ຂ່າວຫຼ້າສຸດ

ມວຍກຳມະການ

732 25 ມ.ນ. 2019 ນານາສາລະ

    ຫາກ​ເວົ້າ​ເຖິງ​ການ​ຕີ­ມວຍ​ເທິງ​ເວ­ທີ ຖ້າ­ວ່າ​ມວຍ​ຝ່າຍ​ໃດ​ຫາກ​ເປັນ​ມວຍ​ຂອງ​ກຳ­ມະ­ການ ຈະ​ເຮັດ​ໃຫ້​ມວຍ​ຝ່າຍ​ກົງ­ກັນ­ຂ້າມ​ຕ້ອງ​ໜັກ​ໃຈ ແລະ ຍິ່ງ​ໄປ​ກວ່າ​ນັ້ນ ຖ້າ­ວ່າ​ເປັນ​ເວ­ທີ​ຂອງ​ເຂົາ​ຍິ່ງ​ເຮັດ​ໃຫ້​ຄູ່​ຕໍ່­ສູ້​ໜັກ​ໃຈ​ຂຶ້ນ​ຕື່ມ​ອີກ ເພາະ​ຕີ​ບໍ່​ດີ ຫຼື ຊົກ​ໄດ້​ຄະ­ແນນ​ບໍ່​ຂາດ ແມ່ນ​ມີ​ຫວັງ​ຫອບ​ເອົາ​ຄວາມ​ປະ​ລາ​ໄຊ​ກັບ​ບ້ານ ແນ່­ນອນ ເຊິ່ງ​ບົດ­ຮຽນ​ຈາກ​ເວ­ທີ​ມວຍ​ອາດ​ຄ້າຍ­ຄື​ບັນ­ຫາ​ຂອງ​ພະ­ນັກ­ງານ​ຢູ່​ຫ້ອງ­ການ​ໃດ​ໜຶ່ງ ຖ້າ­ວ່າ​ຍັງ​ມີ​ການ​ຫຼິ້ນ​ພັກ ຫຼິ້ນ​ພວກ​ກໍ​ອາດ​ເຮັດ​ໃຫ້​ຄົນ​ດີ​ມີ​ສີ­ມື​ໝົດ​ຫວັງ ໃນ​ການ​ໃຊ້​ຄວາມ​ຮູ້​ຄວາມ​ສາ­ມາດ​ເພື່ອ​ສ່ວນ​ລວມ.

    ບາງ​ຄົນ​ອາດ​ຍັງ​ຈື່​ໄດ້​ດີ​ວ່າ​ພ້າ​ໃຜ ຂວານ​ມັນ ເຊິ່ງ​ໝາຍ​ເຖິງ​ຜູ້​ໃຊ້​ວັດ­ຖຸ​ເຫຼົ່າ­ນັ້ນ​ມັກ​ໃຊ້​ສະ­ເພາະ​ຂອງ​ທີ່​ຕົນ​ມັກ ຫຼື ຖືກ​ໃຈ​ຕົນ​ເອງ ສ່ວນ​ຂອງ​ຄົນ​ອື່ນ ເຖິງ​ແມ່ນ​ວ່າ​ຈະ​ດີ​ກວ່າ ແຕ່​ຖ້າ​ບໍ່​ຖືກ​ໃຈ​ຕົນ​ເອງ​ກໍ​ຈະ​ບໍ່​ຍອມ​ໃຊ້​ເດັດ­ຂາດ ເຮັດ​ໃຫ້​ເສຍ​ຂອງ​ດີ ແລະ ສູນ​ເສຍ​ປະ­ໂຫຍດ​ທີ່​ຈະ​ເກີດ​ແກ່​ສ່ວນ​ລວມ ໄລ­ຍະ​ບໍ່​ດົນ​ມາ​ນີ້ ກໍ​ມີ​ຂ່າວ​ເລື່ອງ​ຕຳ​ແລ້ວ​ໜີ ຫຼາຍ​ກໍ­ລະ­ນີ​ທີ່​ສັງ­ຄົມ​ຕິດ­ຕາມ​ເບິ່ງ​ວິ­ທີ​ແກ້​ໄຂ​ຄະ­ດີ ເຊິ່ງ​ສ່ວນ​ຕົວ​ເຂົ້າ­ໃຈ​ວ່າ ຫົວ­ອົກ​ຂອງ​ສັງ­ຄົມ ກໍ​ຄື ຊິ​ຮຽກ­ຮ້ອງ​ຄວາມ​ເປັນ​ທຳ ແລະ ມາ­ລະ­ຍາດ​ທີ່​ເພິ່ງ​ປາ­ຖະ­ໜາ ເພື່ອ​ໃຫ້​ສັງ­ຄົມ​ບ້ານ​ເຮົາ​ໜ້າ​ຢູ່ ສົມ​ກັບ​ເປັນ​ເມືອງ​ພຸດ ໂດຍ​ບໍ່​ໝາຍ​ຄວາມ​ວ່າ ພໍ​ເຫຼົ້າ​ເຂົ້າ​ປາກ​ມີ​ກຳ­ລັງ​ຢູ່​ໃນ​ມື​ແລ້ວ​ປະ­ພຶດ​ຕາມ­ໃຈ​ຕົນ​ເອງ ຈົນ​ກາຍ­ເປັນ​ຂີ້​ປາກ​ຂອງ​ສັງ­ຄົມ​ຊຸບ​ຊິບ​ນິນ­ທາ ເຊິ່ງ​ມັນ​ທ່າ​ອ່ຽງ​ທາງ​ລົບ​ທາງ​ເສຍ​ຫາຍ​ຫຼາຍ​ກວ່າ.

