ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 26/03/2019

244 26 ມ.ນ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ຈະ​ໃຫ້​ທ່ານ​ຜູ້​ອ່ານ​ຮູ້­ຈັກ​ກັບ​ໜ່ວຍ​ງານ​ໄກ່​ເກ່ຍ​ຂອງ ມຽນ​ມາ ແລະ ລະ­ບຽບ​ການ​ຄວບ​ຄຸມ​ໂດຼນ​ໃນ​ປະ­ເທດ ອາ​ຣັບ​ບີ​ຊາ​ອຸ​ດິດ.

    ທີ່ ມຽນ​ມາ: ເມື່ອ​ເກືອບ 5 ປີ​ກ່ອນ​ໜ້າ​ນີ້ ສະ­ຫະ­ພັນ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ ມຽນ​ມາ (UMFCCI) ໄດ້​ເລີ່ມ​ສ້າງ​ບັນ­ດາ​ສູນ​ໄກ່​ເກ່ຍ​ຄວາມ​ຂັດ​ແຍ່ງ​ທົ່ວ​ໄປ ລວມ​ທັງ​ໃນ​ຂະ­ແໜງ​ເສດ­ຖະ­ກິດ ໂດຍ​ໄດ້​ສ້າງ​ສູນ​ທຳ​ອິດ​ຂຶ້ນ​ທີ່​ສຳ­ນັກ­ງານ​ຂອງ UMFCCI ຢູ່​ນະ­ຄອນ​ຢ້າງ​ກຸ້ງ ຢູ່​ມຽນ​ມາ ລັດ­ຖະ­ບານ​ບໍ່​ມີ​ອຳ­ນາດ​ໃນ​ການ​ສ້າງ­ຕັ້ງ​ສູນ​ໄກ່​ເກ່ຍ ນອກ­ຈາກ​ອົງ​ການ­ຈັດ­ຕັ້ງ​ທີ່​ເປັນ​ເອ­ກະ­ລາດ​ເທົ່າ​ນັ້ນ ຕາມ​ຄຳ​ເຫັນ​ຂອງ​ທ່ານ ໄອ​ເຢ​ລະ​ວິນ (AyeLwin) ຈາກ UMFCCI ແລ້ວ ສູນ​ໄກ່​ເກ່ຍ​ເຫຼົ່າ​ນີ້​ມີ­ໜ້າ​ທີ່​ແກ້​ໄຂ​ຄວາມ​ຂັດ​ແຍ່ງ​ທາງ​ດ້ານ​ເສດ­ຖະ­ກິດ ນອກ­ຈາກ​ນັ້ນ ທາງ​ສູນ​ຍັງ​ເຮັດ​ໜ້າ­ທີ່​ສຳ­ຄັນ​ເພື່ອ​ຊຸກ­ຍູ້​ໃຫ້​ມີ​ການ​ປັບ­ປຸງ​ກົດ­ໝາຍ ວ່າ​ດ້ວຍ​ການ​ໄກ່​ເກ່ຍ​ທີ່​ມີ​ຢູ່​ແລ້ວ ໃນ​ໄລ­ຍະ​ຜ່ານ​ມາ ການ​ແກ້​ໄຂ​ບັນ­ຫາ​ຂັດ​ແຍ່ງ​ຕ່າງໆ​ຍັງ​ເຮັດ​ຕາມ​ປະ­ເພ­ນີ​ດັ້ງ­ເດີມ ເຊິ່ງ​ບໍ່​ເໝາະ​ສົມ​ກັບ​ສະ­ພາບ​ຂະ­ຫຍາຍ­ຕົວ​ທາງ​ດ້ານ​ເສດ­ຖະ­ກິດ ແລະ ສັງ­ຄົມ​ຂອງ​ມຽນ​ມາ​ໃນ​ປັດ­ຈຸ­ບັນ ຂ່າວ​ບອກ​ວ່າ ໃນ​ໄລ­ຍະ​ລິ​ເລີ່ມ​ສ້າງ­ຕັ້ງ​ສູນ​ໄກ່​ເກ່ຍ​ນັ້ນ ທາງ​ລັດ​ຖະ​ສະ­ພາ​ມຽນ​ມາ ກໍ​ພວມ​ພິ­ຈາ­ລະ­ນາ​ປັບ­ປຸງ​ກົດ­ໝາຍ​ໄກ່​ເກ່ຍ ສະ­ບັບ​ເກົ່າ ການ​ສ້າງ​ສູນ​ໄກ່​ເກ່ຍ​ຢູ່​ມຽນ​ມາ ແມ່ນ​ໄດ້​ຮັບ​ການ​ຊ່ວຍ­ເຫຼືອ​ທາງ​ດ້ານ​ວິ­ຊາ​ການ​ຈາກ​ປະ­ເທດ​ສິງ­ກະ­ໂປ ເຊິ່ງ​ມີ​ສູນ​ໄກ່​ເກ່ຍ​ໃຫຍ່​ທີ່​ສຸດ​ແຫ່ງ​ໜຶ່ງ​ໃນ​ໂລກ ການ​ໄກ່​ເກ່ຍ​ຄວາມ​ຂັດ​ແຍ່ງ​ທາງ​ເສດ­ຖະ­ກິດ​ຜ່ານ​ສູນ​ໄກ່​ເກ່ຍ​ຂອງ​ມຽນ​ມາ​ນັ້ນ ມີ​ຂັ້ນ​ຕອນ​ດັ່ງ­ນີ້ ຄື: ຄູ່​ຂັດ​ແຍ່ງ​ທັງ​ສອງ​ທີ່​ບໍ່​ຕ້ອງ­ການ​ແກ້​ໄຂ​ບັນ­ຫາ​ຜ່ານ​ລະ­ບົບ​ສານ ຕ້ອງ​ສະ­ເໜີ​ຕໍ່​ສູນ​ໄກ່​ເກ່ຍ​ຢ່າງ​ເປັນ​ທາງ​ການ ຈາກ​ນັ້ນ ທາງ​ສູນ​ຈະ​ຮຽກ​ຄູ່​ຂັດ​ແຍ່ງ​ມາ​ພົບ​ປະ​ເພື່ອ​ແກ້​ໄຂ​ບັນ­ຫາ​ຮ່ວມ​ກັນ ທາງ​ສູນ​ມີ­ໜ້າ​ທີ່​ພິ­ຈາ­ລະ­ນາ​ຕົກ­ລົງ​ບັນ­ຫາ​ຢ່າງ­ຮອບ­ດ້ານ ແລະ ຍຸ­ຕິ​ທຳ ກ່ອນ​ອື່ນ​ໝົດ ຄະ­ນະ​ໄກ່​ເກ່ຍ​ຂອງ​ສູນ​ຈະ​ຕັ້ງ​ຄຳ​ຖາມ​ວ່າ ທັງ​ສອງ​ຝ່າຍ​ພ້ອມ​ແລ້ວ​ບໍ​ທີ່​ຈະ​ປະ­ຕິ­ບັດ​ຕາມ​ການ​ຕົກ­ລົງ​ຂອງ​ຄະ­ນະ​ໄກ່​ເກ່ຍ ຖ້າ​ຕົກ­ລົງ​ຄູ່​ກໍ­ລະ­ນີ​ຕ້ອງ​ລົງ​ລາຍ ເຊັນ​ຢັ້ງ­ຢືນ​ການ​ຕົກ­ລົງ​ນັ້ນ​ຢ່າງ​ຄັກ­ແນ່ ຈາກ​ນັ້ນ ຄະ­ນະ​ຈຶ່ງ​ຮັບ​ຟັງ ແລະ ຕົກ­ລົງ​ບັນ­ຫາ ພາຍ­ຫຼັງ​ສຳ­ເລັດ​ຂະ​ບວນ​ການ​ໄກ່​ເກ່ຍ​ແລ້ວ ທາງ​ສູນ​ມີ­ໜ້າ​ທີ່​ຕິດ­ຕາມ​ການ​ປະ­ຕິ­ບັດ​ຂອງ​ຄູ່​ກໍ­ລະ­ນີ ຖ້າ​ຝ່າຍ​ໃດ​ຝ່າຍ​ໜຶ່ງ​ຫາກ​ບໍ່​ປະ­ຕິ­ບັດ​ຕາມ​ການ​ຕົກ­ລົງ​ແລ້ວ ທາງ​ສູນ​ກໍ​ມີ​ສິດ​ເອົາ​ມາດ​ຕະ­ການ​ເດັດ­ຂາດ​ກັບ​ຝ່າຍ​ທີ່​ລະ­ເມີດ.

