ສ ອາເມຣິກາ - ຈີນ ກຳນົດເວລາເຈລະຈາການຄ້າຮອບໃໝ່

99 25 ມີ.ນ. 2019 ຂ່າວຕ່າງປະເທດ
ສ ອາເມຣິກາ - ຈີນ ກຳນົດເວລາເຈລະຈາການຄ້າຮອບໃໝ່

    ກະຊວງ​ການ​ຄ້າ​ຈີນ ແຈ້ງ​ໃຫ້​ຮູ້ເມື່ອ​ວັນ​ພະຫັດ​ທີ່​ຜ່ານ​ມາ​ວ່າ ທ່ານ ໂຣ​ເບີດ ໄລ​ທີ​ເຊີ ຜູ້​ແທນ​ການ​ຄ້າ ແລະ ທ່ານ ສະ​ເຕ​ເວນ ມະນູ​ຊິນ ລັດຖະມົນຕີ​ກະຊວງ​ການ​ເງິນ​ຂອງ ສ ອາ​ເມ​ຣິ​ກາ ຄາດ​ວ່າ​ຈະ​ເຄື່ອນ​ໄຫວ​ຢ້ຽມຢາມ​ຈີນ ໃນ​ວັນ​ທີ 28-29 ມີນາ​ນີ້ ເພື່ອ​ເຂົ້າ​ຮ່ວມ​ການ​ເຈລະຈາ​ຮອບ​ໃໝ່ ແນໃສ່​ຢຸດຕິ​ການ​ພິພາດ​ດ້ານ​ການ​ຄ້າ​ລະຫວ່າງ​ສອງ​ປະເທດ.

    ໂຄສົກ​ກະຊວງ​ການ​ຄ້າ​ຈີນ ກ່າວ​ຕໍ່​ກອງ​ປະຊຸມ​ຖະແຫຼງ​ຂ່າວ ໂດຍ​ໃຫ້​ຮູ້​ຕື່ມ​ວ່າ ຫຼັງ​ຈາກ​ການ ຢ້ຽມຢາມ​ຂອງ​ຄະນະ​ຜູ້​ແທນ ສ ອາ​ເມ​ຣິ​ກາ ແລ້ວ ທ່ານ ຫຼີວ​ເຮີ ຮອງ​ນາຍົກລັດຖະມົນຕີ​ຈີນ ຈະ​ເດີນທາງ​ໄປ​ຍັງ ສ ອາ​ເມ​ຣິ​ກາ ໃນ​ເດືອນ​ເມສາ​ໜ້າ​ນີ້ ເພື່ອ​ສືບຕໍ່​ການ​ເຈລະຈາ.

    ສ ອາ​ເມ​ຣິ​ກາ ແລະ ຈີນ ຕົກ​ຢູ່​ໃນ​ສົງຄາມ​ການ​ຄ້າ ຫຼັງ​ຈາກ​ທີ່​ສອງ​ຝ່າຍ​ຕອບ​ໂຕ້​ກັນ ດ້ວຍ​ມາດ​ຕະການ​ພາສີ​ອາກອນ ທີ່​ແນໃສ່​ສິນຄ້າ​ຂອງ​ກັນ ແລະ ກັນ ເປັນ​ມູນ​ຄ່າ​ຫຼາຍ​ຮ້ອຍ​ຕື້ ໂດ​ລາ​ສະຫະລັດ. ມາ​ຮອດ​ເວລາ​ນີ້ ຍອດ​ມູນ​ຄ່າ​ສິນຄ້າ ທີ່​ຖືກ​ຂຶ້ນ​ພາສີ​ຂອງ​ສອງ​ຝ່າຍ ໄດ້​ຂຶ້ນ​ສູ່​ຫຼາຍ​ກວ່າ 360 ຕື້​ໂດ​ລາ​ສະຫະລັດ​ແລ້ວ.

ຂ່າວທີ່ກ່ຽວຂ້ອງ