ຂອງທີ່ລະນຶກ

983 29 ມ.ນ. 2019 ນານາສາລະ

    ຫາກ​ເວົ້າ​ເຖິງ​ຜະ­ລິດ​ຕະ​ພັນ​ສິ້ນ ຍ່ອມ​ພົວ­ພັນ​ເຖິງ​ວັດ­ທະ­ນະ­ທຳ​ຂອງ​ຊາດ ເຊິ່ງ​ບໍ່​ຄວນ​ຖື​ເບົາ ຫຼື ເອົາ​ຫູ​ໄປ​ນາ ເອົາ​ຕາ​ໄປ​ໄຮ່ ເພາະ​ມັນ ຈະ​ສົ່ງ​ຜົນ​ເສຍ​ທັງ​ໄລ­ຍະ​ສັ້ນ ແລະ ຍາວ ຜູ້​ຂຽນ​ໄດ້​ມີ​ໂອ­ກາດ​ນັ່ງ​ຟັງ​ຄຳ​ເຫັນ​ຫຼາຍ​ຄົນ​ທີ່​ບໍ່​ປະ­ສົງ​ອອກ­ຊື່ ກ່ຽວ​ກັບ​ສິນ­ຄ້າ​ທີ່​ລະ­ນຶກ​ຕາມ​ຮ້ານ​ຄ້າ ຫຼື ຕາມ​ສະ­ຖານ­ທີ່​ທ່ຽວ​ຊົມ​ຂອງ​ຊາດ ເຊິ່ງ​ຫຼາຍ​ຄົນ​ອອກ­ປາກ​ເປັນ​ສຽງ​ດຽວ​ກັນ​ວ່າ ພວກ​ເຂົາ​ພົບ​ເຫັນ​ສ່ວນ​ໃຫຍ່​ແມ່ນ​ຂອງ​ທີ່​ລະ­ນຶກ ເຮັດ ແລະ ນຳ​ເຂົ້າ​ມາ​ຈາກ​ປະ­ເທດ​ອື່ນ​ເປັນ​ສ່ວນ​ໃຫຍ່ ເຊິ່ງ​ບາງ​ຄັ້ງ ຕ່າງ­ປະ­ເທດ​ມາ​ທ່ອງ​ທ່ຽວ​ຍັງ​ແປກ​ໃຈ ຫວັງ​ວ່າ​ຈະ​ມາ​ຊື້​ເອົາ​ຂອງ​ລາວ​ແທ້ໆ ກັບ​ເຫັນ​ສິນ­ຄ້າ​ບ້ານ​ເຂົາ​ເອງ.

    ເລື່ອງ​ຂອງ​ທີ່​ລະ­ນຶກ​ຍັງ​ບໍ່​ແລ້ວ ຜູ້​ຂຽນ​ຍັງ​ມີ​ໂອ­ກາດ​ໄດ້​ນັ່ງ​ຟັງ​ຄູ­ບາ​ອາ­ຈານ​ລົມ​ສູ່​ຟັງ ເລື່ອງ​ເຄື່ອງ​ຂອງ​ທີ່​ນຳ​ມາ​ປະ­ກອບ​ໃສ່​ໃນ​ງານ​ສົມ­ໂພດ​ພະ​ພຸດ​ທະ​ຮູບ ເຊິ່ງ​ມີ​ເຄື່ອງ​ປະ­ກອບ​ບູ­ຊາ​ຕ່າງໆ​ທີ່​ນຳ​ເຂົ້າ​ຈາກ​ຕ່າງ­ປະ­ເທດ ທັງໆ​ທີ່​ເຄື່ອງ​ບາງ​ອັນ​ບ້ານ​ເຮົາ​ກໍ​ສາ­ມາດ​ເຮັດ​ໃຊ້​ເອງ​ໄດ້ ຫຼື ວ່າ​ຂາດ​ໜ່ວຍ​ງານ​ກາງ​ເຊີດ​ຊູ​ສົ່ງ­ເສີມ​ສິ­ລະ​ປະ​ເອ­ກະ­ລັກ​ຂອງ​ຊາດ ເຊິ່ງ​ເປັນ​ແນວ​ນັ້ນ​ຈຶ່ງ​ມີ​ຄຳ​ຖາມ​ຕາມ​ມາ​ວ່າ: ເຄື່ອງ​ຂອງ​ທີ່​ນຳ​ມາ​ປະ­ກອບ​ໃນ​ພິ­ທີ­ກຳ​ດັ່ງ­ກ່າວ ຖ້າ​ມັນ​ເປັນ​ສິ­ລະ​ປະ​ຕ່າງ​ຊາດ ແລະ ບາງ​ອັນ​ມີ​ຕົວ​ອັກ­ສອນ​ເຂົາ​ຈາ­ລຶກ​ລົງ​ໃສ່​ນຳ​ແລ້ວ ມັນ​ຈະ​ສົ່ງ​ຜົນ​ແນວ­ໃດ​ຕໍ່​ອະ­ນາ­ຄົດ...! ຍົກ​ຕົວ­ຢ່າງ ບາງ​ປະ­ເທດ​ເຂົາ​ມີ​ກຳ­ມະ­ການ​ເອ­ກະ­ລັກ​ຂອງ​ຊາດ ແລະ ມີ​ໜ່ວຍ​ງານ​ກວດ­ກາ-ຄວບ​ຄຸມ ເພື່ອ​ປົກ​ປ້ອງ ແລະ ສົ່ງ­ເສີມ​ສິ­ລະ​ປະ-ວັດ­ທະ­ນະ­ທຳ​ຂອງ​ຊາດ.