    ທີ່ ອາ​ຣັບ​ບີ​ຊາ​ອຸ​ດິດ: ໃນ​ຕົ້ນ​ປີ 2018 ທາງ​ການ​ປະ­ເທດ​ອາ​ຣັບ​ບີ​ຊາ​ອຸ​ດິດ ໄດ້​ສ້າງ ແລະ ປະ­ກາດ​ໃຊ້​ກົດ​ລະ­ບຽບ​ຄວບ​ຄຸມ ເຄື່ອງ​ບິນ​ທີ່​ບໍ່​ມີ​ຄົນ​ຂັບ ຫຼື ທີ່​ເອີ້ນ​ກັນ​ວ່າ ໂດຼນ (Drone) ລວມ​ທັງ​ໂດຼນ​ປະ­ເທດ​ເຄື່ອງ​ຫຼິ້ນ​ເພື່ອ​ຄວາມ​ເພີດ­ເພີນ​ທົ່ວ​ໄປ ພາຍ​ໃຕ້​ກົດ​ລະ­ບຽບ​ດັ່ງ­ກ່າວ ຜູ້​ຕ້ອງ­ການ​ປ່ອຍ​ໂດຼນ​ສູ່​ນ່ານ​ຟ້າ ຕ້ອງ​ໄດ້​ຮັບ​ອະ­ນຸ­ຍາດ​ຈາກ​ເຈົ້າ​ໜ້າ­ທີ່​ຕຳ­ຫຼວດ​ກ່ອນ ແລະ ການ​ປ່ອຍ​ໂດຼນ​ນັ້ນ ສາ­ມາດ​ເຮັດ​ໄດ້​ໃນ​ສະ­ຖານ­ທີ່​ຈຳ­ກັດ​ໃດ​ໜຶ່ງ​ເທົ່າ​ນັ້ນ ກ່ອນ​ໜ້າ​ອອກ​ກົດ​ລະ­ບຽບ​ຄວບ​ຄຸມ​ໂດຼນ ກອງ​ກຳ­ລັງ​ປ້ອງ​ກັນ​ຄວາມ​ໝັ້ນ­ຄົງ ໄດ້​ຍິງ​ໂດຼນ​ເຄື່ອງ​ໜຶ່ງ ຕົກ​ຍ້ອນ​ເວີ່ນ​ບິນ​ໃກ້ໆ​ກັບ​ສຳ­ນັກ​ພະ​ລາ­ຊະ​ວັງ​ຢູ່​ນະ­ຄອນ­ຫຼວງ ຣີ​ຢາດ.

ຂ່າວທີ່ກ່ຽວຂ້ອງ