່າ​ຜູ້​ນັ້ນ​ບໍ່​ໄປ​ນຳ​ແນວ­ທາງ ໃນ​ຂະ­ນະ​ດຽວ​ກັນ ຜູ້­ກ່ຽວ​ນັ້ນ​ບໍ່​ເຄີຍ​ຂ້າ​ພະ­ຍາດ​ເພື່ອ​ປິ່ນ­ປົວ​ເອົາ​ຄົນ​ຈັກ​ເທື່ອ !.

ຂ່າວທີ່ກ່ຽວຂ້ອງ