    ຖ້າ­ວ່າ​ມີ​ໜ່ວຍ​ງານ​ໃດ​ໜຶ່ງ ຫາກ​ເລັງ​ເຫັນ​ຄວາມ​ສຳ­ຄັນ​ຂອງ​ສິ­ລະ​ປະ-ວັດ­ທະ­ນະ­ທຳ​ຂອງ​ຊາດ ມີ​ນະ­ໂຍ­ບາຍ​ສົ່ງ­ເສີມ ຊ່າງ​ແກະ­ສະ­ຫຼັກ ຊ່າງ​ຄວັດ ຊ່າງ​ແຕ້ມ ຫຼື ຊ່າງ​ອື່ນໆ ທີ່​ສ້າງ​ງານ​ສິ­ລະ​ປະ​ຂອງ​ຊາດ ໂດຍ​ນຳ​ເອົາ​ຜົນ­ງານ​ຂອງ​ພວກ​ເຂົາ​ເຫຼົ່າ­ນັ້ນ​ມາ​ວາງ​ໂຊ ຫຼື ຂາຍ​ຢ່າງ​ກວ້າງ­ຂວາງ ກໍ​ເປັນ​ຊ່ອງ​ທາງ​ໜຶ່ງ​ໃຫ້​ຊ່າງ​ເຫຼົ່າ­ນັ້ນ​ມີ​ກຳ­ລັງ​ໃຈ ມີ​ລາຍ​ໄດ້​ຈູນ​ເຈືອ​ຄອບ­ຄົວ ເຊິ່ງ​ທັງ​ເປັນ​ການ​ເຊີດ​ຊູ​ເອ­ກະ­ລັກ​ຂອງ​ຊາດ ຄ້າຍ​ກັບ​ວ່າ​ຍິງ​ປືນ​ນັດ​ດຽວ​ໄດ້​ນົກ​ສາມ​ສີ່​ໂຕ ເພາະ​ຕາມ​ສະ­ຖານ­ທີ່​ທ່ອງ​ທ່ຽວ​ຫຼາຍ​ບ່ອນ ກໍ​ຍັງ​ມີ​ຫາງ​ສຽງ​ວ່າ​ພົບ​ແຕ່​ຂາຍ­ເຄື່ອງ​ທີ່​ລະ­ນຶກ​ຂອງ​ຕ່າງ­ປະ­ເທດ.

    ຜູ້​ຂຽນ​ນຳ​ສະ­ເໜີ​ແລກ­ປ່ຽນ​ບັນ­ຫາ​ຂ້າງ​ເທິງ​ນັ້ນ​ຄົງ​ຈະ​ມີ​ປະ­ໂຫຍດ ເພື່ອ​ໃຫ້​ສັງ­ຄົມ​ໄດ້​ລອງ​ຊ່ວຍ​ກັນ​ຄິດ​ເຫັນ​ຄວາມ​ສຳ­ຄັນ​ຂອງ​ວັດ­ທະ­ນະ­ທຳ​ຊາດ ທີ່​ບົ່ງ​ບອກ​ເຖິງ​ຄວາມ​ຈະ­ເລີນ​ທາງ​ພູມ​ປັນ­ຍາ​ທີ່​ຄົນ​ລາວ​ສືບ​ທອດ​ມາ​ລຸ້ນ​ຕໍ່​ລຸ້ນ ຖ້າ­ວ່າ​ຂາດ​ການ​ສົ່ງ­ເສີມ ອາດ​ເຮັດ​ໃຫ້​ສີ­ໄມ້­ລາຍ­ມື​ອັນ​ງົດ​ງາມ​ນັ້ນ ຕາຍ​ໄປ​ກັບ​ການ​ບໍ່​ເຫັນ​ຄຸນ­ຄ່າ​ໃນ​ສິ­ລະ​ປະ​ວັດ­ຖຸ​ຂອງ​ຊາດ​ຕົນ !.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