ເຕະບານ​ມິດຕະພາບ ສະຫຼອງ 64 ປີ ວັນ​ສ້າງຕັ້ງ​ພັກ

111 25 ມີ.ນ. 2019 ວົງຈອນກີລາ
ເຕະບານ​ມິດຕະພາບ ສະຫຼອງ 64 ປີ ວັນ​ສ້າງຕັ້ງ​ພັກ

    ການ​ແຂ່ງຂັນ​ເຕະບານ​ມິດຕະພາບ ເພື່ອ​ສ້າງ​ຂະ​ບວນ​ການ​ສະເຫຼີມສະຫຼອງ​ວັນ​ສ້າງຕັ້ງ​ພັກ​ປະຊາຊົນ​ປະຕິວັດ​ລາວ ຄົບຮອບ 64 ປີ (22 ມີນາ 1955-22 ມີນາ 2019) ໄດ້​ມີ​ຂຶ້ນ​ໃນ​ວັນ​ທີ 21 ມີນາ 2019 ຜ່ານ​ມາ ທີ່​ສະໜາມ​ກີລາ​ເຕະບານ​ເຈົ້າ​ອະນຸວົງ ນະຄອນຫຼວງ​ວຽງ​ຈັນ (ນວ) ໂດຍ​ມີ ທ່ານ ສົມ​ພູ ພົງສາ ຜູ້​ຊ່ວຍ​ລັດຖະມົນຕີ ກະຊວງ​ສຶກ​ສາ​ທິ​ການ ແລະ ກີລາ ຮອງ​ປະທານ​ຄະນະ​ກຳມະການ​ໂອ​ແລມ​ປິກ​ແຫ່ງ​ຊາດ​ລາວ ແລະ ທ່ານ ສົມ​ພອນ ສອນ​ດາລາ ຮອງ​ຫົວໜ້າ​ພະ​ແນກ​ສຶກ​ສາ​ທິ​ການ ແລະ ກີລາ ນວ ມີ​ບັນດາ​ຫົວໜ້າ-ຮອງ​ຫົວໜ້າ​ກົມ ເຈົ້າເມືອງ-ຮອງ​ເຈົ້າເມືອງ ພ້ອມ​ດ້ວຍ​ນັກກີລາ ແລະ ພາກສ່ວນ​ທີ່​ກ່ຽວຂ້ອງ.

    ການ​ແຂ່ງຂັນ​ເຕະບານ​ມິດຕະພາບ​ໃນ​ຄັ້ງ​ນີ້ ໃນ​ເບື້ອງ​ຕົ້ນ​ກຳນົດ​ແຂ່ງຂັນ​ທັງ​ໝົດ 3 ຄູ່ ແຕ່​ເນື່ອງ​ຈາກ ທີມ​ຊາວ​ໜຸ່ມ ອີ​ໂວ ບໍ່​ສາມາດ​ຫາ​ຄູ່​ແຂ່ງຂັນ​ໄດ້ ຈຶ່ງ​ເຫຼືອງ​ການ​ແຂ່ງຂັນ​ພຽງ 2 ຄູ່​ເທົ່າ​ນັ້ນ ໂດຍ​ຄູ່​ທຳ​ອິດ ທີມ​ລວມ​ດາລາ​ລາວ ພົບ​ກັບ ທີມ​ສະມາຄົມ​ລົດ​ແທັກ​ຊີ ແລະ ຄູ່​ທີ 2 ທີມ​ວີ​ໄອ​ພີ ກະຊວງ​ສຶກ​ສາ​ທິ​ການ ແລະ ກີລາ ພົບ​ກັບ ທີມ​ສະມາຄົມ​ກີລາ-ກາຍຍະກຳ ນວ ຜ່ານ​ການ​ແຂ່ງຂັນ​ຄູ່​ທຳ​ອິດ ຜົນ​ປາກົດ​ວ່າ ທີມ​ລວມ​ດາລາ​ລາວ ເອົາ​ຊະນະ ທີມ​ສະມາຄົມ​ລົດ​ແທັກ​ຊີ ໄປ​ໄດ້ 3-0 ປະຕູ ສ່ວນ​ຄູ່​ທີ 2 ທີມ​ວີ​ໄອ​ພີ ກະຊວງ​ສຶກ​ສາ​ທິ​ການ ແລະ ກີລາ ເຮັດ​ໄດ້​ພຽງ​ສະເໝີ ກັບ ທີມ​ສະມາຄົມ​ກີລາ-ກາຍຍະກຳ ໄປ​ແບບ​ສຸດ​ມ່ວນ 1-1 ປະຕູ

    ການ​ແຂ່ງຂັນ​ກິລາ​ເຕະບານ​ມິດຕະພາບ​ດັ່ງກ່າວ ນອກຈາກ​ການ​ເປັນ​ການ​ສ້າງ​ຂະ​ບວນ​ການ​ສະເຫຼີມສະຫຼອງ​ວັນ​ສ້າງຕັ້ງ​ພັກ ຄົບຮອບ 64 ປີ​ແລ້ວ ຍັງ​ເປັນ​ການ​ສ້າງ​ສາຍ​ພົວພັນ​ມິດຕະພາບ​ອັນ​ດີງາມ ຮັດ​ແໜ້ນ​ຄວາມ​ສາມັກຄີ​ເປັນ​ປຶກ​ແຜ່ນ ແລະ ເປັນ​ການ​ແລກປ່ຽນ​ບົດຮຽນ​ເຊິ່ງ​ກັນ​ແລະ​ກັນ​ດ້ານ​ການ​ຫຼິ້ນ​ກີລາ ເພື່ອ​ສຸຂະພາບ ເພື່ອ​ເປັນ​ແບບຢ່າງ​ທີ່​ດີ​ໃຫ້​ກັບ​ເຍົາວະ​ຊົນ ໃຫ້​ຫັນ​ມາ​ຫຼິ້ນ​ກີລາ​ໃຫ້​ມີ​ສຸຂະພາບ​ແຂງແຮງ​ສົມບູນ ແລະ ຫ່າງ​ໄກ​ຈາກ​ສິ່ງ​ເສບ​ຕິດ.

ຂ່າວທີ່ກ່ຽວຂ້ອງ