ຂ່າວຫຼ້າສຸດ

ສຽງຈາກຜູ້ບໍລິໂພກ

860 27 ມ.ນ. 2019 ນານາສາລະ

    ຜ່ານ​ມາ​ພວກ​ເຮົາ​ເຄີຍ​ຍົກ​ເອົາ​ມາ​ເປັນ​ປະ­ເດັນ​ລົມ​ກັນ ໃນ​ວົງ​ສົນ­ທະ­ນາ​ເລື່ອງ​ຄ່າ​ຄອງ​ຊີບ​ແພງ ເຊິ່ງ​ກ່ຽວ­ຂ້ອງ​ກັບ​ລາ­ຄາ​ສິນ­ຄ້າ ແລະ ອາ­ຫານ​ທີ່​ມັນ​ຫຼຸດ​ໂຕນ​ກັນ​ຫຼາຍ​ໂພດ ຖ້າ​ຈະ​ສະ­ເລ່ຍ​ໃສ່​ເງິນ­ເດືອນ ຫຼື ລາຍ​ໄດ້​ຂອງ​ຄົນ​ສ່ວນ​ໃຫຍ່​ໃນ​ສັງ­ຄົມ ອີກ​ອັນ​ໜຶ່ງ​ກໍ​ຍັງ​ມີ​ເລື່ອງ​ຄ່າ​ອາ­ຫານ ແລະ ສິນ­ຄ້າ​ທີ່​ຂາຍ​ຕ່າງ​ກັນ​ຂອງ​ພໍ່­ຄ້າ​ແມ່​ຄ້າ ບາງ​ຄົນ​ຈົນ​ສາ­ມາດ​ໃຊ້​ຄຳ​ວ່າ​ແພງ​ຈົນ​ຫູ­ດັບ​ຕັບ​ໄໝ້ ບໍ່​ວ່າ​ຈະ​ເປັນ​ຮ້ານ​ຂາຍ­ຍ່ອຍ ຫຼື ຂາຍ­ຍົກ ບາງ​ຮ້ານ​ເຊິ່ງ​ປາ­ກົດ­ການ​ທີ່​ເວົ້າ​ຂ້າງ​ເທິງ​ນີ້ ມັນ​ສະ­ທ້ອນ​ເຖິງ​ພາກ­ສ່ວນ​ທີ່​ກ່ຽວ­ຂ້ອງ ຂາດ​ການ​ຕິດ­ຕາມ​ຄວບ​ຄຸມ​ລາ­ຄາ​ສິນ­ຄ້າ​ຢ່າງ​ທົ່ວ​ເຖິງ ຫຼື ບໍ່​ກວດ​ເປັນ​ປະ­ຈຳ​ກໍ​ເຮັດ​ໃຫ້​ຜູ້​ຂາຍ​ໂກງ​ລາ­ຄາ​ຜູ້​ບໍ­ລິ­ໂພກ​ໄດ້.

    ຄວາມ​ບໍ່​ຍຸດ­ຕິ​ທຳ​ທີ່​ເກີດ​ຂຶ້ນ ລະ­ຫວ່າງ​ຜູ້​ຂາຍ​ກັບ​ຜູ້​ບໍ­ລິ­ໂພກ​ນັ້ນ ຍ່ອມ​ຕ້ອງ​ໄດ້​ເພິ່ງ​ອາ­ໄສ​ການ­ຈັດ­ຕັ້ງ​ກ່ຽວ­ຂ້ອງ​ກວດ­ກາ ແລະ ຄວບ​ຄຸມ​ລາ­ຄາ​ສິນ­ຄ້າ ຫຼື ລວມ​ເຖິງ​ຄຸນ​ນະ​ພາບ​ຂອງ​ສິນ­ຄ້າ ພວກ​ເຮົາ​ບໍ່​ຄວນ​ລືມ​ວ່າ­ຄວາມ​ສະ­ຫງົບ​ສຸກ​ຂອງ​ສັງ­ຄົມ​ນັ້ນ ເກີດ​ມາ​ຈາກ​ຫຼາຍ​ສາ­ເຫດ ເຊັ່ນ: ຄົນ​ບໍ່​ເອົາ​ປຽບ ຫຼື ຂົ່ມ­ຂູ່​ຂົ່ມ​ເຫັງ​ກັນ​ໃນ​ສັງ­ຄົມ ຜູ້​ຂາຍ​ບໍ່​ເອົາ​ປຽບ​ຜູ້​ຊື້ ເຊິ່ງ​ຄຳ​ວ່າ​ຖືກ​ເອົາ​ປຽບ​ກັນ​ນີ້ ຈະ​ຖືກ​ກັບ​ໃຜ​ກໍ​ຄົງ​ບໍ່​ດີ­ໃຈ​ຢ່າງ​ແນ່­ນອນ ຍົກ​ຕົວ­ຢ່າງ​ເລື່ອງ​ນ້ຳ­ມັນ​ບໍ່​ໄດ້​ມາດ­ຕະ­ຖານ ຫຼື ວ່າ​ເວ­ລາ​ໄປ​ໃສ່​ນ້ຳ­ມັນ​ຜັດ​ເຫັນ​ແຕ່​ຕົວ​ເລກ​ຂຶ້ນ ແຕ່​ນ້ຳ­ມັນ​ເຂົ້າ​ຖັງ​ລົດ​ບໍ່​ຮອດ ແບບ​ນີ້​ຜູ້​ບໍ­ລິ­ໂພກ​ເຂົາ​ກໍ​ຈົ່ມ ປະ­ເດັນ​ນີ້​ມັນ​ຍັງ​ພົວ­ພັນ​ເຖິງ​ຊິງ​ຂອງ​ແມ່​ຄ້າ​ຢູ່​ຕະ­ຫຼາດ​ທີ່​ຍັງ​ແກ້​ບໍ່​ຕົກ ເພາະ​ຂາດ​ມາດ​ຕະ­ການ​ເດັດ­ຂາດ​ຕໍ່​ຜູ້​ລະ­ເມີດ...!.

