USAID LUNA II ອຳນວຍຄວາມສະດວກໃຫ້ການລົງທຶນເຊື່ອມໂຍງລາວສູ່ສາກົນ

186 25 ມີ.ນ. 2019 ຂ່າວໜ້າ​ໜຶ່ງ
USAID LUNA II ອຳນວຍຄວາມສະດວກໃຫ້ການລົງທຶນເຊື່ອມໂຍງລາວສູ່ສາກົນ

    ພິ­ທີ​ປິດ​ໂຄງ­ການ​ຮ່ວມ​ມື​ລາວ-ສະ­ຫະ­ລັດ​ອາ​ເມ​ຣິ​ກາ ເພື່ອ​ການ​ເຊື່ອມ​ໂຍງ​ສາ­ກົນ ແລະ ອາ​ຊຽນ (USAID LUNA II) ທີ່​ສະ­ໜັບ­ສະ­ໜູນ​ການ​ອຳ­ນວຍ​ຄວາມ​ສະ­ດວກ​ການ​ຄ້າ ແລະ ການ​ເຊື່ອມ​ໂຍງ​ດ້ານ​ເສດ­ຖະ­ກິດ ຈັດ​ຂຶ້ນ​ວັນ​ທີ 22 ມີ­ນາ 2019 ຢູ່​ໂຮງ­ແຮມ​ລາວ​ພລາ​ຊາ ໂດຍ​ມີ​ທ່ານ​ນາງ ເຂັມ​ມະ­ນີ ພົນ​ເສ­ນາ ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ທ່ານ​ນາງ ຣີ​ນາ ບິດ​ເຕີ ເອກ​ອັກ​ຄະ​ລັດ​ຖະ​ທູດ ສ ອາ​ເມ​ຣິ​ກາ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ກະ­ຊວງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ນາງ ຣີ​ນາ ບິດ​ເຕີ ກ່າວ​ວ່າ: 5 ປີ­ຜ່ານ­ມາ​ໂຄງ­ການ USAID LUNA II ໄດ້​ເຮັດ​ໜ້າ­ທີ່​ຊຸກ­ຍູ້​ການ​ຮ່ວມ​ມື ແລະ ການ​ສົນ­ທະ­ນາ​ລະ­ຫວ່າງ 2 ຊາດ ລາວ-ອາ​ເມ​ຣິ​ກາ ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ທີ່​ກ່ຽວ​ພັນ​ກັບ​ພັນ­ທະ​ຂອງ ສປປ ລາວ ໃນ​ນາມ​ທີ່​ເປັນ​ສະ­ມາ­ຊິກ​ຂອງ​ອົງ­ການ​ການ​ຄ້າ​ໂລກ ປະ­ຊາ​ຄົມ​ເສດ­ຖະ­ກິດ​ອາ​ຊຽນ ແລະ ພັນ­ທະ​ຂອງ​ສັນ­ຍາ​ການ​ຄ້າ 2 ຝ່າຍ ລາວ-ອາ​ເມ​ຣິ​ກາ.