    ມາ­ລະ­ຍາດ​ທາງ​ສັງ­ຄົມ ໂດຍ​ສະ­ເພາະ ມາ­ລະ­ຍາດ​ການ​ຂັບ​ຂີ່​ສັນ­ຈອນ​ໄປ​ມາ​ຢູ່​ເທິງ​ຖະ­ໜົນ​ນັ້ນ ທ່າ​ອ່ຽງ​ໜຶ່ງ​ກໍ​ປາ­ກົດ​ໃຫ້​ເຫັນ​ອາ­ການ​ແລ້ງ​ນ້ຳ­ໃຈ (ຈິດ­ໃຈ​ຄັບ­ແຄບ) ຫຼາຍ​ຂຶ້ນ ເພາະ​ສ່ວນ​ໜຶ່ງ​ອາດ​ເກີດ​ມາ​ຈາກ​ຄຳ​ວ່າ ການ​ແຂ່ງ­ຂັນ​ເພື່ອ​ຄວາມ​ຢູ່​ລອດ ຈົນ​ເຮັດ​ໃຫ້​ຫຼາຍ​ຄົນ​ຂາດ​ນ້ຳ­ໃຈ​ເສຍ­ສະ­ຫຼະ ແລະ ມາ­ລະ­ຍາດ​ທາງ​ສັງ­ຄົມ​ທີ່​ຄວນ​ຈະ​ເປັນ ຜູ້​ຂຽນ​ຈຶ່ງ​ຂໍ​ຝາກ​ຄຳ​ຖາມ​ຄິດ​ນຳ​ກັນ​ວ່າ ຄຸນ­ສົມ­ບັດ​ສຶກ​ສາ​ທີ່​ຮຽນ​ມາ​ນັ້ນ​ມັນ​ຍັງ​ໄດ້­ຜົນ​ດີ​ຫຼາຍ​ໜ້ອຍ​ພຽງ​ໃດ ? ຫຼື ວ່າ​ເປັນ​ນຳ​ຜູ້­ກ່ຽວ​ເອງ ຫຼື ວ່າ​ໜ່ວຍ​ງານ ແລະ ຄອບ­ຄົວ​ບໍ່​ໄດ້​ມີ​ວິ­ທີ​ການ​ອົບ­ຮົມ​ກັນ.

    ການ​ຕັດ​ໄຟ​ແຕ່​ຕົ້ນ​ລົມ​ນັ້ນ ຄົງ​ຈະ​ບໍ່​ມີ​ໃຜ​ກ້າ​ປະ­ຕິ­ເສດ​ວ່າ ມັນ​ແມ່ນ​ວິ­ທີ​ການ​ແກ້​ບັນ­ຫາ​ໄດ້​ດີ​ກວ່າ​ວິ­ທີ​ປະ­ປ່ອຍ​ໃຫ້​ໄຟ​ມັນ​ລຸ­ກລາມ​ໄປ​ໄກ ຫຼື ວ່າ​ຈະ​ແກງ​ເຫັດ​ກິນ​ຕອນ​ມັນ​ຍັງ​ອ່ອນ​ອາດ​ດີ​ກວ່າ ປະ​ໄວ້​ໃຫ້​ມັນ​ແກ່​ກາຍ ຍາມ​ແກງ ບໍ່​ວ່າ​ຄຸນ­ສົມ­ບັດ​ສຶກ​ສາ ຫຼື ມາ­ລະ­ຍາດ​ສັງ­ຄົມ ຄົງ​ຈະ​ບໍ່​ດີ­ເລີດ​ເທົ່າ​ການ​ປະ­ຕິ­ບັດ​ລະ­ບຽບ​ກົດ­ໝາຍ​ຢ່າງ​ເຄັ່ງ​ຄັດ ແລະ ເທົ່າ​ທຽມ​ໃນ​ຖາ­ນະ​ລັດ​ແຫ່ງ​ກົດ­ໝາຍ...!

ຂ່າວທີ່ກ່ຽວຂ້ອງ