    ຖ້າ​ໃຫ້​ເວົ້າ​ໃນ​ຖາ­ນະ​ສື່ ກໍ​ຂໍ​ຊົມ­ເຊີຍ​ກະ­ຊວງ​ການ​ຄ້າ​ທີ່​ເປີດ​ສາຍ​ດ່ວນ 1510 ເພື່ອ​ເປີດ​ຊ່ອງ​ທາງ​ຮ້ອງ­ທຸກ​ຂອງ​ຜູ້​ບໍ­ລິ­ໂພກ​ທີ່​ຖືກ​ເອົາ​ປຽບ ເຊິ່ງ​ຂ່າວ​ຈາກ​ໜັງ­ສື­ພິມ​ເສດ­ຖະ­ກິດ​ການ​ຄ້າ 1 ມັງ­ກອນ 2019 ກໍ​ລາຍ​ງານ​ໃຫ້​ຮູ້​ວ່າ ມີ​ຜູ້​ຖືກ​ເອົາ​ປຽບ​ລາຍ​ງານ​ແຈ້ງ​ສາຍ​ດ່ວນ​ຫຼາຍ​ກໍ­ລະ­ນີ ລາ­ຄາ​ເຝີ ລາ­ຄາ​ເຂົ້າ­ປຽກ ອາ­ຫານ​ຈານ​ດ່ວນ... ເວ­ລາ​ແກ້​ໄຂ​ກໍ​ຄວນ​ອີງ­ໃສ່​ຫາງ​ສຽງ​ຂອງ​ປະ­ຊາ­ຊົນ ເຊິ່ງ​ລວມ​ທັງ​ເຫັນ­ໃຈ​ນັກ​ທ່ອງ​ທ່ຽວ ເຊິ່ງ​ບາງ​ຄົນ​ມາ​ຄັ້ງ​ດຽວ​ແລ້ວ​ຫາຍ​ໜ້າ​ໄປ​ເລີຍ.

    ການ​ກວດ­ກາ ແລະ ຄວບ​ຄຸມ ຖ້າ­ວ່າ​ເຮັດ​ເປັນ​ປົກ­ກະ­ຕິ ແລະ ເຄັ່ງ​ຄັດ ມີ​ມາດ​ຕະ­ການ​ລົງ­ໂທດ​ຜູ້​ລະ­ເມີດ​ຄັກ­ແນ່ ຄົງ​ຈະ​ເຮັດ​ໃຫ້­ການ​ເອົາ​ປຽບ​ລູກ​ຄ້າ​ຜູ້​ບໍ­ລິ­ໂພກ​ໜ້ອຍ​ລົງ ຢ່າ​ລືມ​ວ່າ ລັດ­ຖະ­ບານ​ກໍ​ມີ​ນະ­ໂຍ­ບາຍ​ຄັດ​ສັນ​ເອົາ​ພະ­ນັກ­ງານ​ທີ່​ມີ​ຄຸນ​ນະ​ພາບ ທາງ​ການ​ຄ້າ-ເສດ­ຖະ­ກິດ ກໍ​ຄວນ​ແກ້​ໄຂ​ປັບ­ປຸງ​ໃຫ້​ພວກ​ຄ້າ­ຂາຍ-ນັກ­ທຸ­ລະ­ກິດ​ບໍ່​ເອົາ​ປຽບ​ຜູ້​ບໍ­ລິ­ໂພກ ບໍ່​ແມ່ນ​ວ່າ​ປາ​ເນົ່າ ຫຼື ຊີ້ນ​ເນົ່າ​ກໍ​ຈະ​ມາ​ຂາຍ​ປົນ​ກັນ ເພື່ອ​ຫຼອກ​ຕາ​ຊາວ­ບ້ານ ຖ້າ​ເຮັດ​ແນວ​ນັ້ນ ຊາວ­ບ້ານ​ຍິ່ງ​ຈະ​ຈົ່ມ​ຫຼາຍ​ຂຶ້ນ !.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