    ໂຄງ­ການ​ດັ່ງ­ກ່າວ ແມ່ນ​ໂຄງ­ການ​ຊ່ວຍ­ເຫຼືອ​ລ້າ ໄລ­ຍະ​ຈັດ​ຕັ້ງ​ປະ­ຕິ­ບັດ 5 ປີ ຂອງ​ອົງ­ການ​ພັດ­ທະ­ນາ​ສາ­ກົນ​ອາ​ເມ​ຣິ​ກາ (USAID) ເຊິ່ງ​ສ້າງ​ຂຶ້ນ​ເພື່ອ​ສະ­ໜັບ­ສະ­ໜູນ​ວຽກ​ງານ​ການ​ຄ້າ​ຮ່ວມ​ກັບ ສ ອາ​ເມ​ຣິ​ກາ ແລະ ເຊື່ອມ​ໂຍງ ສປປ ລາວ ເຂົ້າ​ສູ່​ປະ­ຊາ​ຄົມ​ເສດ­ຖະ­ກິດ​ອາ​ຊຽນ ແລະ ອົງ­ການ​ການ​ຄ້າ​ໂລກ ນັບ​ແຕ່​ປີ 2014 ໂຄງ­ການ USAID LUNA II ໄດ້​ເຮັດ​ວຽກ​ຢ່າງ​ໃກ້­ຊິດ​ກັບ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ແລະ ກະ­ຊວງ​ຕ່າງໆ ເພື່ອ​ປັບ­ປຸງ​ບັນ­ດາ​ນິ­ຕິ​ກຳ ໂດຍ​ສະ­ເພາະ ນິ­ຕິ​ກຳ​ຊັບ​ສິນ​ທາງ​ປັນ­ຍາ ການ​ແກ້​ໄຂ​ທາງ​ການ​ຄ້າ​ໃນ​ຂອບ​ອົງ­ການ​ການ​ຄ້າ​ໂລກ ສະ­ໜັບ­ສະ­ໜູນ​ການ​ຄ້າ​ແບບ​ດິ​ຈິ​ຕອນ ຂະ­ຫຍາຍ​ຕະ­ຫຼາດ​ໃຫ້​ບັນ­ດາ​ຜູ້​ປະ­ກອບ​ການ​ລາວ ເພີ່ມ​ຄວາມ​ເຂົ້າ­ໃຈ​ກ່ຽວ​ກັບ​ສິດ​ຂອງ​ຜູ້​ຊົມ­ໃຊ້ ແລະ ນິ­ຕິ​ກຳ​ຕ່າງໆ ເຊິ່ງ​ໄດ້​ຊ່ວຍ​ໃຫ້ ສປປ ລາວ ມີ​ສ່ວນ​ຮ່ວມ​ກັບ​ສາ­ກົນ ໄດ້​ຮັບ​ຜົນ​ປະ­ໂຫຍດ​ນຳ​ຂໍ້​ຕົກ­ລົງ​ສາ­ກົນ​ຕ່າງໆ ແລະ ຊ່ວຍ​ສະ­ໜັບ­ສະ­ໜູນ​ການ​ຄ້າ​ແບບ​ຍຸດ­ຕິ​ທຳ ຖືກ​ກັບ​ລະ­ບຽບ​ຕ່າງໆ.

    ພ້ອມ​ນີ້ ການ​ເຮັດ​ວຽກ​ຮ່ວມ​ກັນ​ລະ­ຫວ່າງ ລາວ-ອາ​ເມ​ຣິ​ກາ ຍັງ​ໄດ້​ເພີ່ມ​ຄວາມ​ເຂັ້ມ­ແຂງ​ໃຫ້ ສປປ ລາວ ໃນ​ນາມ​ຄູ່​ຮ່ວມ​ມື​ກັບ ສ ອາ​ເມ​ຣິ​ກາ ສະ­ມາ­ຊິກ​ຂອງ​ອາ​ຊຽນ ແລະ ສ່ວນ​ໜຶ່ງ​ຂອງ​ສາ­ກົນ ໂຄງ­ການ​ດັ່ງ­ກ່າວ ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ ໂດຍ​ບໍ­ລິ­ສັດ ເນ​ຕັນ​ແອັດ​ໂຊ​ຊີ​ເອດ ເຊິ່ງ​ເປັນ​ບໍ­ລິ­ສັດ​ທີ່​ປຶກ­ສາ​ດ້ານ​ເສດ­ຖະ­ກິດ​ຂອງ ສ ອາ​ເມ​ຣິ​ກາ ໄດ້​ເລີ່ມ​ຈັດ​ຕັ້ງ​ປະ­ຕິ­ບັດ​ມາ​ແຕ່​ປີ 2014 ແລະ ປິດ​ລົງ​ໃນ​ວັນ​ທີ 23 ມີ­ນາ 2019 ເປັນ​ໂຄງ­ການ​ສືບ­ຕໍ່​ຈາກ​ຜົນ­ສຳ­ເລັດ​ອັນ​ໂດດ​ເດັ່ນ​ຂອງ​ໂຄງ­ການ​ລູ​ນາ​ລາວ ທີ່​ໄດ້​ຊ່ວຍ​ໃຫ້​ລາວ​ເຂົ້າ​ເປັນ​ສະ­ມາ­ຊິກ​ຂອງ​ອົງ­ການ​ການ​ຄ້າ​ໂລກ ຢ່າງ​ສົມ­ບູນ ໃນ​ປີ 2013.

ຂ່າວທີ່ກ່ຽວຂ້ອງ